Yeremia

24 I ng’eye, Yehova unyutho ira katoko ario mi nying ulam ma juketho i wang’ hekalu pa Yehova, i ng’ey m’Ubimo Nebukadnezar* mi Babeli utero Yekonia* ma wod Yehoiakim m’ubimo mi Yuda i ng’eca, karacelo ku judongo ma wijo mi Yuda, jubodho man jutic mir uka;* eterogi niai kud i Yeruzalem i Babeli. 2 Katoko acel ubino ku nying ulam ma beco mandha, calu nying ulam ma juai jupono apona. Ento katoko ma kucelo ubino ku nying ulam ma reco magwei ma juromo camu ngo.

3 Yehova ugam upenja kumae: “Yeremia, ibeneno ang’o?” Adwoko nia “ulam; nying ulam ma becone gi beco mandha. Ento nying ulam ma recone gi reco magwei ma juromo camugi de ngo.”

4 I ng’eye, Yehova uweco i bang’a, eyero kumae: 5 “Yehova Mungu mir Israel uwacu kumae: ‘Dhanu mi Yuda ma n’i ng’eca, m’ariemo kud i kabedo maeni i ng’om mi Jukaldayo, abinenogi ku wang’ ma ber calu nying ulam maeni ma beco. 6 Wang’a bibedo i wigi pi bero migi, man abiketho gibidwogo i ng’ombuni. Abigierogi man abirwombogi ngo; abipidhogi man abifudhogi ngo. 7 Abimiyo igi adunde ma ging’eya ko, nia an a Yehova. Gibidoko dhanu para man abidoko Mungu migi, kum gibidwogo i bang’a ku cwinygi zoo.

8 “‘Ento pi nying ulam ma reco magwei ma juromo camu ngo, Yehova uwacu kumae: “Abineno Ubimo Zedekia mi Yuda de kumeno, judongo ma wijo pare, dong dhanu mi Yeruzalem m’udong’ i ng’ombuni, man dhanu ma bedo i ng’om mi Misiri. 9 Man abiketho gibidoko ni gin ma ng’oyo ndiri man nyoth ni ker ceke mi ng’om, acidi, lembabola, jamcac man alam i kabedo ceke m’alalugi i iye. 10 Man abioro palamularu, ndru man thong’om i wigi, cil ma gibithum ko pet kud i ng’om m’amiyo igi man ni kwarugi.”’”