Isaya
29 “Can iwi Ariel,* Ariel m’adhura ma Daudi uketho kagonjo i kume!
Mediri kubang’ oro;
Wek foc ceke umedere ameda.
2 Ento abikelo masendi iwi Ariel,
Man lemcan ku wak bibedo nuti,
Man ebidoko ira calu kaka ma juwang’u piny i iye iwi pemlam pa Mungu.
3 Abiketho kagonjo i kumi i ng’eti tingili,
Man abitieki ku gang’
Abiting’o jamlwiny mi maku adhura i kumi.
4 Jubijwigi;
Ibiweco niai kud i ng’om,
Man utur bimwonyo lembe m’ibeyero.
Dwendi biai kud i ng’om
Calu dwand ju ma weco ku tipo,
Man wec peri biwinjere nyamuru muru niai kud i utur.
5 Udul mi judegi* peri bidoko calu mogo ma yom,
Udul mi weg adici bidoko tap calu cung piny ma yamu leko.
Ebitimere ndhu ndhu man rek.
6 Yehova mir udul bipoy piri
Ku morpolo, digidi, man woy ma dit,
Kud avuvu, vira, man mac ma wang’u piny ruk.”
7 E udul mi thek ceke m’ubekiedo lwiny i dhug Ariel,
Ju ceke ma gibekiedo lwiny i dhoge,
Ma giguro ot ma wiw mi maku adhura i kume,
Ju m’ubekelo masendi i wiye,
Gibidoko calu lek, gin ma wok i wang’ mi diewor.
8 Eyo, ebibedo tap calu ng’atu ma kec ubenego m’ubeleko nia ebecamu,
Ento eai ma kec ubenege,*
Man calu ng’atu ma rieu ubenego m’ubeleko nia ebemadhu,
Ento eai m’eol man ma rieu ubenege.*
Eno tie gin ma bitimere i kum udul mi thek ceke
M’ubekiedo lwiny i dhu Got Sayuni.
9 Wubed ku zungo man iwu uwang’ lii;
Wudwokuru abinga man wubed abinga.
Gimer, ento ku pigulok ungo;
Gibethambini, ento ungo nikum kong’o ma lake tek.
10 Kum Yehova ukonjo tipo mi nindo ma pek i wiwu;
Etwiyo weng’wu, wu jubila,
Man eumo wiwu, wu juewlembe.
11 Gin ma wok i wang’ ceke udoko iwu calu wec m’i buku ma jumwono dhoge. Kinde ma jumiye i bang’ ng’atu m’ung’eyo somo piny, ma jubeyero kumae: “Wakweyi, kesom gin maeni ku dwendi ma tek,” ebidwoko kumae: “Acopo some ngo, kum jumwono dhoge.” 12 Man kinde ma jumiyo bukune i bang’ ng’atu moko m’ung’eyo somo ngo piny, ma jubeyero kumae: “Wakweyi, kesom piny ma e,” ebidwoko kumae: “Ang’eyo somo ngo piny zoo de.”
13 Yehova uyero kumae: “Dhanu maeni gibecoro i bang’a ku dhoggi
Man gibeyunga ku dend dhoggi,
Ento adundegi ni bor kuda;
Man lworo ma gibelwora ko ucungo iwi cik mi dhanu ma juponjo kogi.
14 Pieno, an re m’atie Ng’atu ma bitimo kendo
Lembe ma wang’u ijo ni dhanu maeni, udu iwi udu;
Man rieko mi jururieko migi bithum
Man nyang’ i lembe mi dhanu migi ma riek bipanere.”
15 Can iwi ju ma ii ku kero migi ceke pi nikanu lembe ma gipangu* ni Yehova.
Gitimo lembe migi i mudho
Ma gibeyero kumae: “Ng’a m’ubenenowa?
Ng’a m’ung’eyo piwa?”
16 Wubenyotho lembe dong’ magwei!*
Nyo ubekwayu junen jacwii agulu rom rom kud ulobo?
Nyo gin ma jucwiyo romo yero ni jacwiye kumae:
“Ecwiya ngo”?
Nyo piny ma juyiko romo yero pi jayike kumae:
“Eng’eyo ngo gin moko nyanok de”?
17 Edong’ nyanok ci Lebanon bidoko calu podhoyen ma cego nyinge,
Man podhoyen ma cego nyingene jubinene calu luli.
18 I nindo maeca, udhing’ biwinjo lembe mi bukune,
Man abinga bineno piny niai kud i mudho man piny m’ucido.
19 Ng’atu ma mol bibedo kud anyong’a lee mandha nikum Yehova,
Man jacan m’i kind dhanu bibedo kud anyong’a nikum Ng’atu ma Leng’ mir Israel.
20 Kum won adici bibedo mbe kendo,
Jakuhaya de bitundo i ajikine,
Man jubinyotho ju ceke m’ubemediri nibedo ayika pi nitimo racu,
21 Ju ma ketho kosa iwi jumange ku wec mi ndra,
Ma ciko uwic ni jacer bang’jo* i dhugang’ mir adhura,
Man ma tiyo ku wec ma iye nanu pi nitwono won bedopwe ku pokolembe m’atira.
22 Pieno, Yehova ma tie Ng’atu m’uwaru Abraham uyero ni ot pa Yakobo kumae:
“Lewic binego ngo Yakobo kendo,
Man wang’e de bidoko ngo foo* kendo nyanok de.
23 Kum kinde m’ebineno awiya pare,
Ma gi tic mi cinga i kindgi,
Gibidwoko nyinga leng’;
Eyo, gibidwoko Ng’atu ma Leng’ pa Yakobo leng’,
Man gibicungo ku lworo pi Mungu mir Israel.
24 Ju m’ukier i tipo gibinyang’ i lembe,
Man ju m’ubeng’ur gibiyiyo ponji.”