Zaburi
Ni jatel wi wer. Wer pa Daudi.
41 Jamutoro tie ng’atu m’ubedieng’ pi ng’atu ma ka kite mbe;
Yehova bilare i nindo mi can.
2 Yehova bigwoke man ebiketho ebibedo kwo.
Jubiwacu nia e jamutoro iwi ng’om;
Ibimiye ngo ni yeny* mi judegi pare.
3 Yehova bijenge iwi kavuto mi remo pare;
Kinde m’ebetwoyo ibiloko kavuto pare ceke.
4 Kum awacu kumae: “E Yehova, nyuth ira bero.
Key kuma,* kum adubo iri.”
5 Ento judegina gibeweco rac pira kumae:
“Ebitho awene man nyinge birwinyo awene?”
6 Tek ng’atu acel m’i kindgi ubino ninena, adundene weco vupo.
Eyenyo lembe moko ma copo tima rac kara ecidh eyer;
E i ng’eye ewok man elale kaka moko ci.
7 Ju ceke ma gidaga gibemung’ i kindgi;
Gibepangu lembe ma rac i kuma kumae:
8 “Lembe moko ma pek* uwok i wiye;
Kawoni ma dong’ en’i ng’om, ebiai ungo kendo malu.”
9 Kadok ng’atu ma wabedo kude ku kwiyocwiny, ma en e ng’atu m’ageno,
M’ubed ucamu mukathi para, uting’o ufuny tiende* i kuma.
10 Ento in, E Yehova, nyuth ira bero man ting’a malu,
Kara acul igi wang’ lembe ma gitimo.
11 I maeni abing’eyo nia anyong’a negi i kuma:
Kinde ma jadegi para bikok ungo kok mir aloci i wiya.
12 Ento an, ibetiela pi bedocu para;
Ibiketho abibedo i vuti pi nja.
13 Dong’ jupak Yehova Mungu mir Israel
Rondo ku rondo.*
Amen man amen.