Zaburi
BUKU MIR ARIO
(Zaburi 42-72)
Ni jatel wi wer. Maskil* pa wot Kora.
42 Calu ruda m’ubesayu ka pii m’ubemol kud ava,
An de abesayu* kakeri kumeno, E Mungu.
2 Rieu ubenega* pi Mungu, pi Mungu ma kwo.
Abibino man abicungo awene i wang’ Mungu?
3 Piwang’a udoko ni cam para dieceng’ ku diewor;
Dieceng’ duu dhanu ginywara kumae: “Mungu perine ni kani?”
4 Abepoy i kum lembe maeni, man akoro iri kite m’awinjara ko,*
Kum con abed awotho karacelo kud udul dhanu;
Abed awotho kamaleng’* i wang’gi kinde ma wacidho i ot pa Mungu,
Ku dwal mi mutoro man mi dwoko foyofoc,
Ma en e dwand udul ma gibetimo foc.
5 Pirang’o cwinya* ai?
Pirang’o kuma copo piey de ngo?
Abikuro Mungu,
Kum fodi asu abipake, en m’e Jalarna ma Dit.
6 Mungu para, cwinya* ai.
Eno re m’uketho abepoy piri,
Niai kud i ng’om mi Yordan man kud iwi usimbru Hermon,
Niai kud iwi Got Mizar.*
7 Pii ma thuc ubelwong’o pii ma thuc
Ku ba dwand pii peri m’ubekworere.
Mujanga peri ceke m’ubecorere uuma.
8 Yehova binyutho ira mer pare ma lokere ngo dieceng’,
Man diewor wer pare bibedo karacelo kuda,
Ma en e rwo ni Mungu m’umiyo ira kwo.
9 Abiwacu ni Mungu ma en e cana para kumae:
“Pirang’o wii wil kuda?
Pirang’o ukwayu awoth kun ku kun ku can pi jadegina m’ubesenda?”
10 Judegina ma gidaga kud adegi mi nek* gibenywara;
Dieceng’ duu gibenywara kumae: “Mungu perine ni kani?”
11 Pirang’o cwinya* ai?
Pirang’o kuma copo piey de ngo?
Abikuro Mungu,
Kum fodi asu abipake, en m’e Jalarna ma Dit man Mungu para.