Isaya
24 Nen! Yehova ubekabu piny ceke kud i ng’ombe* man ebedwoke ni uvuru.
Ebeloko there man ebelalu ju ma bedo i iye.
2 Lembe ma rom binwang’u dhanu ceke:
Dhanu ma sai man bende jalam,
Jatic ma co man rwoth pare,
Jatic ma dhaku man min pacu pagi,
Jarang’iew man jaralwor,
Jamii banja man jagam banja,
Jamii lim man jagam lim.
3 Ng’ombe bidong’ mananu ma piny moko mbe i iye;
Jubiyake kpo,
Kum Yehova udaru yero lembuni.
4 Ng’ombe n’i lemcan;* evoc.
Ng’om ma cego cam uthwo; etal.
Dhanu ma pigi yik m’i ng’ombe ukwiyo.
5 Dhanu ma bedo i ng’ombe gidaru cide,
Kum gikadhu ku wi cik,
Giloko telowic,
Man gituro lembariba ma nja.*
6 Pi thelembe maeno re ma kwong’ ubemvoro ng’ombe,
Man ju ma bedo i iye kier n’i wigi.
Pi thelembe maeno re ma dhanu ma bedo i ng’ombe wendgi jwik,
Man dhanune udong’ nyanok mandha.
7 Pigulok ma nyen n’i lemcan,* yend ulok uthwo,
Man dhanu m’anyong’a n’i adundegi ubecur.
8 Dwand nyithi vul ma nyayu anyong’a ujik;
Woy mi ju m’umaru foc uthum;
Dwand adungu ma nyayu anyong’a ujik.
9 Jubemadhu pigulok m’umbe wer,
Man kong’o udoko kec i dhu ju m’umadhe.
10 Adhura ma juwenjo urwombere;
Juciko dhu udi ceke kara ng’atu moko kud umond i igi.
11 Jubewagu pigulok i gengi.
Anyong’a ceke daru thum;
Anyong’a m’i ng’ombe dong’ umbe.
12 Adhura udong’ ni uvuru;
Jurungo i dhugang’ man erodere ni udhuru.
13 Kum i kind dhanu, ng’om bibedo
Calu yend oliv ma jubegoyo,
Calu beko kund cam kinde ma mwoka mi nying ulok udhingo thum.
14 Gibiting’o dwandgi,
Gibikok kud anyong’a.
Niai kud i nam* gibitwong’o dwong’ pa Yehova.
15 Pi thelembe maeno re ma gibiyungo Yehova i ng’om mi der;*
Gibiyungo nying’ Yehova Mungu mir Israel i cula mi nam.
16 Niai i tung’ ng’om, wawinjo wer ma e:
“Dwong’* ni Ng’atu ma Pwe!”
Ento awacu kumae: “Abevoc, abevoc!
Can i wiya! Dhanu ubecibojo man gibewondo jumange;
Eyo, gibemediri nicibo man niwondo jumange.”
17 Ndiri, vur, man uwic ubekuri, in m’ibedo i ng’ombe.
18 Ng’atu moko ci m’uberingo dwal mi ndiri bipodho i vur,
Man ng’atu moko ci m’ubewok kud i vur bimoko i uwic.
Kum dhu pii ma dit mi polo biyabere,
Man kathere mi ng’om biyengere.
19 Ng’ombe kak dra;
Ng’ombe yengere;
Ng’ombe yengere ku rac.
20 Ng’om ubethambini calu ng’atu m’umer,
Man ebecidho kun ku kun calu otbak ma yamu ubeleko.
Kier pare ubenure lee dit,
Ebipodho ma dong’ ebiai ungo kendo.
21 I nindo maeca, Yehova bipoko lembe iwi udul mony ma malu lir lir,
Man iwi jubim mi ng’om iwi ng’om.
22 Man jubicoko dhoggi karacelo
Calu ju ma jutwiyo ma jucoko i vur,
Man jubiciko bang’gi i kol ma n’i the ng’om;
I ng’ey nindo dupa ka jubiliewogi.
23 Dwi m’ugudo bidoko nyapang’ pang’,
Man lewic bimaku ceng’ m’uberieny,
Kum Yehova mir udul udoko Ubimo iwi Got Sayuni man i Yeruzalem,
Edoko dwong’ i wang’ judongo mi dhanu pare.*