Yob
9 Yob udwoko kumae:
2 “Ang’eyo cuu nia etie kumeno.
Re nyo dhanu ma tho e copo loyo kesi i dhu Mungu?
3 Tek ng’atu moko ubemito piemere kude,*
ng’atuno bidwoko ngo wang’ penji pare acel de iwi penji elufu.
4 E riek lee man etie ku tego ma dit.
Ng’a ma copo cerere ire man ebedo museme?
5 Ecoro* got ma ng’atu ma ng’eyo mbe,
eloko thegi ka ng’eicwiny umake.
6 Eyengo ng’om ai cen ku kakare,
e mbegine miel.
7 Eng’olo ni ceng’ nia kud erieny,
man eciko ba der mi nyikaluku cen;
8 emoyo polo en kende
man ewotho iwi mujanga mi nam m’udodere malu.
10 Etimo lembe ma dongo man ma nyang’ i igi tek,
lembe ma wang’u ijo man ma kwanere ngo.
11 Ekadhu kud i vuta, ento acopo nene ngo;
ekadhu kud i wang’a, ento ang’iye ngo.
12 Kan emaku piny moko, ng’a ma copo cerere ire?
Ng’a ma romo yero ire nia, ‘ibetimo ang’o no?’
13 Mungu bicero ngo ng’eicwiny pare,
kadok jukony pa Rahab* de gibirum piny ire.
14 Ka dong’ kinde m’abedwoko ire lembe ke,
nyo ukwayu ngo ang’ii cuu wec para m’apiemara ko kude?
15 Kadok nwang’u lembe para en e mandha de, nwang’u aloko ngo ire lembe.
Nwang’u akwayu kende kende nia japoklembe para unen kisa i kuma.
16 Kan alwong’e, nyo ebiloko ira lembe?
Ayiyo ngo nia ebiwinjo dwanda.
17 Kum eberunga ku yamu ma tek,
man enyayu rem para mananu.
18 Ebeweko ngo ayuy ayuya de;
ebething’a ku piny ma kec thiri thiri.
19 Tek etie lembe mi tego, en re m’e tek;
tek etie lembe mi bedopwe, ewacu kumae: ‘Ng’a ma copo tera i wang’ pido?’
20 Kadok nwang’u lembe para en e mandha,* nwang’u dhoga gira ubepoko lembe rac i wiya;
22 Ceke rom. Eno re m’uketho awacu nia,
‘enyotho ng’atu ma lembe mbe i wiye* man ng’atu ma rac bende.’
23 Tek pii m’upong’ mbwang’ unego dhanu rek,
ebing’iero ng’atu ma lembe mbe i wiye ma dong’ umbe ku genogen.
24 Jumiyo ng’om i cing’ jutimrac;
eumo wang’ jupoklembe m’i iye.
Ka tie en ungo, nwang’u dong’ ng’a ke?
25 Kawoni nindo para uberingo pio nisagu jaring ng’wec;
giberingo m’umbe nineno gin ma ber.
26 Gibemol calu yei mir agada,
calu acur ma giberingo pio iwi cam migi.
27 Tek awacu kumae: ‘Wiya biwil i kum wak m’abewagara ko,
abikabu can kud i wang’a man anyong’a binega.’
28 Lworo binega asu pi litho para ceke
man ang’eyo ibinwang’u nia lembe n’i wiya.
29 Jubinwang’u nia a jakosa.*
Dong’ pirang’o asendara mananu?
30 Tek ajomo pii pei m’uloy
man alwoko cinga ku sabuni,*
31 e ibilund roya vuc i vur,
ma dong’ bongu para gira de bidaga.
32 Kum etie ngo dhanu ve an ma nia alok ire lembe,
kara wacidh wapid kude karacelo.
34 Tek ejigo nifwoda
man eweko ninyayu ndiri i iya ku lworo pare,
35 e abiweco i bang’e m’umbe lworo,
kum en e kura para ngo niweco ku lworo.