Isaya
3 Kum nen! Rwoth mandha ma Yehova mir udul
Ubekabu kud i Yeruzalem man kud i Yuda kwond piny ceke ma jujengiri i wiye man kony,
Kony ceke mi mukathi man mi pii,
2 Jarukara man jaramony,
Japoklembe man jabila, jaewlembe man jadit,
3 Jatelwic mi dhanu pier abic, won yung man jamii juk,
Jabodho mi lembajoga man jabodho mi timo thangu.
4 Abiketho nyithindh awiya ma co ni judongo ma wijo migi,
Man dhanu ma wigi piw piw* re ma bibimo wigi.
5 Dhanu bisendiri i kindgi,
Ng’atuman ku wadi.
Nyathin ma nico bisayu ali i dhu jadwong’,
Man ng’atu ma kony pare mbe bicido ng’atu ma juworo awora.
6 Ng’atuman bimaku umin i ot pa won man ebiwacu ire kumae:
“Itie ku koti, dong’ bed jatela mwa.
Bim wi udhuru maeni ma jurwombo.”
7 Ento ebijai i nindo nica kumae:
“Abibedo ngo jathiedh rem mwu;
Ambe ku cam kadi bongu i ot para.
Kud wuketh abed jatela mi dhanu.”
8 Kum Yeruzalem ukier,
Man Yuda udaru podho,
Pilembe gijai ni Yehova i wec man i timo;
Gibetimo lembe ku cac i wang’ dwong’ pare.
9 Kite ma wang’gi nen ko ubetuco lembe i kumgi,
Man gibetwong’o dubo migi calu Sodoma;
Gibeii ngo nikane.
Can i wigi,* kum gibekelo nyoth i wigi gigi!
10 Yer ni weg bedopwe nia lembe biwotho ber igi;
Gibinwang’u sukulia pi gin ma gibetimo.*
11 Can iwi jatimrac!
Nyoth biwok i wiye,
Kum gin ma cinge timo re ma jubitimo i kume!
12 Juwitic mi dhanu para ubesendogi,
Man mon re m’ubebimo wigi.
Dhanu para, jutelwic mwu uketho wubewotho swa,
Man gibenyotho yo m’ukwayu wukwany.
13 Yehova uai malu pi nidoto adote;
Man ecungo pi nipoko lembe iwi dhanu.
14 Yehova bimondo i pokolembe ku judongo man judongo ma wijo mi dhanu pare.
“Wudaru wang’u podho mir ulok,
Man piny pa jacan ma wukwalu n’i udi mwu.
15 Ng’a m’umiyo iwu twero mi rungo dhanu para
Man mi rego wang’ jucan i utur?” Rwoth Ubimo ma Malu Ngbir Yehova mir udul uwacu.
16 Yehova uwacu kumae: “Calu ma Nyisayuni gibeting’iri,
Gibewotho ma gitworo wigi malu,*
Gibebidhojo ku wang’gi, gibethindho woth athindha ku doro,
Man gibeyengo ngara ku ng’udi tiendgi,
17 Yehova bicoro bende gwenyo i die wi Nyisayuni,
Man Yehova bilielo terwang’gi lelele.
18 I nindo maeca,Yehova bikabu leng’o mi gwang’ migi,
Jamtwiyo wic, jamruko mir ayi pa dwi,
19 Lengethu,* mangil, man kithambala,
20 Jamruko mi wic, gwang’ mi ng’udi tielo, thondh pier,
Cupa mir udok ma ng’wice ng’ar, man rigi,*
21 Lagith mi nyig cing’jo man lengethu mi um,
22 Kanzu mi ceng’ ma dwong’, bongu ma jubolo iwi wagi, man usau,
23 Maraya mi cing’, bongu ma nwang’,*
Jamboyo wic ma segi, man kithambala.
24 Kaka moj balsam, ng’wic piny m’utop re ma bibedo nuti;
Kaka mukaba, uno re ma bibedo nuti;
Kaka yukwic ma juruko ma leng’, wic m’uwang’ re ma bibedo nuti;
Kaka kendi ma beco, kendi mi saki re ma bibedo nuti;
Man kaka leng’o, poyo re ma bibedo nuti.
25 Co peri bitho ku palamularu,
Man co peri ma jurukara bitho i lwiny.
26 Kamondo mi Sayuni biwak man ebicur,
Man ebibedo thathara i ng’om ma en uvuru.”