Zaburi
Ni jatel wi wer. Wer pa Daudi.
19 Polo ubetwong’o pi dwong’ pa Mungu;
Kor polo ubetwong’o pi tic mi cinge.
2 Kubang’ dieceng’ giwodho wec,
Man kubang’ diewor ginyutho ng’eyong’ec.
3 Giweco ngo man lembe ma giyero mbe;
Dwandgi de winjere ngo.
4 Ento dwandgi* ucidho i wang’ ng’om zoo,
Man rwonglembe migi utundo kadok i bang’ dhanu mi gund ng’om* ma bor.
Eguro hema ni ceng’ i polo;
5 Cenge calu cwar mugole m’ubewok kud i kusika pare;
Anyong’a nege calu jarukara m’uberingo i yo.
6 Ewok kud i tung polo acel,
Man etwodere nitundo i tunge ma kucelo;
Man gin moko mbe ma pondo ni liethone.
7 Cik pa Yehova tie leng’, edwoko tego.*
Poyowic pa Yehova tie ma jugeno, eketho ng’atu m’ung’eyo lembe akeca ngo doko riek.
8 Ng’ol m’uai i bang’ Yehova gi pwe, ginyayu anyong’a i adunde,
Lembang’ola pa Yehova tie leng’, eketho wang’ rieny.
9 Lworo pa Yehova tie leng’, ebedo mi nja.
Lembapoka pa Yehova gi mandha, gin ceke gi pwe.
10 Jumarugi lee nisagu mola ma kwar,
Nisagu mola ma kwar dupa ma leng’,*
Man gi mit nisagu miyokic, miyokic m’ubeton kud i kum pedone.
11 Jatic peri nwang’u cimowang’ i igi;
Niworogi miyo sukulia ma dit.
12 Ng’a ma copo ng’iyo kieri?
Nyuth nia lembe mbe i wiya nikum dubo m’ang’eyo pire ngo.
13 Man cer jatic peri kud i kum timo mi rikini;
Kud iwek gibim wiya.
14 Dong’ wec mi dhoga man nyamu i lembe mir adundena unyay anyong’a i ii
E Yehova, Cana para man Jawarna.