Isaya
58 “Kok ku dwendi zoo; kud iceriri!
Ting’ dwendi calu agwara.
Twong’ ni dhanu para jai migi,
Ni ot pa Yakobo dubo migi.
2 Gibesayu kakara kubang’ ceng’,
Man gibenyutho nia gitie kud anyong’a mi ng’eyo kite m’atimo ko lembe,
Calu ve gitie thek m’ubetimo lembe ma pwe
Man m’uweko ngo lembe m’atira pa Mungu migi.
Gibepenja pi pokolembe m’atira,
Ma gibefoyo ko nicoro ceng’ini i vut Mungu:
3 ‘Pirang’o ibeneno ngo kinde ma wabekwiro cami?
Man pirang’o ibeneno ngo kinde ma wabenyayu can i iwa?’*
Pilembe i nindo ma wukwiro cam, wulubo mwu yeny mwu giwu,*
Man wusendo ju mwu m’ubetimo tic ma tek.
4 Kwirocam mwu bethum ku teliri man kud ali,
Man wugoyojo ku ngumi mi jutimrac.
Ayi ma wubekwiro ko cam tin e copo ketho ngo dwendwu winjere i polo.
5 Nyo kwirocam m’ang’iyone bibedo kumeni,
Calu i nindo pa ng’atu m’ubenyayu can i iye,*
Pi nikulo wiwu piny calu usi,
Pi niketho kavuto pare iwi kendi mi saki man vuru?
Eno re ma gin ma wubelwong’o nia kwirocam man nindo ma nyayu anyong’a i Yehova?
6 Ungo, kwirocam m’ang’iyo ni e:
Nikabu kongo mi jutimrac,
Pi nigonyo jamtwic mi mberembere,
Pi niweko jasend ucidh gire,
Man nituro mberembere ceke bwa i diere;
7 Utie nipoko cam* ni ju ma kec ubenego,
Nikelo jucan man ju ma ot migi mbe i ot peri,
Nironyo ng’atu ma muneru kinde m’inene,
Man niloko ngo ng’eyi ni wat peri ma buu.
8 E der peri birieny calu mombwa,
Man ibikey pio pio.
Bedopwe bitelo yo i weng’i,
Man dwong’ pa Yehova bibedo jakur peri yor i ng’eyi.
9 E ibilwong’o, man Yehova bidwoko lembe;
Ibiwagu kony, man ebiyero kumae: ‘Anuti eni!’
Tek ikabu mberembere kud i kindwu
Man tek iweko nicimo piny ku lweti man niweco rac,
10 Tek imiyo piny ma in de imaru* ni ng’atu ma kec ubenego
Man iyeng’o ju m’ubetagu,*
E der peri birieny kadok i mudho,
Man mudho peri ma bii bidoko calu dieceng’.
11 Yehova bitelo wii kwa
Man ebiketho ibiyeng’* kadok i ng’om ngele;
Ebidwoko cogoni tek,
Man ibidoko calu podho ma pii romo ma ber,
Calu kulo ma pige dwono ngo nyanok de.
12 Jubigiero uvuru ma con kendo piri,
Man ibidwogo kathere mi dhanu m’utuk ma con kendo.
Jubilwong’o nyingi jayik gang’kidi m’urwombere,*
Jayik gengi ma juromo bedo i ng’ete.
13 Tek nikum Sabatu iceriri* nilubo tok yeny peri giri* i nindo para ma leng’,
Man ilwong’o Sabatu nia nindo mir anyong’a ma lee, nindo ma leng’ pa Yehova, nindo m’ukwayu juyungi,
Man iyunge kakare nilubo tok yeny peri giri man icoro ngo wec swa,
14 E ibinwang’u anyong’a ma lee i Yehova,
Man abiketho ibiringo kaka ma malu mi ng’om.
Abiketho ibicamu kum giralaga pa Yakobo ma kwarumiri,
Kum dhu Yehova re m’uweco.”