Isaya
1 Gin ma wok i wang’ ma Isaya* ma wod Amoz uneno pi Yuda man pi Yeruzalem i rundi pa Uzia, Yotham, Ahaz, man Hezekia, ma gi jubim mi Yuda:
2 Winji, Ee polo, man cik ithi, Ee ng’om,
Kum Yehova udaru yero kumae:
“Aketho wot udongo man atungogi,
Ento gidaru jai ira.
3 Thwon dhiang’ ng’eyo cuu ng’atu m’ung’iewe,
Man kana ng’eyo wer ma won miyo ire cam i iye;
Ento Israel ung’eya ngo,*
Dhanu para ma buu gibetimo lembe ku rieko ngo.”
4 Can iwi thek ma judubo,
Dhanu ma kier unuro,
Kodhi mi jutimrac, awiya m’ugondiri!
Gidaru weko Yehova;
Giworo ngo Ng’atu ma Leng’ mir Israel;
Giloko ng’eygi ire.
5 Calu ma wubemedo jai mwu asu e, jubigoyowu dong’ kendo kani?
Wiwu zoo uberemo,
Man adundewu zoo ubetwoyo.
6 Kaka ma leng’ acel de mbe niai i the tiendwu nitundo i die wiwu.
Wutie ku rem man kaka m’uluny, man rem ma nyen
Ma juthiedho ngo,* jutwiyo ngo wang’gi, kadi juyomo de ngo wang’gi ku mo.
7 Ng’om mwu tie uvuru.
Adhura mwu juwang’u ku mac.
Juwirok uberamu ng’om mwu de i weng’wu.
Etie calu ng’om ma juwirok unyotho.
8 Juweko Nyasayuni calu otbak i podho mir ulok,
Calu otkur i podho mir ukuju,
Calu adhura ma judaru tieko.
9 Ka nwang’u Yehova mir udul uweko ngo iwa dong jumoko m’uboth,
Eni nwang’u wadoko tap calu Sodoma,
Man nwang’u wadoko rom ku Gomora.
10 Wuwinj wec pa Yehova, wu rwodhi ma weg adici mi Sodoma.
Wucik ithwu i kum cik* pa Mungu mwa, wu dhanu mi Gomora.
11 “Lam mwu ma dupa konyne ang’o ira?” Yehova wacu.
“Adaru ol ku lam m’awang’a mwu mi nyogi rombe man mi miyo mi leya mwu m’ucamu cuu.
Anyong’a nega ngo i kum rimb nyithi thwoni dhieng’, man nyithi rombe ku diegi.
12 Kinde ma wubino ninyuthuru i wang’a,
Ng’a m’ukwayuwu
Nia wunyon lelagang’ para?
13 Wuwek nikelo girathiera moko ci mi nying cam ma tijgi mbe.
Adagu udok mwu ma ng’wice ng’ar,
Por pa dwi, sabatu, lwong’o mi coko ma dongo;
Aromo ciro ngo coko mwu ma dongo ma ke wubetiyo ku lembajoga.
14 Adagu* por pa dwi mwu man foc mwu.
Gidoko ni ter ma pek ira;
Adaru ol* ku yeyogi.
15 Kinde ma wuthang’u cingwu,
Akanu wang’a iwu.
Kadok nwang’u wuberwo wang’ dupa de,
Awinjo ngo;
Cingwu upong’ ku rimo.
16 Wujom, wudwokuru leng’;
Wukab timo mwu ma reco cen kud i wang’a;
Wuwek nitimo lembe ma reco.
17 Wuponj nitimo lembe ma beco, wuyeny bedopwe,
Wutwiny ng’atu m’usendojo,
Wucer ba twero pa nyathikic,*
Man wucung i kum dhatho.”
18 “Dong’ kawoni wubin, man wayiku lembe udok atira i kindwa,” Yehova wacu.
“Kadok nwang’u dubo mwu kwar ngbo de,
Gibidoko tar calu pei;
Kadok nwang’u gi kwar ngbo calu rimo de,
Gibidoko tar calu yuk rombe.
19 Tek wutie ayika man wuwinjo,
Wubicamu piny ma beco mi ng’ombuni.
20 Ento tek wukwero man wujai,
Palamularu bimvorowu,
Kum dhu Yehova udaru yero lembene.”
21 Adhura m’ugwoko bedoleng’ udoko ndhu won asara ba!
Nwang’u bedopwe upong’ i iye;
Bedopwe ubed ubedo i iye.
Ento kawoni gi junek.
22 Mola peri ma tar udoko ni ceth cuma,
Man kong’o* mwu ujebere ku pii.
23 Judongo ma wijo mwu gi juthwon man gi ju wagi jukwo.
Gin ceke gimaru kanyaka man girwokini i tok giramiya.
Gipoko ngo lembe pa nyathikic* atira,
Man lempido pa dhatho de tundo ngo nyanok de i bang’gi.
24 Pieno Rwoth mandha ma Yehova mir udul,
Ng’atu ma Tek mir Israel uyero kumae:
“Ah! abikabu judhoga cen,
Man abiculo kwor i kum judegi para.
25 Abiloko cinga i kumi,
Abiloyo ceth cuma peri calu ve ku sabuni
Man abikabu cilo peri kpo.
26 Abidwogo jupoklembe peri calu mir acaki
Man jumii juk peri calu m’ebino ku kwong’a.
I ng’ey maeno jubilwong’i nia Adhura mi bedopwe, Pacu m’ugwoko bedoleng’.
27 Jubiwaru Sayuni ku pokolembe m’atira,
Man dhanu pare m’udwogo ku bedopwe.
28 Jubirungo jujai ku judubo karacelo,
Man ju m’uweko Yehova gibithum.
29 Kum lewic bimakujo pi yen ma tek ma wuketho cwinywu i kume,
Man ava podho* ma wung’iyo de wun biai i kumwu.
30 Pilembe wubidoko calu yen ma dit ma ithe thwo,
Man calu podho ma pii mbe i iye.
31 Nico ma tek bidoko calu thondh saki,
Man tic pare ni lebmac,
Gin ario zoo gibiwang’ karacelo,
Ma ng’atu moko mbe ma binego maje.”