Isaya
10 Can iwi ju ma wodho cik mi timojo rac,
Ma saa zoo gikiewo cik mi sendojo,
2 Pi nicero jucan ku twero migi,*
Pi nitwono ju ma thindho m’i kind dhanu para ku pokolembe m’atira;
Gibeyaku ko montho
Gibekwalu ko nyithikic!*
3 Wubitimo ang’o i ceng’ mi matira,*
Kinde ma nyoth biai ku bori?
Wubiringo i bang’ ng’a pi ninwang’u kony,
Man wubiweko lonyo* mwu kani?
4 Gin ma bidong’ ma wuromo timo bibedo kende kende ninyongo i kind ju ma jutwiyo,
Kunoke nipodho i kind ju ma junego.
Pi lembuno zoo, ng’eicwiny pare uloko ngo ku ng’eye,
Ento cinge tie asu arieya pi nigoyo.
5 “Aha! Jaasiria:
Uluth mi nyutho kwinyo para
Man undoy m’i cing’gi mi nyutho ng’eicwiny para ma lake tek!
6 Abiore i kum thek m’ujai,
I kum dhanu m’unyayu ng’eicwiny i iya;
Abing’olo ire nia eyakgi lee man ekwalgi lee
Man ewoth i wigi calu usabu mi gengi.
7 Ento nen pare bibedo ngo kumeno
Man ebipangu ngo kumeno i adundene;
Kum ekeco i adundene ninyotho
Man nikabu thek dupa, nyanok ungo.
8 Kum eyero kumae:
‘Nyo judongo ma wijo para ceke gitie ngo jubimi?
9 Nyo Kalno tie ngo tap calu Karkemic?
Nyo Hamath tie ngo calu Arpad?
Nyo Samaria tie ngo calu Dameski?
10 Cinga umaku ker mi mungu ma tijgi mbe,
Ma ayi gin m’acwiya migi m’ang’ika upong’ nisagu mi Yeruzalem ku mi Samaria!
11 Nyo abitimo ngo bende i kum Yeruzalem man i kum ayi gin m’acwiyane
Tap gin m’atimo i kum Samaria man i kum mungune ma tijgi mbe?’
12 “Kinde ma Yehova bidaru tic pare ceke iwi Got Sayuni man i Yeruzalem, ebimiyo* matira ni ubimo mir Asiria pi cac mir adundene man kuhaya pare ku doro m’i wang’e. 13 Kum eyero kumae:
‘Abitimo lembuni ku tego mi cinga
Man ku rieko para, kum a riek.
Abikabu kieu mi dhanu
Man abiyaku lonyo migi
Man abidiyo ju ma bedo i iye calu ng’atu ma tek.
14 Calu ng’atu m’uberoyo cinge i odiwinyo,
Cinga bimaku lonyo mi dhanu;
Man calu ng’atu m’ubecoko tong winyo ma juweko,
Abicoko ng’om zoo!
Ng’atu acel de mbe ma bipadu vombe kadi ma bing’amu dhoge kunoke ma bikok.’”
15 Nyo lei bihayere iwi ng’atu m’ubeng’ondo kude piny?
Nyo sii bihayere iwi ng’atu m’ubekaku kude piny?
Nyo undoy romo yengo ng’atu m’ubeting’e?
Kunoke nyo uluth copo ting’o ng’atu ma tie ngo yeni?
16 Pieno Rwoth mandha ma Yehova mir udul
Biketho dhanu pare m’ucwey bimok,
Man ebicwinyo mac m’ugagini i the dwong’ pare.
17 Der mir Israel bidoko mac,
Man Ng’atu ma Leng’ pare bidoko lebmac;
Ebiliel man ebiwang’u doy pare man yend ukudho pare m’udinyo nindo acel kende.
18 Ebinyotho dwong’ mi luli pare man podhoyen pare ma cego nying’gi zoo;
Ebibedo calu ma tego thum ko i kum ng’atu m’utwoyo.
19 Dong yen mi luli pare
Bidong’ nyanok mandha ma nyathin de copo kiewo wendgi.
20 I nindo maeca, dong ju m’udong’ mir Israel
Man ju m’uboth mi ot pa Yakobo
Gibijengiri ngo kendo iwi ng’atu m’ugoyogi;
Ento gibijengiri iwi Yehova,
Ma Ng’atu ma Leng’ mir Israel ku gwoko bedoleng’.
21 Donge kende re ma bidwogo,
Niwacu dong Yakobo, i bang’ Mungu ma Jatego.
22 Kum kadok dhanu peri, Ee Israel,
Gipong’ calu nying kwiyo m’i nam de,
Dong’gi kende re ma bidwogo.
Judaru ng’olo nia gibithum pet,
Man bedopwe* bimwonyogi.
23 Eyo, lembang’ola ma Rwoth Ubimo ma Malu Ngbir Yehova mir udul ung’olo nia gibithum ko pet
Bitimere i die ng’ombe ceke.
24 Pieno Rwoth Ubimo ma Malu Ngbir Yehova mir udul uwacu kumae: “Lworo kud unegwu, wu dhanu para ma wubedo i Sayuni, pir Asiria m’ubed ugoyowu kud uluth man m’ubed uting’o undoy pare i kumwu calu ma Misiri utimo. 25 Kum i ng’ey kare ma nyanok kende ci, ng’eicwiny ma lake tek bithum; kwinyo para bilokere yor i bang’gi pi ninyothogi. 26 Yehova mir udul biting’o del i kume, calu kinde m’evoyo Midian i kum cana pa Oreb. Man undoy pare bibedo iwi nam, man ebiting’e calu m’etimo ni Misiri.
27 I nindo maeca, jubikabu ter pare kud iwi gokwu,
Man mberembere pare kud i ng’utwu,
Man jubirungo mberemberene nikum mo.”
28 Edaru tundo i Aiath;
Ekadhu kud i Migron;
Ewok eketho ter pare i Mikmac.
29 Gikadhu loka ku kaka ma pii mwomere i iye;
Givuto diewor i Geba;
Kum Rama ubemiel, Gibea pa Saul uringo.
30 Waki man goy nduru, Ee Nyagalim!
Cik ithi, Ee Laica!
Ee Anathoth, wii jucan ba!
31 Madmena udaru ringo.
Ju ma bedo i Gebim gidaru sayu kapondo.
32 I nindo ma rom eno ebiwocungo tip i Nob.
Ebiyengo cinge i bang’ got pa Nyasayuni,
Ungulu got* mi Yeruzalem.
33 Nen! Rwoth mandha ma Yehova mir udul
Ubetong’o jang yen ku dwal ma ng’oyo ndiri;
Jubeng’ondo yen ma boco mandha
Man ju m’uting’iri malu jubejwigo.
34 Ebejwero vunga m’i luli ku jamtic mi cuma*
Man Lebanon bipodho i the cing’ ng’atu ma tek.