Zaburi
Ni jatel wi wer; juwere ku dwal mi “Kud inyothi.” Miktam* pa Daudi. Kinde ma Saul uoro dhanu ucidh ukur wi ot pa Daudi* kara ginege.
59 Lara kud i cing’ judegi para, E Munguna;
Gwoka ni ju ma gibeai i kuma.
2 Lara kud i cing’ ju ma gitimo lembe ma reco,
Man bodha kud i cing’ dhanu ma jurop.*
4 Kadok atimo ngo gin moko ma rac, giringo man giyikiri pi nicoro i wiya.
Kinde m’abelwong’i, ai malu man inen.
5 Kum in, E Yehova Mungu mir udul, in i Mungu mir Israel.
Cew kara ilok weng’i i bang’ thek ceke.
Kisa kud unegi i kum ju ma gicibo juwagi ku rac. (Sela)
6 Gidwogo nja dhu uthieno;
Gigbuyo calu gwok man giwotho rr i adhura.
7 Nen gin m’ubethwogere kud i dhoggi;
Dend dhoggi calu palamularu,
Kum gibewacu kumae: “Ng’a m’ubewinjo?”
8 Ento in, E Yehova, ibing’ierogi;
Ibicayu thek ceke.
9 E Tego para, abimedara nikuri;
Kum Mungu en e kapondo para ma museme.*
10 Mungu ma nyutho ira mer ma lokere ngo bibino konya;
Mungu biketho abineno jukwor para ku wang’ mir aloci.
11 Kud ineggi kara wi dhanu para kud uwil.
Ku tego peri, keth giwoth swa;
Keth gipodhi, E Yehova ban mwa.
12 Pi dubo mi dhoggi, wec mi dend dhoggi,
Wek gipodh i uwic mi kuhaya migi,
Nikum alam man ndra ma gibeyero.
13 Dargi ceke nikum kwinyo peri;
Dargi pet, kara thegi thum;
Keth ging’ey nia Mungu ubebimo i Yakobo man cil i ajiki mi ng’om. (Sela)
14 Wek gidwog dhu uthieno;
Dong’ gigbuy calu gwok man giwoth rr i adhura.
15 Dong’ giwoth swa pi nisayu cam;
Kud iketh giyeng’ man kud ginwang’ kaka ma gibed i iye.
16 Ento an abiwero pi tego peri;
Kugweno abiweco pi mer ma lokere ngo peri kud anyong’a.
Kum in i kapondo para ma museme
Man kaka m’aringo i iye i saa mi can para.
17 E Tego para, abiwero wer mi pak* iri,
Kum Mungu en e kapondo para ma museme, Mungu ma nyutho ira mer ma lokere ngo.