Zaburi
105 Wudwok foyofoc ni Yehova, wulwong’ nyinge,
Wuketh tic pare ung’eyere i kind dhanu!
3 Wuyunguru pi nyinge ma leng’.
Wek anyong’a uneg adunde ju m’uyenyo Yehova.
4 Wusay ka Yehova man tego pare.
Wuyeny wang’e* saa ceke.
5 Wupoy pi tic ma wang’u ijo m’etimo,
Udu pare man pokolembe pare ma pwe.
6 Wu nyikway* Abraham ma jatic pare,
Wu wot Yakobo m’eng’iyowu.
7 Etie Yehova Mungu mwa.
Pokolembe pare timere iwi ng’om zoo.
8 Epoy pi lembariba pare pi nja ku nja.
Man pi lembang’ola m’etimo* nitundo i kum dhanu m’utuk elufu acel (1 000).
9 Pi lembariba m’etimo kud Abraham,
Man pi lembe m’ekwong’o ni Isak.
10 M’eketho ubed ni cik ni Yakobo,
Man ni lembariba ma nja ni Israel,
11 Kinde m’ewacu kumae: “Abimiyo iri ng’om mi Kanan
Ni giralaga peri.”
12 Eyero lembe maeno kinde ma wendgi ubino nok,
Eyo, nyanok magwei man gibino umondo i ng’om.
13 Gibed giwotho i kind thek kun ku kun,
Giai kud i bang’ ker acel gicidho i bang’ dhanu mange.
14 Eweko ngo ng’atu moko usendgi,
Ento ejuko jubim pigi,
15 Ewacu kumae: “Kud wumul kum ju ma juwiro para,
Man kud wutim lembe moko ma rac i kum jubila para.”
16 Elwong’o ndru ubino iwi ng’om,
Ekathu the yo migi mi nwang’u mukathi.*
17 Eoro Yozefu yor i wang’gi
M’ubino ng’atu ma julworo kara udok ng’eca.
19 Nitundo i saa ma lembe pare utimere kakare,
Lembe pa Yehova re m’udwoke leng’.*
20 Ubimo uoro jucidh jugonye,
Eyo, ubimo mi dhanu uweke ebedo agonya.
21 Ekethe edoko jadit mi ot pare,
Eyo, jabim iwi piny pare ceke.
23 I ng’eye, Israel ucidho i Misiri,
Man Yakobo ukwo calu umondo i ng’om pa Ham.
24 Mungu uketho dhanu pare ginyay lee mandha;
Eketho gidoko tek nisagu judegi migi,
25 M’eweko adundegi ulokere pi nidagu dhanu pare,
Pi nicamu gamba i kum jutic pare.
26 Eoro Musa ma jatic pare,
Man Arun m’eng’iyo.
27 Gitimo giranyutha pare i kindgi,
Man udu pare i ng’om pa Ham.
28 Eoro mudho i kindgi, e ng’om udoko col;
Gijai ungo i kum lembe pare.
29 Eloko pii migi udoko ni rimo
Man enego rec migi.
30 Ungwal ugam upong’o ng’om migi,
Nitundo bir i kusika p’ubimo.
31 Eng’olo lembe ni umiyo, e gicoriri i wigi,
Man ni uber, e giromo ng’om migi ceke.
32 Eloko koth migi udoko ni pei
Man eoro lukoth* i ng’om migi.
33 Egoyo ulok migi man yend ulam migi
Erungo i yen mi ng’om migi.
34 Eng’olo lembe ni bonyo, e gicoriri i wigi,
Nyithi bonyo ma wendgi kwanere ngo.
35 Gicamu uboko ceke m’i ng’ombe,
Man gicamu piny mi podho migi.
36 I ng’eye, enego kayu ceke mi ng’om migi,
Acaki mi tego migi mi nyodo.
37 Eketho dhanu pare giwok ku mola ma tar man ku mola ma kwar;
Man suru moko acel de mbe m’i kind suru pare m’ukier.
38 Anyong’a unego Misiri kinde ma giwok,
Kum lworo mi Juisrael* umakugi.
39 Epedho afuru pi niumo bang’gi
Man mac pi nimiyo der ku diewor.
40 Gikwayu, e ekelo igi aywer;
Emedere niyeng’ogi ku mukathi mi polo.
41 Eyabu dhu cana, e pii uthwogere woko;
Pige mol calu kulo i langa.
42 Kum epoy i kum lembang’ola ma leng’ m’etimo ni Abraham ma jatic pare.
43 Pieno, ewodho dhanu pare ma gitie kud anyong’a,
Jupare m’eng’iyo ma gibekok ku mutoro.
44 Emiyo igi ng’om mi dhanu mi thek mange;
Gilagu adwogi mi tic ma tek ma dhanu mange utimo,
45 Kara gilub telowic pare
Man giwor cik pare.
Wupak Yah!*