Isaya
59 Nen! Cing’ Yehova dungulu akeca ngo pi nibodho,
Kadi ithe de udhing’* ungo pi niwinjo.
2 Ungo, tie kosa mwu re m’upoko kindwu ku Mungu mwu.
Dubo mwu re m’uketho ekanu wang’e iwu,
Man ekwero niwinjowu.
3 Kum cingwu ucido ku rimo
Man lwetwu ke ku kier.
Dend dhogwu ubecwayu ndra, man lebwu ubeweco nyamuru muru pi gondiri.
4 Ng’atu moko mbe m’ubecero bang’ bedopwe,
Man ng’atu moko mbe m’ubecidho i kesi i lemandha.
Gibegeno lemandha ngo man gibeyero lembe ma tije mbe.
Gibegamu ic mi masendi man gibenyolo gin ma nyayu ret i kumjo.
5 Gitoko tong’ thwol ma jukwir,
Man gicwiyo thondh avaceng’.
Ng’atu moko ci m’ucamu tong’gi bitho,
Man tong’gi ma jung’enyo biwodho urobi.
6 Thondh avaceng’ migi bikonyo ngo ni kendi,
Kadi gibiumiri de ngo ku gin ma giyiko.
Tic migi nyayu ret,
Man timo migi mi rop n’i cing’gi.
7 Tiendgi gweth gweth pi nicitimo lembe ma rac,
Man gidhuliri pi nicwiro rimo pa ng’atu m’ukoso ngo.
Paru migi utie paru mi nyayu ret;
Nyoth ku can n’i yo migi.
8 Ging’eyo ngo yo mi kwiyocwiny,
Man lembe m’atira mbe i yo migi.
Giketho yo migi gondere;
Ng’atu ma tek uwotho i yo migi bing’eyo ngo kwiyocwiny.
9 Pi thelembe maeno re ma pokolembe m’atira ni bor kudwa,
Man bedopwe utundo ngo i bang’wa.
Wabemedara nigeno der, ento nen! Mudho re m’utie;
Wabemedara nigeno lero, ento wabewotho asu i mudho ma bii.
10 Wabemulo kor ot calu abinga;
Wabemulo piny calu dhanu ma wang’gi tho.
Wabekier ku dieceng’ ma tek calu ve i mudho mir uthieno;
Wa calu avu i kind dhanu ma tek.
11 Wan ceke wabemedara nirundo calu urudi
Man waberundo ku can calu akuru.
Wageno lembe m’atira, ento acel de mbe;
Wageno both, ento eni bor kudwa.
12 Kum jai mwa utie lee i weng’i;
Dubo mwa ceke ubetuco lembe i kumwa.
Kum jai mwa ni kudwa;
Wang’eyo cuu mandha kosa mwa.
13 Wakier man wakwero Yehova;
Waloko ng’eywa ni Mungu mwa.
Waweco pi masendi man jai;
Wapangu ndra man waweco nyamuru muru pi vupo i adundewa.
14 Judwoko pokolembe m’atira ku ng’eye,
Man bedopwe ucungo bor;
Kum lemandha ukier i akarayo,
Man lembe m’atira copo mondo ngo.
15 Lemandha urwinyo,
Man jubeyaku ng’atu moko ci m’ubelokere kud i kum lembe ma rac.
Yehova uneno lembuni man lembene nyang’e ngo,
Kum pokolembe m’atira mbe.
16 Eneno nia dhanu mbe,
Man iye wang’ lii nia ng’atu moko mbe m’ukwayu kwac.
Pieno bote re m’ukelo both,*
Man bedopwe pare re m’ujenge.
17 E eronyo bedopwe calu koti mi cuma
Man eronyo sabu mi both* i wiye.
Eronyo kendi mi culo kwor
Man etukere kud amora calu koti.*
18 Ebimiyo sukulia igi pi gin ma gitimo:
Ng’eicwiny ni judhoge, matira ni judegi pare.
Man ni cula ebimiyo cul ma giromo ko.
19 Niai yo ka ma ceng’ mwony i iye, dhanu bilworo nying’ Yehova;
Man niai ka ma ceng’ wok i iye, dwong’ pare.
Kum ebibino calu pii m’ucorere
Ma tipo pa Yehova re m’ucwalu.
20 “Jawar bibino i Sayuni,
I bang’ dhanu pa Yakobo ma gilokiri kud i kum kier,” Yehova wacu.
21 “Ento pira an, maeni tie lembariba para kugi,” Yehova wacu. “Tipo para ma n’i wii man wec para m’aketho i dhogi gibiai ungo kud i dhogi, kud i dhug awiya* peri, kadi kud i dhu nyikweyi,”* Yehova wacu, “niai kawoni man rondo ku rondo.”