Ezekiel
27 Lembe pa Yehova ubino kendo i bang’a, uyero kumae: 2 “Ento in, wod dhanu, wer wer wak pi Turo, 3 man yer ni Turo kumae:
‘In m’ibedo i dhugola mi nam,
Jakuloka mi dhanu mi cula dupa,
Rwoth Ubimo ma Malu Ngbir Yehova uwacu kumae:
“Ee Turo, in giri iwacu kumae: ‘Atie leng’ magwei.’
4 Ng’om peri n’i cwiny nam,
Man ju m’ugieri gidwoki leng’ magwei.
5 Giyiko bau peri ceke ku yend jenevriye mi Senir,
Man gigamu yend tido mi Lebanon pi niyiko iri yen ma juciko bongu mi yei i kume.
6 Giyiko upol peri ku yen m’ujany mi Bacan,
Man giyiko dhu um meli peri ku yend sipre ma jucomo lak liec m’uai i cula mi Kithim i kume.
7 Juyiko bongu mi meli peri ku bongu ma nwang’ m’ujebo rangi m’uai i Misiri,
Man juyiko bongu m’apedha peri ku wuzi mi ble man ku yuk rombe mi rangi m’uluga m’uai i cula mir Elica.
8 Dhanu ma bedo i Sidon man Arvad ubino jugoy ngai peri.
E Turo, dhanu peri ma jubodho ubino jutic peri mi meli.
9 Dhanu m’uteng’ini man jubodho mi Gebal ubed umwono wang’ meli peri.
Meli ceke mi nam man junam migi ubed ubino i beng’i pi niwilo jamkuloka.
10 Dhanu mi Persi, mi Lud, man mi Put ubino i kind udul mony peri; gibino dhanu peri mi lwiny.
Gibed ging’abu ban ku sabu migi i beng’i, man gin re ma giketho inwang’u dwong’.
11 Dhanu mir Arvad ma gibino i kind udul mony peri gibed gicungo iwi gang’kidi peri tingili,
Man jumaco ma cwinygi tek ubed ukuro kum udi peri ma wiw.
Gibed giliero ban ma ngulu ngulu i kum gang’kidi peri tingili
Man gidwoki idoko leng’ magwei.
12 “‘“Tharsis ubed utimo kuloka kudi pi lonyo peri m’upong’ bik. Gibed ging’iewo piny i beng’i ku mola ma tar, cuma, nyunyu ma tar ma lebe lebe,* man cuma ma pek. 13 Yavan, Thubal, man Mecek ubed utimo kuloka kudi, man gibed giwilo jamkuloka peri ku ng’eca man piny ma juyiko ku mola. 14 Juruot pa Thogarma gibed giwilo jamkuloka peri ku riuni, riuni mi lwiny man kana. 15 Dhanu mi Dedan ubed utimo kuloka kudi; iketho jukuloka i cula dupa. Gibed gimiyo iri lak liec ku yend eben ni giramiya. 16 Edom utimo kudi kuloka pi piny peri m’upong’ bik. Gibed giwilo jamkuloka peri ku turkwaz, bongu mi yuk rombe, bongu m’ujebo rangi ma juketho dheyo i kume, bongu ma leng’, korai man rubi.*
17 “‘“Yuda ku ng’om mir Israel ubed utimo kudi kuloka; gibed giwilo jamkuloka peri ku nganu mi Minith, cam m’alonda, miyokic, mo man balsam.
18 “‘“Dameski ubed utimo kudi kuloka pi piny peri m’upong’ bik man lonyo peri ceke; ebed elworo iri pigulok mir Helbon man bongu mi yuk rombe mi Zahar.* 19 Vedan man Yavan mir Uzal gibed gimiyo piny ma juyiko ku cuma, yen kasia man agada ma ng’wice ng’ar pi niwilo jamkuloka peri. 20 Dedan ubed ulworo iri bongu ma jupedho ni kabedo iwi kana. 21 Iketho Juarabia man judongo ma wijo ceke mi Kedar m’ubino jukuloka mi nyithi rombe, mi rombe man mi diegi gibed gitimo iri. 22 Jukuloka mi Ceba man mi Rama gibed gilworo iri piny; gibed gimiyo kwond mo ceke ma ng’wice ng’ar ma beco mandha, kidi ma pigi tek, man mola ma kwar giwilo ko jamkuloka peri. 23 Haran, Kane, Eden, jukuloka mi Ceba, Acur, man Kilmad gibed gilworo iri piny. 24 I soko peri, gibed gilworo bongu ma beco, koti ma juyiko ku bongu mi rangi mi ble man ma juketho dheyo m’ujebo rangi i kume, man bende thapi m’ujebo rangi; gin ceke jutwiyogi kii ku thol.
25 Meli mi Tharsis ubed uyeyo jamkuloka peri,
Uketho ipong’ man jupangu ter trik i ii* i die cwiny nam.
26 Jugoy ngai peri uteri i die nam m’udhetho;
Yamu ma yo nyangu ung’enyo ii i die cwiny nam.
27 Lonyo peri, jamcingi, jamkuloka peri, junam peri, man jutic peri mi meli,
Ju ma mwono wang’ meli peri, ju ma lworo jamkuloka peri, man juaskari ceke,
Udul dhanu* ceke ma ni kudi,
Bimwony tup i die cwiny nam i nindo m’ibirwombiri i iye.
28 Saa ma jutic mi meli peri begoyo nduru, kum dhu wat bimiel.
29 Jukiew upol ceke, junam, man ju ma mwono wang’ meli
Bilor kud i meli migi man gibicungo i ng’om.
30 Gibiting’o dwandgi man gibiwak piri ma tek ku can,
Gibidhenyo utur i die wigi man gibing’iendiri i vuru.
31 Gibilielo yuk wigi man gibironyo kendi mi saki;
Gibiwak ku can piri man gibigoyo nduru ma tek.
32 I wak migi, gibiwero wer wak man gibiwero piri kumae:
‘Ng’a ma calu Turo, ma kawoni uling’ ting’ i die nam?
33 Saa ma jamkuloka peri ubed uai i die nam, ibed inyayu anyong’a i dhanu dupa.
Lonyo peri m’upong’ man jamkuloka peri ulonyo jubim mi ng’om.
34 Kawoni ing’eny i die nam, i pii ma thuc,
Man jamkuloka peri ceke ku dhanu peri ceke gimwony kudi.
35 Dhanu ceke ma bedo i cula bineni ku zungo,
Man kum jubim migi bimiel ni ndiri; wang’gi de binyutho nia cwinygi ung’abere.
36 Jukuloka ma n’i kind thek bilwiyo ku zungo pi lembe m’unweng’i.
Ajiki peri bitundo rek man ebiwang’u ijo.
E ibibedo nuti kendo ngo pi nja.’”’”