Isaya
8 Yehova ugam uyero ira kumae: “Ting’ ban ma lac man kiew wiye ku kalamu ma nja* eni kumae: Maher-calal-hac-baz.* 2 Wek aketh juyiye nikadhu kud i gor* mi jumulembe mandha, niwacu Uria ma jalam man Zekaria ma wod Yeberekia.”
3 E avuto ku* jabila ma dhaku* man egamu iye, e i ng’eye enyolo nyathin ma nico. Yehova ugam uyero ira kumae: “Cak nyinge Maher-calal-hac-baz, 4 kum i wang’ ma nyathi jalawobine ung’ey nilwong’o nia ‘baba!’ man ‘mama!’ jubicoko lonyo mi Dameski man jambayeki mi Samaria jubitero i wang’ ubimo mir Asiria.”
5 Yehova uyero ira kendo kumae:
6 “Calu ma dhanu maeni gikwero pii mi Ciloa* m’ubemol yoo
Man gifoyo migi Rezin giku wod Remalia,
7 Pieno nen! Yehova bikelo i kumgi
Pii ma tek man ma lac mi Kulo,*
Ma en e ubimo mir Asiria man dwong’ pare ceke.
Ebiidho iwi jang pige ceke
Man ebidhir i dhoge zoo
8 Man ebicorere i Yuda.
Ebipong’e, ebikadhu kud i iye, man ebiidho nitundo i ng’utjo;
Vombe m’ebiyaru bipong’o kalac mi ng’ombe zoo,
Ee Emanuel!”*
9 Wunyay peko, wu dhanu, ento jubirungo iwu nziki nziki.
Wuwinji, wun ceke ma wuai i theng ng’om ma bor!
Wuyikuru pi lwiny,* ento jubirungo iwu nziki nziki!
Wuyikuru pi lwiny, ento jubirungo iwu nziki nziki!
10 Wupang lembe, ento jubiranye!
Wuyer lembe ma wubemito, ento ebirombo ngo,
Kum Mungu ni kudwa!*
11 Maeni tie gin ma Yehova uyero ira, ma cinge ma tek n’i wiya pi nijuka kara kud akwany bang’ timo mi dhanu maeni:
12 “Gin ma dhanu maeni ubelwong’o nia gamba, wun kud wulwong’ nia gamba!
Kud wulwor gin ma gibelworo;
Kumwu de kud umiel pi lembene.
13 Yehova mir udul re m’utie Ng’atu ma wucikuru nineno nia tie leng’,
En re m’etie Ng’atu ma wucikuru nilworo,
Man en re m’etie Ng’atu ma kumwu ucikere nimiel pire.”
14 Ni udi ario mir Israel
Ebidoko calu kabedo ma leng’,
Man bende calu kidi ma twangujo
Man cana ma ketho jukier;
Ni ju ma bedo i Yeruzalem ke,
Ebidoko calu voi man uwic.
15 Ju dupa m’i kindgi bikier, gibipodho man gibitur;
Gibimoko i uwic man jubimakugi.
17 Abimedara nikuro* Yehova m’ubekanu wang’e ni ot pa Yakobo, man abigeno en.
18 Nen! an kud awiya ma Yehova umiyo ira watie i Israel calu giranyutha man udu m’uai i bang’ Yehova mir udul ma bedo iwi Got Sayuni.
19 Man tek giyero iwu kumae: “Wupenj ju ma weco ku tipo kunoke juewlembe ma mung’ amung’a man weco nyamuru muru,” nyo dhanu ucikiri ngo nipenjo lembe i bang’ Mungu migi? Nyo ubekwayu gipenj ju m’utho pi ju ma kwo? 20 Cik man lembe m’uyiyere ma jugoro* re ma gicikiri nipenjo!
Ka gibeyero lembe m’urombo ngo ku wec maeni, gibibedo mbe ku der.* 21 Ng’atuman bikadhu kud i ng’ombe m’ebesendere man ma kec ubenege; man calu ma kec ubenege, ng’eicwiny de n’i iye, ebilamu ubimo pare man Mungu pare m’etworo wiye malu. 22 I ng’eye ebineno ng’om, re ebineno kende kende masendi ku piny m’ucido, piny ma col bii man saa ma lembe tek i iye, mudho ku der m’umbe.