Wer pa Suleman
1 Wer ma mit m’usagu zoo, ma en e wer pa Suleman:
2 “Cwii limba ku dhogi,
kum ayi m’inyutho ko mer tie ber ma sagu pigulok.
3 Ng’wic mo peri ng’ar akeca!
Nyingi tie ve ng’wic mo ma ng’ar ma jukonjo.
Eno re m’uketho jumanyir umeri.
4 Peya wacidh wakudi; waringi.
Ubimo utera i kusika pare!
Wek wabed ku mutoro man anyong’a negwa karacelo.
Wayung* kite m’inyutho ko mer nisagu ma juyungo ko pigulok.
Jumanyir umeri kara dre.
5 Atie col, ento a leng’, E nyi Yeruzalem,
atie calu hema mi Kedar, man calu bongu mi hema pa Suleman.
6 Kud wunena ku zungo pilembe nia a col,
kum ceng’ re m’uwang’a.
Ng’eicwiny unego wot maa i kuma;
e giketha ni jakur podho mir ulok,
ento podho mir ulok para gira alund akuro ngo.
7 E in m’ameri lee,
kenyuth ira kaka m’ibed ikwayu lim peri i iye,
kaka m’ibed iketho giyom i iye dieceng’.
Pirang’o ukwayu awoth i kind udul lim mi jurimbi calu dhaku m’uum ku bongu?”*
8 “Kan ing’eyo ngo, E in m’i leng’ lee nisagu mon mange ceke,
lub batiend udul lim
man kway nyithi diegi peri ceng’ini ku hema mi jukwac.”
9 “Nyaramara para, i leng’ ve vong’ kana i kind magali pa Farao.
10 Limbi leng’ ku jamruko,*
ng’uti de leng’ ku tigo m’udhoke.
11 Wabiyiko iri jamruko* mi mola ma kwar
ma juruko ku mola ma tar.”
12 “Kinde m’ubimo ubedo i dhu meza pare ma ngulu ngulu,
ng’wic mo para ma ng’ar uroc.*
13 Jamerna bedo ira calu usau ma ng’wice ng’ar mi mira*
m’uvuto diewor traka i kind thunona.
14 Jamerna tie ira calu njuru thiw ina
i kind ulok mi En-gedi.”
15 “Kenen! i leng’, nyaramara para.
Kenen! i leng’. Weng’i calu wang’ akuru.”
16 “Kenen! in de i leng’ jamerna, man inyang’a dit!
Kavuto mwa tie ith uboko ma numu.