Isaya
51 “Wuwinja, wun ma wubelubo tok bedopwe,
Wun ma wubeyenyo Yehova.
Wunen bang’ cana ma jupayuwu kud i kume
Man bang’ vur ma jugolowu kud i iye.
2 Wunen bang’ Abraham ma wegwu
Man bang’ Sara m’unyolowu.
Kum saa m’alwong’e nwang’u etie kende;
Amiyo ire mugisa man aketho enyay.
3 Kum Yehova bijuko cwiny Sayuni.
Ebikelo jukocwiny ni uvurune ceke,
Man ebiketho langane bidoko calu Eden
Man pambu mi langane calu podho pa Yehova.
Anyong’a man mutoro binwang’ere i iye,
Dwoko foyofoc man dwal mi wer.
4 Wucik ithwu i bang’a, Ee dhanu para,
Man wuwinja, wu thek para.
Kum cik biwok kud i bang’a,
Man abiketho bedopwe para bicungo calu der ni dhanu.
5 Bedopwe para uwok ceng’ini.
Man both para biwok,
Man bota bipoko lembe mi dhanu.
Cula biketho genogen migi i wiya,
Man gibikuro bota.*
6 Wung’ay weng’wu i polo,
Man wukul wiwu wunen ng’om.
Kum polo bilal calu yiro;
Ng’om ke bitii calu bongu,
Man ju ma bedo i iye bitho calu jur.
Ento both para bibedo rondo ku rondo,
Man bedopwe para bithum ungo nyanok de.*
7 Wuwinja, wun ma wung’eyo bedopwe,
Wu dhanu ma cik* para n’i adundewu.
Anyware mi dhanu ma tho kud unyay lworo i iwu,
Man ayany migi kud ung’oy ndiri i iwu.
8 Kum rudho bicamugi tap calu bongu;
Rudho mi bongu* bimvorogi calu bongu mi yuk rombe.
Ento bedopwe para bibedo rondo ku rondo,
Man both para ni dhanu m’utuk ceke.”
9 Cew! Cew! Rony tego,
Ee bot Yehova!
Cew calu i nindo ma yang’ con, calu i kind dhanu m’utuk ma con.
Nyo in ungo re m’irungo Rahab* nziki nziki,
Man ituco i yedi ma dongo mi nami?
10 Nyo in ungo re m’idwono nam, pii ma lac man ma thuc?
Nyo in ungo re m’iketho nam ma thuc udoko ni ndaki kara ju ma juwaru ukadh kud i iye?
11 Ju pa Yehova ma juwaru bidwogo.
Gibimondo i Sayuni ku muzira,
Man anyong’a ma thum ungo bibedo i wigi.
Anyong’a ku mutoro bibedo migi,
Man can ku cur biringo cen.
12 “An re m’atie Ng’atu m’ubejuko cwinyi.
Dong’ pirang’o ibelworo dhanu ma tho ma bitho athoa e
Man wod dhanu ma bithwo calu lum ma numu?
13 Pirang’o ibewil ku Yehova ma Jacwic peri,
Ng’atu m’upedho polo man kathere mi ng’omi?
Man dieceng’ duu ibino ku lworo thiri thiri pi kwinyo pa ng’atu m’ubesendi,*
Geno ve etie ku copo mi nyothi.
Kawoni dong’ kwinyo pa ng’atu m’ubesendine ni kani?
14 Ceng’ini eni, jubigonyo ng’atu m’ugung’ nikum nyoro;
Ebitho ngo man ebiloro ngo i vur,
Mukathi pare de birem ungo.
15 Ento an a Yehova Mungu peri,
Ma tugo nam man ma ketho mujangane woy;
Yehova mir udul utie nyinge.
16 Abiketho wec para i dhogi,
Man abigeng’i ku tipo cinga,
Pi nipidho polo man pi niketho kathere mi ng’om
Man pi niyero ni Sayuni kumae: ‘In i dhanu para.’
17 Cew! Cew! Ai malu, Ee Yeruzalem,
In m’imadhu kikombe mi kwinyo m’uai kud i cing’ Yehova.
Imadhu kalisi;
Idaru kikombe ma ketho juwotho thamba thamba.
18 I kind wot ceke m’enyolo, acel de mbe m’utelo wiye;
Man i kind wot ceke m’etungo, acel de mbe m’umaku cinge.
19 Lembe ario maeni uwok i wii.
Kisa binego ng’a i kumi?
Nyoth kud uvuru, kec ku palamularu!
Ng’a ma bijuko cwinyi?
20 Woti gidaru voc.
Givuto i gund gengi ceke*
Calu rombe mi lum i voi.
Gipong’ ku kwinyo pa Yehova, ku cim pa Mungu peri.”
21 Dong’ akweyi, winj lembuni,
Ee in m’i dhaku m’ubetagu man m’umer, ento ku pig ulok re ngo.
22 Yehova ma Rwoth peri, Mungu peri m’ubecero bang’ dhanu pare uwacu kumae:
“Nen! abigamu kikombe m’uketho ithambini kud i cingi,
Kalisi, kikombe mi kwinyo para;
Ibimadhe ngo kendo nyanok de.
23 Abikethe i cing’ ju m’usendi,
Ju m’uwacu iri* kumae: ‘Vuti kara wawoth i die ng’eyi!’
E iketho ng’eyi doko calu ng’om,
Calu gengi igi kara giwoth i wiye.”