Zaburi
Ni jatel wi wer; ma juciko iwi “Thiwe.” Pa wot Kora. Maskil.* Wer mi mer.
45 Adundena ubethukini pi gin moko ma ber.
Awacu kumae: “Wer para ubeweco* pir ubimo.”
Dong’ leba ubed calu kalamu pa jagor ma jabodho.*
2 In i leng’ nisagu zoo i kind wot dhanu.
Wec ma mit mol amola kud i dend dhogi.
Eno re m’uketho Mungu umiyo mugisa iri pi nja.
3 Twii palamularu peri i wang’ ng’eti, E in m’i ng’atu ma tek,
I dwong’ peri man i leng’o peri.
4 Man i leng’o peri, cidhi pi niloyo;
Ring ku riuni peri pi nikiedo pi lemandha, pi jwigiri, man pi bedopwe,
Man cingi mir acwic bitimo* lembe ma wang’u ijo.
5 Athero peri lakgi bith, gibeketho dhanu upodh i weng’i;
Gibecobo i adunde judegi p’ubimo plu.
6 Mungu tie komker peri rondo ku rondo;
Uluthker mi ker peri tie uluthker mi lembe m’atira.*
7 Imaru bedopwe, man idagu racu.
Eno re m’uketho Mungu, eyo, Mungu peri uwiri ku mo mir anyong’a nisagu juwedu.
8 Jukilo ng’wic mo ma ng’ar mi mira, mir ukozoro, man mi muruku i kum bongu peri ceke,
Jamgoyo wer ma juthondhe ubenyayu anyong’a i ii niai kud i kal ma dit mi lak liec.
9 Jumanyir mi jubim gin’i kind mon mir awora mi kal peri.
Dhaker p’ubimo ucungo yor i cingi mir acwic m’erukere ku mola ma kwar mir Ofir.
10 Winji, E nyaku, winj kilili man cik ithi;
Wii wil pi juthu man pi ot pa wuru.
11 E leng’o peri bitelo ubimo,
Kum en e rwoth peri,
Pieno rum piny i wang’e.
12 Nyaku mi Turo bibino ku giramiya,
Ju m’ulony nisagu zoo gibisayu ginwang’ bero i weng’i.
13 Nyarubimo uberiang’ini ariang’a i kal,*
Juruko bongu pare ku mola ma kwar.
14 Jubikele i wang’ ubimo m’ekendo bongu ma jukwoyo ma leng’ mandha.*
Jubiroyo jumanyir wadi ma sumba ma gibelubo ng’eye i weng’i.
15 Jubikelogi kud anyong’a man mutoro;
Gibimondo i kal p’ubimo.
16 Woti gibimaku kaka kwaru peri.
Ibikethogi ni judongo ma wijo i ng’om zoo.
17 Abiketho nyingi ung’eyere i kind dhanu m’utuk ceke ma bibino.
Pieno, dhanu bipeki rondo ku rondo.