Yob
8 E Bildad ma Jacuwa udwoko kumae:
2 “Ibimediri niweco kumeni nitundo awene?
Wec m’i dhogi tie pare yamu ma tek!
3 Nyo Mungu binyotho lembe m’atira,
kadi nyo Jategokpo binyotho bedopwe?
4 Calu ma woti gidubo ire,
eweko ginwang’u matira pi jai migi;*
5 ento tek ndhu isayu kaka Mungu
man ikwayu Jategokpo unyuth iri bero,
6 man ka nwang’u andha ibino leng’ man atira,
nwang’u eai malu piri,
man edwoki kakeri ma tap.
7 Man kadok nwang’u ku kwong’a kabang’ lem peri ubino mbe,
ento nwang’u i nindo m’ubino, ibedo ng’atu ma dit.
8 Akweyi, kepenj dhanu m’utuk m’ukadhu,
man winj cuu lembe ma wego migi ginwang’u.
9 Kum junyolowa ndhu nyaworo eni, man gin ma wang’eyo mbe,
pilembe nindo mwa iwi ng’om utie tipopiny.
10 Nyo gibiponji ngo,
man gibinyutho ngo iri gin ma ging’eyo?*
11 Nyo kolo copo dongo ma bor kaka ma jugu mbe i iye,
man nyo agada copo dongo ma bor m’umbe pii?
12 Kinde m’ebenyunyo anyunya ma fodi juthume ngo,
ebilar thwo ni lum moko ci.
13 Eno tie ajiki* mi dhanu ceke ma wigi uwil pi Mungu,
kum genogen pa ng’atu ma woro ngo Mungu* birwinyo.
14 Egeno gin m’umbe
man genogen parene ng’aw calu thondh* avaceng’.
15 Ebijeng’ i kum ot pare, ento ode bicungo ngo;
ebipimo nimake kii, ento ebigalu ngo.
16 E calu uboko ma numu i wang’ ceng’,
man jange lal i podho.
17 Ulage kadere i kind kidi m’udhurere,
eyenyo ot i kind kidi.*
18 Ento ka jufudhe* ku kakare,
kaka maeno bikwere man biwacu kumae: ‘Fodi aneni de ngo.’
19 Eyo, kumeno re m’ebirwinyo;*
i ng’eye, mange bidok twii kud i utur.
21 Kum asu ebipong’o dhogi ku ng’iero,
man dend dhogi ku kok mir anyong’a.
22 Lewic bipong’ iwi ju m’udegi,
man hema mi jutimrac bibedo mbe.”