Isaya
23 Atwong’a pi Turo:
Wugoy nduru, wu meli mi Tharsis!
Kum judaru nyotho kaka ma yei nyiko i iye; ecopo mondo ngo.
Junyutho igi pi lembene niai kud i ng’om mi Kithim.
2 Wubed ling’, wu dhanu ma wubedo i dhu nam.
Jukuloka m’uai i Sidon ma bekadhu nam giketho ilony.
3 Juyeyo nying cam* i Cihor* ku wi pii ma dit,
Mwoka mi Nil m’utie piny m’ewotho nwang’u,
M’umiyo sukulia ni thek.
4 Lewic umeki, Ee Sidon, in m’i kaka ma tek mi nam,
Pilembe nam uyero kumae:
“Awinjo ngo litho mi nyolo nyodo, man anyolo ngo nyodo,
Apidho ngo awobi kadi anyira* de atungo ngo.”
5 Ndiri bimaku dhanu pi rwonglembe mi Turo,
Calu kinde ma gigam giwinjo rwonglembe mi Misiri.
6 Wukadh loka i Tharsis!
Wugoy nduru, wu ju ma wubedo i dhu nam!
7 Nyo eni re m’adhura mwu m’ubino kud anyong’a lee niai yang’ con,
Niai i rundi m’ecaku i iye?
Tiende ubed utere i ng’om ma bor pi nibedo kuca.
8 Ng’a m’ung’olo lembuni i kum Turo,
Ma japok jamker mi wic,
Ma weg kuloka pare gibino judongo ma wijo,
Ma jukuloka pare gibino dhanu ma juyungo i ng’om zoo?
9 Yehova mir udul ku kume re m’ung’olo lembuni,
Pi nicido doro pare m’ebed edoro ko pi leng’o pare ceke,
Pi nikelo acidi iwi dhanu ceke ma jubed juyungo i wang’ ng’om zoo.
10 Kadh loka ng’om peri calu Kulo Nil, Ee Nyatharsis.
Kaguro meli* moko ci dong’ umbe.
11 Erieyo cinge iwi nam;
Eyengo ker.
Yehova udaru ng’olo ya junyoth kabedo ma tek mi Fenisia.
12 Man ebeyero kumae: “Anyong’a binegi ngo kendo,
In m’i ng’atu ma jusendo, nyaku ma sumba mi Sidon.
Ai malu, kadh loka i Kithim.
Kadok kuca de ibiwok nwang’u ngo yom.”
13 Nen! ng’om mi Jukaldayo.
Eno tie dhanune, ento Asiria ngo
Re m’uyiko ire kabedo pi yedi mi langa.
Gigomo udi migi ma wiw pi nitieke;
Girwombo udi pare ma wiw ma tek,
E gidwoke ni udhuru mi nyoth.
14 Wugoy nduru, wu meli mi Tharsis,
Kum judaru nyotho kabedo mwu ma tek.
15 I nindo maeca, wijo biwil pi Turo pi oro pier abiro, rom ku wend oro mi kwo* p’ubimo acel. Saa ma oro pier abiro bithum, Turo bidoko calu won asara ma juwero pire kumae:
16 “Ting’ adungu, dhok adhura, Ee won asara ma juwil pire.
Goy adungu peri ku bodho;
Wer wer dupa,
Kara jupoy piri.”
17 I ajiki mi oro pier abiro, Yehova bipoy pi Turo, e ebicaku nwang’u cul pare kendo, man ebitimo asara ku ker ceke mi ng’om, i wang’ ng’om zoo. 18 Ento sukulia pare man cul pare bidoko ni piny ma leng’ ni Yehova. Jubigwoke ngo, kadi akana de jubikane ngo, pilembe cul pare bibedo pi ju ma bedo i wang’ Yehova, kara gicam i kadhiri ma igi yenyo man gikend bongu ma beco.