Ezekiel
28 Lembe pa Yehova ubino kendo i bang’a, uyero kumae: 2 “Wod dhanu, yer ni jatela mi Turo kumae: ‘Rwoth Ubimo ma Malu Ngbir Yehova uwacu kumae:
“Calu m’adundeni uting’ere, ibemediri niyero kumae: ‘Atie mungu.
Ajany iwi komker pa mungu i cwiny nam.’
Ento itie kende kende dhanu, itie mungu ngo,
Kadok i adundeni ibenwang’u nia itie mungu de.
3 Nen! nyo i riek nisagu Daniel?
Nyo lembamung’a moko mbe m’upondo iri?
4 Ilony nikum rieko peri man copo peri mi ng’iyo i lembe,
Man ibemediri nicoko mola ma kwar ku mola ma tar i kakanpiny peri.
5 Kuloka m’itimo ku bodho uketho ilony lee,
Man adundeni uting’ere nikum lonyo peri.”’
6 “‘Pieno Rwoth Ubimo ma Malu Ngbir Yehova uwacu kumae:
“Calu i adundeni inwang’u nia itie mungu,
7 Abekelo juwirok i kumi, thek ma kisa mbe i igi nisagu zoo.
Gibiwodho palamularu migi i kum leng’o mi rieko peri
Man gibicido leng’o peri ma hai.
8 Gibiketho ibiloro i vur,*
Man ibitho ku tho ma rac i die cwiny nam.
9 Nyo ibiyero asu nia ‘Atie mungu,’ ni ng’atu m’ubenegi?
Ibibedo kende kende dhanu ma dhanu, ento mungu ngo, i cing’ dhanu ma bicibi.”’
10 ‘Ibitho ku tho mi ju ma jutimo ngo yaa i kumgi i cing’ juwirok,
Pilembe an ku kuma adaru weco,’ Rwoth Ubimo ma Malu Ngbir Yehova wacu.”
11 Man lembe pa Yehova ubino kendo i bang’a, uyero kumae: 12 “Wod dhanu, wer wer wak pir ubimo mi Turo man yer ire kumae: ‘Rwoth Ubimo ma Malu Ngbir Yehova uwacu kumae:
“I leng’o, ibino macal,
Ipong’ ku rieko man ibino leng’ magwei.
13 Ibino i Eden ma podho pa Mungu.
Juruki ku kidi ma pigi tek ceke,
Rubi, thopaz man yaspi; krizolith, oniks man jad; safir, turkwaz man emerod;*
Man jamgwok ma jumwonogi i iye utie mi mola ma kwar.
Juyikogi i nindo ma jucwiyi i iye.
14 Aketho ibedo calu jakerubi ma juwiro man ma jagwok.
Ibino iwi got ma leng’ pa Mungu, man ibed iwotho i kind kidi mi mac.
15 Ibino ma kosa mbe i wii i timo peri niai i nindo ma jucwiyi i iye
Nitundo ma gondiri ubin unwang’ere i ii.
16 Calu m’itimo kuloka lee,
Igam ipong’ ku rop, man icaku dubo.
E calu icido, abibeyi cen kud iwi got pa Mungu,
Man abinyothi bor ku kidi mi mac, Ee jakerubi ma jagwok.
17 Adundeni caku ting’ere nikum leng’o peri.
Inyotho rieko peri nikum leng’o peri ma lee.
Abibeyi piny i ng’om.
Abiketho ibidoko ni thangu i wang’ jubim.
18 Nikum kier peri ma lee man kuloka m’itimo i ayi m’atira ngo, icido hekalu peri.
Abiketho mac bimoc i die ii man ebiweng’i.
Abidwoki ni vuru i ng’om i wang’ dhanu ceke m’ubeneni.
19 Ju ceke m’ung’eyi i kind dhanu bineni ku zungo.
Ajiki peri bitundo rek man ebiwang’u ijo,
E ibibedo nuti kendo ngo pi nja.”’”
20 Man lembe pa Yehova ubino kendo i bang’a, uyero kumae: 21 “Wod dhanu, lok weng’i yor i Sidon man ew lembila pire. 22 Icikiri niyero kumae: ‘Rwoth Ubimo ma Malu Ngbir Yehova uwacu kumae:
“Nen, an’i kumi, Ee Sidon man abinwang’u dwong’ i die ii;
E dhanu bing’eyo nia an a Yehova saa m’abikelo pokolembe i wiye, man abidoko leng’ i iye.
23 Abioro thong’om i iye man rimo bicwir i gengi pare.
Dhanu ma junego bipodho i die iye saa ma palamularu bibino i kume niai ku kaka ceke;
E gibing’eyo nia an a Yehova.
24 “‘“E yend ukudho ma timojo rac man ukudho ma cobojo ma lith, niwacu ju m’ubecayu ot mir Israel, bitieke ngo kendo; e dhanu bing’eyo nia an a Rwoth Ubimo ma Malu Ngbir Yehova.”’
25 “‘Rwoth Ubimo ma Malu Ngbir Yehova uwacu kumae: “Saa m’abidocoko dhu ot mir Israel kendo i kind dhanu ma julalugi i kindgi, abidwokara leng’ i kindgi i wang’ thek. E gibibedo i ng’om migi m’agam amiyo ni jatic para ma Yakobo. 26 Gibibedo museme i iye, gibigiero udi, gibipidho yend ulok man gibibedo museme saa m’abikelo pokolembe iwi dhanu ceke m’utiekogi m’ubecayugi; e gibing’eyo nia an a Yehova Mungu migi.”’”