Isaya
17 Atwong’a pi Dameski:
“Nen! Dameski bibedo ngo kendo adhura,
Man ebidoko udhuru mi nyoth.
2 Jubiwenjo adhura mir Aroer;
Ebidoko ni kaka m’udul lim vuto i iye
Ma ng’atu moko mbe m’ubenyayu lworo i igi.
3 Adhura ma jutieko ku gang’ birwinyo kud i Efraim,
Man ker de birwinyo kud i Dameski;
Man dong ju mi Siria
Bibedo calu dwong’ mir Israel,”* Yehova mir udul uwacu.
4 “I nindo maeca dwong’ pa Yakobo bijwik,
Man kume ma ful ful* bimok.
5 Ebibedo calu kinde ma jakay cam ubecoko cam ma n’i wi tiende
Man bote ubekayu withe,
Calu kinde ma jubebeko nying cam i Poga* mi Jurefaim.
6 Kunde kende re ma bidong’,
Calu kinde ma jugoyo yend oliv:
Nying oliv ario kunoke adek m’ucek kende re ma bidong’ iwi jange ma lir lir,
Nyinge ang’wen kunoke abic kende re ma bidong’ iwi jange ma nyinge n’i wiye,” Yehova Mungu mir Israel uwacu.
7 I nindo maeca, ng’atini bineno ba Jacwic pare, man wang’e bineno ba Ng’atu ma Leng’ mir Israel tel. 8 Ebineno ngo ba pemlam, ma tic mi cinge; man ebineno ngo tel ba gin ma nyig cinge uyiko, dok ebed mbegi mi thier* kadi pemlam mir udok ma ng’wice ng’ar.
9 I nindo maeca, adhura pare ma jutieko ku gang’ bidoko calu kabedo ma juwenjo i die luli,
Calu jang yen ma juwenjo i wang’ Juisrael;
Ebidoko calu ng’om ngele.
10 Kum wii uwil pi Mungu mi both peri;
Ipoy ungo pi Cana mi tego peri.
11 Ku dieceng’ igoyo gang’ cuu mandha i kum podho peri,
Kugweno iketho nying cam peri utwii,
Ento mwoka perine bitho i nindo mi thong’om man mi litho ma thum ungo.
12 Wuwinji! Yakini mi dhanu dupa,
Ma gibewoy calu nam!
Thek ubewoy
Ma dwandgi calu coriri pa pii ma tek!
13 Thek biwodho dwal ma calu coriri pa pii dupa.
Mungu bijukogi man gibiringo bor,
Calu cung piny mi gudi ma yamu koto,
Calu atutu ma winyere i wang’ avuvu ma tek.
14 Uthieno ndiri nuti.
Ma fodi kugweno uromo ngo, nwang’u dong’ gimbe.
Eno tie makapiny mi ju m’ubemayuwa
Man matoke mi ju m’ubeyakuwa.