Isaya
22 Atwong’a pi Poga mi gin ma wok i wang’:*
Ang’o m’ubetimowu m’uketho wun ceke wuidho iwi ot e?
2 Yakini ubino bik i ii,
Adhura ma woy n’i iye man m’anyong’a n’i iye.
Dhanu peri ma junego, junego ngo ku palamularu,
Kadi githo de ngo i lwiny.
3 Rwodhi peri ceke ma weg adici giringo karacelo.
Jutwiyogi i kol m’umbe nikilogi kud athero.
Jutwiyo ju ma junwang’u ceke,
Kadok nwang’u giringo bor.
4 Pi thelembe maeno re m’awacu kumae: “Wulok weng’wu cen kud i kuma,
Man wuwek awak ku can ma dit.
Kud wusenduru nijuka
Pi nyoth pa* nya dhanu para.
5 Kum etie nindo mi jebowic, mi loc man mi ndiri
M’uai i bang’ Rwoth Ubimo ma Malu Ngbir Yehova mir udul,
I Poga mi gin ma wok i wang’.
Juberwombo gang’kidi
Man jubewak i bang’ got.
7 Poga* peri ma beco
Bipong’ bik ku magali mi lwiny,
Man riuni* bicungo i dhugang’,
8 Man judaru kabu jamgwok pa Yuda.
“I nindo maeca, ibineno ba odi jamlwiny mi Ot mi luli, 9 man wubineno vur dupa ma jutuco i kor gang’kidi mir Adhura pa Daudi. Man wubitwomo pii mi kut ma piny. 10 Wubikwanu udi mi Yeruzalem, man wubirwombo moko pi nidwoko gang’kidi udok ma tek. 11 Man wubiyiko vur i kind gang’kidi ario pi nicoko dhu pii mi kut ma con, ento wubineno ngo Jacwic ma Ditne, man wubineno ngo Ng’atu m’uyike niai yang’ con.
12 I nindo maeca, Rwoth Ubimo ma Malu Ngbir Yehova mir udul,
Bilwong’o wak man lemcan,
Lielo wic man kendo kendi mi saki.
13 Ento foc kud anyong’a re ma bibedo nuti,
Jubithumo dhieng’ man rombe,
Jubicamu ring’o man jubimadhu pigulok.
‘Dong’ wacamara man wamadhara, kum urwo wabitho.’”
14 I ng’eye, Yehova mir udul uweco i itha, ewacu kumae: “‘Kosa maeni biwekere ngo piwu cil ma wubitho ko,’ Rwoth Ubimo ma Malu Ngbir Yehova mir udul uwacu.”
15 Rwoth Ubimo ma Malu Ngbir Yehova mir udul uwacu kumae: “Cidh i bang’ jakurpiny, i bang’ Cebna ma neno wi ot,* man wac ire kumae: 16 ‘Ang’o m’itie ko keni, man ng’a m’itie ko keni m’umiyo iri twero m’iroko ko iri kakuny keni?’ Eroko ire kakuny i kabedo ma malu; ebepayu ire kayom* i cana. 17 ‘Nen! Yehova bivudhi piny ku tego, Ee jalwo, man ebimeki kikiki. 18 Man ebiriwi kikiki andha, ebing’uri calu mupira i ng’om ma lac. Ibitho keca man magali peri mi yung de bibedo keca; en e lemlewic ni ot pa rwoth peri. 19 Abikabu dito peri man abiriemi kud i tic peri.
20 “‘I nindo maeca, abilwong’o jatic para ma Eliakim ma wod Hilkia, 21 man abironyo kanzu peri i kume, abitwiyo piere kikiki ku thondh pieri, man abimiyo dito peri i cinge. Ebidoko wego ni dhanu ma bedo i Yeruzalem man ni ot pa Yuda. 22 Abiketho nyamufutha mi ot pa Daudi iwi goke. Ebiyabu man ng’atu moko mbe ma biciko; ebiciko man ng’atu moko mbe ma biyabu. 23 Abigure calu gute kaka ma tek, man ebidoko calu komker mi dwong’ ni ot pa won. 24 Man i kum maeno re ma jubing’abu dwong’* ceke mi ot pa won, nyikwayu man kodhi,* ajeni ceke ma thindho, ajeni ma igi thuc, man bende agulu ceke ma dongo.
25 “‘I nindo maeca,’ Yehova mir udul uwacu, ‘jubifudho gute ma juguro kaka ma tek, jubing’onde man ebipodho. E ter ma nwang’u jung’abu i kume bipodho man binyothere, kum Yehova ku kume udaru weco.’”