Isaya
7 I rundi p’Ahaz ma wod Yotham ma wod Uzia m’ubimo mi Yuda, Ubimo Rezin mi Siria giku Peka ma wod Remalia m’ubimo mir Israel, giidho pi nikiedo lwiny i dhu Yeruzalem, ento make uwok uvoyogi.* 2 E junyutho ni ot pa Daudi kumae: “Siria udikere karacelo kud Efraim.”
Man adunde Ahaz kud adunde dhanu pare ucaku miel, calu ma yamu yengo ko yen mi luli.
3 Yehova ugam uyero ni Isaya kumae: “Akweyi, cidh iromb kud Ahaz, in ku wodi ma Cear-yacub* kaka ma yoj pii mi kut ma malu ujik i iye i kum gengi ma dit ma n’i ng’et podho pa jalwok bongu. 4 Wok iyer ire kumae: ‘Nen nia ikwiyo kumi. Lworo kud unegi man cwinyi kud utur nikum dund yen ario maeni m’ubedunyo yiro, nikum ng’eicwiny ma lake tek pa Rezin, pa Siria man pa wod Remalia. 5 Kum Siria kud Efraim man wod Remalia gicamu gamba i kumi, giwacu kumae: 6 “Waidhu i kum Yuda man wayecu iye,* wamekue* iwa, man wakethu wod Tabel ni ubimo i wiye.”
7 “‘Rwoth Ubimo ma Malu Ngbir Yehova uwacu kumae:
“Lembene birombo ngo,
Ebitimere de ngo.
8 Kum wi Siria tie Dameski,
Wi Dameski ke tie Rezin.
I kind oro pier abusiel wi abic tap ci,
I Efraim bikethere ceke man ebijigo nibedo thek.
9 Wi Efraim tie Samaria,
Man wi Samaria ke tie wod Remalia.
Ka yiyoyic mwu tek ungo,
Wubicungo ngo ma tek.”’”
10 Yehova umedere niweco i bang’ Ahaz, eyero kumae: 11 “Kway giranyutha i bang’ Yehova Mungu peri; ecopo bedo thuc calu Liel* kunoke lir lir calu polo.” 12 Ento Ahaz uyero kumae: “Abikwayu ngo, kadi abiketho de ngo Yehova i amulaic.”
13 E Isaya uwacu kumae: “Akwayuwu, wuwinji, Ee ot pa Daudi. Nyo twiyocwiny mi dhanu e de fodi uromowu ngo, ma wumito bir twiyocwiny pa Mungu ngi e? 14 Pieno Yehova en gire bimiyo iwu giranyutha ma e: Nen! nyaku m’aradu binwang’u ic man ebinyolo nyathin ma nico, man ebicaku nyinge Emanuel.* 15 Ebicamu cak m’umakere ma nwang’ man miyokic i wang’ nicaku ng’eyo kite m’eromo kwero ko gin ma rac man ning’iyo gin ma ber. 16 Kum i wang’ ma nyathi jalawobine ung’ey ayi mi kwero gin ma rac man mi ng’iyo gin ma ber, ng’om mi jubim ario m’unyayu ndiri i ii bidong’ kende. 17 Yehova bikelo i wii, iwi dhanu peri, man iwi ot pa wuru kit rundi ma tek ma fodi uwok ungo niai i nindo ma Efraim upokere ku Yuda, pilembe ebikelo ubimo mir Asiria.
18 “I nindo maeca, Yehova bilwong’o ulwang’ini ku lwiyo niai bor i jang kulo Nil mi Misiri man kic niai kud i ng’om mir Asiria, 19 man gin ceke gibibino gibiwopiey i dhu longoro,* iwi cana m’ukak, iwi vunga ceke mir ukudho, man kaka ceke ma pii n’i iye.
20 “I nindo maeca, Yehova bigobo yukwic ku yir mi kor tielo, man ebigobo bende yir mi tik ku riedi m’apanga m’uai yo loka Kulo* nikadhu kud i bang’ ubimo mir Asiria.
21 “I nindo maeca, jubigwoko nyathi dhiang’ acel mi dwol man rombe ario. 22 Man jubicamu cak m’umakere ma nwang’, pilembe cak bipong’ bik, kum dhanu ceke ma bidong’ i ng’ombe bicamu cak m’umakere ma nwang’ man miyokic.
23 “I nindo maeca, kakare ceke ma yend ulok elufu acel (1 000) ubedo i iye, ma valer migi tongolo mi mola ma tar elufu acel, yend ukudho m’udinyo ku doy kende re ma bibedo nuti. 24 Dhanu bicidho keca kud athero man kud atumb athero, pilembe ng’ombe ceke bipong’ ku yend ukudho m’udinyo man doy. 25 Jubicoro ngo ceng’ini ku gudi ceke ma jubed jujwero ku kwer pi lworo mi yend ukudho m’udinyo man doy; gibidoko ni luba ma thwoni dhieng’ camu i iye man kaka ma rombe wotho i iye.”