Wer pa Suleman
6 “Ng’atu m’imaru ucidho kakani,
E in m’i leng’ nisagu mon mange ceke?
Ng’atu m’imarune ukwanyu gengi ma kani?
Wek wacidh wasaye wakudwu.”
2 “Ng’atu m’amaru uloro piny i podho pare,
kaka ma lum ma ng’wice ng’ar upong’ i iye,
pi nikwayu udul lim i kind podho
man pi nipono thiwe.
3 An a pa jamerna,
man jamerna en e para.
Ebekwayu udul lim i kind thiwe.”
4 “I leng’ calu adhura mi Tirza, nyaramara para,
i leng’ calu Yeruzalem,
iwang’u ijo lii calu udul mony m’ucungo i the bendela migi.
5 Lok weng’i cen kud i bang’a,
kum gibenego kuma.
Yuk wii calu udul diegi
m’ubekonjere kud i kor got Gilead.
6 Leki calu udul rombe
ma gibeidho kud i kulo ma juai julwoko kumgi i iye;
gin ceke gigwaru agwara,
acel de mbe ma nyathine rwinyo.
7 Limbi* calu theng nying ulemo
i the bongu m’uumo weng’i.
8 Copere nia mon p’ubimo tie pier abusiel
man mon m’araga* pier abora
ku jumanyir ma wendgi kwanere ngo.
9 Ento akuru para en acel kende, nyagin para ma mulima mbe i kume.
En acel kulong’ pa min.
En e kacwiny* min m’unyole.
Jumanyir ginene man giwacu nia e jamugisa;
jumamon p’ubimo man mon pare m’araga gipake.
10 ‘Eni dhaku ma kani m’ulero calu mombwa,
ma leng’ calu dwi m’ugudo,
ma tetete calu der ceng’,
man ma wang’u ijo lii calu udul mony m’ucungo i the bendela migi?’”
11 “Aloro i podho mi yen ma cego nyinggi ma ve kalanga*
pi nineno janggi m’uloth i poga,*
pi nineno ka nyo yend ulok ucobo,*
man ka nyo yend ulemo uthiwo.
13 “Dwogi, dwogi, E Nyaculami!
Dwogi, dwogi,
kara waneni!”
“Wubeneno Nyaculami pirang’o?”
“En e calu miel i kind ungu ario mi dhanu!”*