Isaya
11 Yen ma nyen biloth kud i cudho Yese,
Man niai kud i ulage yen ma nyen bicego nyinge.
2 Man tipo pa Yehova bibedo i wiye,
Tipo mi rieko man mi nyang’ i lembe,
Tipo mi juk man mi tego,
Tipo mi ng’eyong’ec man mi lworo Yehova.
3 Man anyong’a binege i kum lworo Yehova.
Ebipoko ngo lembe nimakere ku gin ma wang’e bineno,
Kadi ebitwinyojo ngo kende kende calku gin ma ithe biwinjo.
4 Ebipoko lembe mi ju ma thindho pwe,
Man ebimiyo juk pi bero mi ju ma mol m’i ng’om i atira.
Ebigoyo ng’om kud uluth mi dhoge
Man ebinego jutimrac ku yuyo mi dend dhoge.
5 Bedopwe bibedo mukaba mi dire,
Man bedoleng’ bibedo mukaba mi piere.
6 Urudi bibedo pi kare moko ku nyathin urombo,
Man ng’uu bivuto karacelo ku nyathi diel,
Man nyathi dhiang’ kud umvor* man ley ma ful ful bibedo ceke karacelo;*
Man nyathi jalawobi bitelo wigi.
7 Dhiang’ bicamu karacelo kud urudi,
Man nyithindhgi bivuto karacelo.
Umvor bicamu lum calu thwon dhiang’.
8 Nyathin ma dhoth bituko i dhu od urobi,
Man nyathin m’ukwiro cak biketho cinge i dhu odi thwol ma jukwir.
9 Gibitimo ngo racu nyanok de
Kadi nyoth moko ci i got para ma leng’ zoo,
Pilembe ng’om bipong’ andha ku ng’eyong’ec pa Yehova
Calu ma pii pong’o ko nam.
10 I nindo maeca, ulag Yese bicungo ni ayi* pi dhanu.
Thek bilokiri i bang’e pi nisayu telowic,*
Man kayom pare binwang’u dwong’.
11 I nindo maeca, Yehova birieyo cinge kendo wang’ mir arionde pi nicoko dong dhanu pare m’udong’ kud i Asiria, kud i Misiri, kud i Pathros, kud i Kuc, kud i Elam, kud i Cinear,* kud i Hamath, man kud i cula ma tung’ tung’ mi nam. 12 Ebiting’o ayi* malu pi thek man ebicoko dhanu mir Israel m’ulal, man ebicoko karacelo dhanu mi Yuda m’ulal mba mba i gund ng’om ang’wen zoo.
13 Nyeko pa Efraim bithum,
Man jubinyotho ju m’udagu Yuda cen.
Nyeko binego ngo Efraim i kum Yuda
Kadi Yuda de bibedo mbe kud adegi i kum Efraim.
14 Man gibicoriri i lung’* mi Jufilisti yo reto;
Gibiyaku dhanu ma yo Nyangu karacelo.
Gibirieyo cing’gi i kum* Edom ku Moab,
Man Juamon bibedo i the loc migi.
Ebigoyo kulone abiro m’ubemol ma tek ku yuyo* pare ma thwoyo piny,
Man ebiketho dhanu biwotho i iye pi nikadhu loka ma gikendo wara migi.
16 Man gengi ma dit bibedo nuti m’uwok kud i Asiria pi dong dhanu pare m’udong’,
Calu ma Israel de ubedo ko i nindo m’ewok kud i ng’om mi Misiri.