Isaya
47 Lor piny man ibed i utur,
Ee nyaku ma sumba mi Babeli.
Bed i ng’om kaka ma komker umbe i iye,
Ee Nyakaldayo,
Kum dhanu bilwong’i kendo ngo nyanok de nia ng’atu ma juweyo kume man ma jutadu wiye.
2 Ting’ kidirego man reg mogo.
Kab kithambala* peri.
Dol dhu bongu peri, yab wi tiendi.
Kadh loka pii.
3 Muneru peri bidong’ kamaleng’.
Lewic peri binen.
Abiculo kwor, man ng’atu moko mbe ma bicungo i wang’a.*
4 “Ng’atu m’ubewaruwa
Nyinge tie Yehova mir udul.
En e Ng’atu ma Leng’ mir Israel.”
5 Bed ling’ keca man mond i mudho,
Ee Nyakaldayo;
Ng’atu moko mbe ma bilwong’i kendo Dhaker.
6 Ng’eicwiny umaka i kum dhanu para.
Acido giralaga para,
Man amiyogi i cingi.
Ento kisa negi ngo i kumgi.
Iketho mberembere ma pek kadok iwi dhanu m’utii.
7 Igam iyero kumae: “Saa zoo abibedo Dhaker, nja ku nja.”
Igam ikwanu ngo ku lembuni;
Iparu ngo pir ayi ma lembene bijik ko.
8 Kawoni winj lembuni, Ee in m’imaru anyong’a,
M’ibedo museme, m’ibeyero i adundeni kumae:
“Ng’atu ma calu an umbe, man ng’atu mange mbe.
Abidoko ngo dhatho.
Man nyithindha bitho ngo nyanok de.”
9 Ento lembe ario ma e biwok i wii rek, i nindo acel:
Nyithindhi bitho man ibidoko dhatho.
Gibicoro bik i wii
Nikum* lembajoga peri m’usagu man kuroga peri ceke ma lake tek.
10 Igeno peri timo peri ma reco.
Iyero kumae: “Ng’atu moko mbe m’unena.”
Rieko peri ku ng’eyong’ec peri re m’uketho ikier,
Man iwacu i adundeni kumae: “Ng’atu ma calu an umbe, man ng’atu mange mbe.”
11 Ento can bibino i wii,
Man rigi peri acel de mbe ma bicere.*
Ruvwa bipodho i wii; man ibituc ungo niure.
Nyoth ma rek ma fodi ing’eyo ngo nyanok de biwok i wii.
12 Dong’ mediri ku kuroga man lembajoga peri m’usagu,
M’imiyiri i iye niai i aradu peri.
Saa moko nyo ibinwang’u sukulia moko;
Saa moko nyo ibinyayu ndiri i dhanu.
13 Iol kud udul jumii juk peri.
Dong’ giai malu kawoni man gibodhi,
Gi ju ma giworo polo* man ma ging’iyo nyikaluku,
Ju ma ka dwi upor giwodho ng’eyong’ec
Pi lembe ma biwok i wii.
14 Nen! Gi calu soka.
Mac biwang’ugi ruk.
Gicopo bodhiri ngo gin gigi* kud i tego mi lebmac.
Gitie ngo cugimac ma jumuro ko kum,
Man eni tie ngo mac ma juromo oyo.
15 Weg ajoga peri gibidoko iri kumeno,
Ju ma wumiyuru wukugi niai i aradu peri.
Gibiwotho swa, ng’atuman i yo pare.*
Ng’atu moko mbe ma bibodhi.