Isaya
45 Maeni tie lembe ma Yehova uyero ni ng’atu pare m’ewiro, niwacu Kuro,*
M’emaku cinge ma yor acwic
Pi nijwigo thek i wang’e,
Pi niyaku jamlwiny mi* jubim,
Pi niyabu dhugola ma yabere ario i wang’e,
Kara kud jucik dhugang’:
2 “Abitelo yo i weng’i,
Man abipoto ungulu gudi.*
Abituro dhugola mi mola nziki nziki,
Man abing’ondo riu mi cuma.
3 Abimiyo iri lonyo ma n’i mudho
Man lonyo ma jukanu kaka m’upondo,
Kara ing’ey nia an a Yehova,
Mungu mir Israel, m’ubelwong’i ku nyingi.
4 Pi jatic para ma Yakobo man Israel ma ng’atu m’ang’iyo,
Abelwong’i ku nyingi.
Abemiyo iri nying’ mi yung’, kadok ing’eya ngo de.
5 An a Yehova, man mange mbe.
Mungu mange mbe m’uweko an.
Abidwoki tek,* kadok ing’eya ngo de,
6 Kara dhanu ng’ey
Niai kaka ma ceng’ wok i iye nitundo kaka m’emwony i iye*
Nia ng’atu mange mbe m’uweko an.
An a Yehova, man mange mbe m’uweko an.
7 Acwiyo der man acwiyo mudho,
Aketho kwiyocwiny man akelo ruvwa;
An a Yehova, abetimo lembuno ceke.
8 Wu polo, wucwii koth niai malu;
Man wek afuru ukonj bedopwe.
Wek ng’om uyabere man uceg both,
Man wek eketh bedopwe uwok i saa ma rom.
An a Yehova, acwiye.”
9 Can iwi ng’atu ma nyayu piem* i dhu Jacwic pare,*
Kum etie kende kende adekle
I kind adekle mange m’ulal i ng’om!
Nyo ulobo copo yero ni Jacwii agulu* kumae: “Ibecwiyo ang’o?”
Kunoke nyo gin m’iyiko copo yero kumae: “Cingi mbe?”*
10 Can iwi ng’atu m’ubeyero ni wego kumae: “Inyolo ang’o?”
Man ni dhaku kumae: “Ibenyolo ang’o?”*
11 Yehova ma Ng’atu ma Leng’ mir Israel, ma Ng’atu m’ucwiye uwacu kumae:
“Nyo wucopo temo ninyayu piem i dhoga pi lembe mi nindo m’ubino
Man nimiyo cik pi wota man pi tic mi cinga?
12 Acwiyo ng’om man acwiyo dhanu i wiye.
Apedho polo ku cinga gira,
Man amiyo cik ni udul migi ceke.”
13 “Ating’o ng’atu moko i bedopwe,
Man abiketho yo pare ceke bicungo atira.
En re m’ebigiero adhura para
Man ebigonyo dhanu para ma jumaku i ng’eca m’umbe cul kadi kanyaka,” Yehova mir udul uwacu.
14 Yehova uwacu kumae:
“Sukulia* mi Misiri man jamkuloka* mir Ethiopia man Jusabea, ma gi dhanu ma boco boco,
Bibino i beng’i man bidoko peri.
Gibiwotho yor i ng’eyi ma jutwiyogi ku nyoro.
Gibibino man gibikulo korgi piny iri.
Gibirwo iri ma gibeyero kumae: ‘Mungu ni kudi andha,
Man mange mbe; Mungu mange mbe.’”
15 Andha itie Mungu m’upondo,
Ee Mungu mir Israel, Jalar.
16 Lewic bimakugi man jubicido gin ceke;
Ju ma yiko ayi gin m’acwiya ceke bicidho ku lewic.
17 Ento Yehova bibodho Israel ku both ma nja ku nja.
Wubibedo mbe ku lewic kadi acidi rondo ku rondo.
18 Kum Yehova ma Jacwii polo,
Mungu mandha, Ng’atu m’ucwiyo ng’om,
M’ucwiye man m’uketho ecungo ma tek,
M’ucwiye ngo mi mananu,* ento m’ucwiye kara jubed i wiye uwacu kumae:
“An a Yehova man mange mbe.
19 Aweco ngo ku kaka m’upondo i ng’om mi mudho;
Ayero ngo ni kodhi* pa Yakobo kumae:
‘Wuyeny kakara mananu.’
An a Yehova, ma yero lembe ma pwe man ma twong’o lembe m’atira.
20 Wucokuru karacelo man wubin.
Wucor karacelo, wu ju ma wuboth kud i kind thek.
Ju ma yeyo ayi gin m’acwiya m’ang’ika ging’eyo ngo gin moko,
Man ma girwo ni mungu ma copo bodhogi ngo.
21 Wuweci man wuyer lembe mwu.
Wuwinjuru karacelo i acel.
Ng’a m’ular uyero lembuni yang’ con
Man m’ular utwong’o lembene niai i rundi ma yang’ con?
Nyo utie ngo an a Yehova?
Mungu mange mbe m’uweko an;
Mungu ma pwe man ma Jalar, mange mbe m’uweko an.
22 Wulokuru i bang’a kara wubothi, wu tung’ ng’om ceke,
Kum an a Mungu, man mange mbe.
23 Akwong’o kwong’ an gira;
Wec m’uwok kud i dhoga utie lemandha,
Man ebitimere kakare:
Cong ceke birum ira,
Man leb ceke bikwong’o nia gibigwoko bedoleng’,
24 Man biyero kumae: ‘Andha bedopwe mandha man tego n’i Yehova.
Man ju ceke ma kwinyo uopo i igi i kume bibino i wang’e ku lewic.
25 Nikum Yehova, kodhi* pa Israel ceke binwang’u bedopwe,
Man gibiluliri nikume.’”