Zaburi
106 Wupak Yah!*
Wudwok foyofoc ni Yehova, pilembe e ber;
Mer pare ma lokere ngo bedo rondo ku rondo.
2 Ng’a ma copo tuco pi lembe ma dongo ceke pa Yehova
Kadi ma copo twong’o pi timo pare ceke m’uromo ku paki?
3 Jumutoro gi ju ma gitimo lembe ku bedopwe,
Ma saa ceke gitimo lembe m’atira.
4 Poy pira, E Yehova, kinde m’ibenyutho bero ni dhanu peri.
Gwoka ku tic mi both peri,
5 Kara inyuth ira bero m’inyutho ni ju m’ing’iyo,
Kara anyong’a nega karacelo ku dhanu peri,
Kara alulara kinde m’abepeki karacelo ku giralaga peri.
6 Wadubo tap calu kwaruwa gidubo;
Watimo lembe m’atira ngo; watimo rac.
7 Kwaruwa gifoyo ngo ku* tic ma wang’u ijo m’itimo i Misiri.
Gipoy ungo i kum udul mer peri ma lokere ngo,
Ento gijai i dhu nam, i dhu Nam ma kwar.
8 Re ebodhogi nikum nyinge,
Kara eketh tego pare ung’eyere.
9 Ejuko Nam ma kwar, e edwono;
Eketho giwotho i thucne ve gibewotho i langa;
10 Ebodhogi kud i cing’ jukwor migi
Man ewarugi kud i cing’ judegi migi.
11 Pii uumere iwi judegi migi;
Ng’atu acel de mbe m’i kindgi m’uboth.*
12 I ng’eye giyiyo lembe m’eng’olo,
Man gicaku wero ire wer mi pak.
13 Ento wigi wil nyapio pio i kum gin m’etimo;
Gikuro ngo juk pare.
14 Gimiyiri nipong’o awanya migi ma rac i langa;
Gimulo i Mungu i langa.
15 Emiyo igi gin ma gikwayu,
Ento i ng’eye egoyogi ku twoyo m’udaru tego migi* man unegogi.
16 Kumira ucaku negogi i kum Musa i kagonjo
Man i kum Arun ma ng’atu ma leng’ pa Yehova.
17 I ng’eye ng’om ugam ukak, e emwonyo Dathan
Man eumo wi ju ma gicokiri karacelo kud Abiram.
18 Mac uopo i kind ungu migi;
Lebmac uwang’u ju ma reco.
19 Giyiko nyathi dhiang’ i Horeb
Man girum i wang’ ayi gin m’acwiya mi cuma;*
20 Giwilo dwong’ para
Gimiyo ni ayi thwon dhiang’ ma camu lum.
21 Wigi uwil i kum Mungu ma Jalar migi,
M’utimo lembe ma dongo i Misiri,
22 Etimo tic ma wang’u ijo i ng’om pa Ham,
Man tic ma ng’oyo ndiri i Nam ma kwar.
23 Nwang’u dong’ ebecinyothogi,
Ento Musa ma ng’atu m’eng’iyo ukwayu pigi i bang’e*
Pi niloko kwinyo pare cen kara kud enyothgi.
24 I ng’eye gicayu ng’om ma ber;
Man giyiyo ngo lembang’ola pare.
25 Gimediri ning’ur i hema migi;
Giwinjo ngo dwand Yehova.
26 Pieno eting’o cinge man ekwong’o pigi
Nia ebiketho gibipodho i langa;
27 Nia ebiketho nyikwaygi bipodho i kind thek,
Man nia ebilalugi i wang’ ng’om.
29 Ginyayu ng’eicwiny i iye ku timo migi,
E thong’om ugam upodho i kindgi.
30 Ento kinde ma Fineas uai malu man etimo lembe,
Thong’om ujik.
31 Man jukwane ire ni bedopwe
I kind dhanu m’utuk ceke rondo ku rondo.
32 Ginyayu ng’eicwiny i iye i pii mi Meriba,*
Man pigi lembe ulokere rac i kum Musa.
33 Ginyayu ng’eicwiny i iye,*
Uketho eyero lembe ma nwang’u ukwayu ngo eyer ku dend dhoge.
34 Ginyotho ngo dhanu
Calu ma Yehova ugam ung’olo igi.
35 Ento gidikiri ku dhanu mi thek mange
Man gicaku timo calu gin.*
36 Gimediri nitimo ni ayi gin m’acwiya migi,
Man ayi gin m’acwiyane udoko igi ni uwic.
37 Gibed githiero wotgi
Man nyiggi ni pajogi.
38 Gimediri nicwiro rimb dhanu m’udubo ngo,
Rimb wotgi gigi man rimb nyiggi
Ma gibed githiero ni ayi gin m’acwiya mi Kanan;
E ng’om unyothere ku rimo ma gicwiro.
39 Timo migi uketho gicido;
Gitimo asara i thenge mi tipo nikadhu kud i timo migi.
40 Pieno ng’eicwiny pa Yehova uopo i kum dhanu pare
Man etuc nidagu giralaga pare.
41 Emiyogi i cing’ dhanu mi thek mange wang’ ma pol,
Kara ju m’udagugi ubim i wigi.
42 Judegi migi usendogi,
Man jujwigogi i the tego migi.*
43 Wang’ ma pol ebed ebodhogi,
Ento gibed gijai man giworo ngo,
E jubed jujwigogi nikum kosa migi.
44 Re ebed eneno masendi migi
Man ewinjo wak migi ma gikwayu ko kony.
46 Ebed eketho kisa nego dhanu ceke
Ma nwang’u umakugi ni ng’eca.
47 Bodhwa, E Yehova Mungu mwa,
Man cok dhogwa kud i kind dhanu mi thek mange
Kara wadwok foyofoc ni nyingi ma leng’
Man wapeki kud anyong’a.
48 Dong’ jupak Yehova Mungu mir Israel
Rondo ku rondo.*
Man dong’ dhanu ceke giwac kumae: “Amen!”*
Wupak Yah!*