Isaya
31 Can iwi ju m’uloro i Misiri pi nisayu kony,
Ju m’ujengiri iwi riuni,*
Ju m’ugeno magali mi lwiny pilembe wendgi lee,
Man riuni mi lwiny* pilembe gi tek.
Ento gibeneno ngo ba Ng’atu ma Leng’ mir Israel,
Man gibesayu ngo kaka Yehova.
2 Ento en bende e riek man ebikelo can,
Man ebigamu ngo lembe pare.
Ebiai malu i kum ot mi jutimrac
Man i kum ju m’ubekonyo jutimrac.
3 Jumisiri gi dhanu ma dhanu, gi Mungu ngo,
Riuni migi tie mi ring’kum, ento mi tipo ngo.
Saa ma Yehova birieyo cinge,
Ng’atu moko ci m’umiyo kony bikier
Man ng’atu moko ci ma jukonyo bipodho;
Gin ceke gibithum saa ma rom.
4 Kum Yehova uyero ira kumae:
“Tap calu m’umvor, niwacu nyathin umvor ma tek* rundo ko iwi cam pare,
Kinde ma jucoko ungu mi jukwac zoo i dhoge,
Man lworo make ngo pi dwandgi,
Kume de miel ungo pi woy migi,
E Yehova mir udul de biloro kumeno pi nikiedo lwiny
Iwi Got Sayuni man iwi ungulu gode.*
5 Calu ma winyo riebiri ko iwi udigi, Yehova mir udul bende bicero ba Yeruzalem kumeno.
Ebicero bang’e man ebibodhe.
Ebikane man ebilare.”
6 “Wudwog i ba Ng’atu ma wujai ire ku rac, Ee dhanu mir Israel. 7 Kum i nindo maeca, ng’atuman bibayu mungu pare mi mola ma tar ma tijgi mbe man mungu pare mi mola ma kwar ma kony migi mbe, ma cingwu re m’uyiko, eno dubo.
8 Man Jaasiria bipodho i lak palamularu mi dhanu ngo;
Man palamularu mi dhanu ngo bimvore.
Ebiringo nikum palamularu,
Man jubidiyo awobi pare i tic mir adici.
9 Cana pare birwinyo nikum lworo,
Man ndiri bimaku judongo ma wijo pare nikum yend abera,” Yehova wacu,
En ma der* pare n’i Sayuni man uka pare n’i Yeruzalem.