Ezekiel
29 I oro mir apaje, i dwi mir apar, i nindo apar ario mi dwije, lembe pa Yehova ubino i bang’a, uyero kumae: 2 “Wod dhanu, lok weng’i yor i bang’ Farao m’ubimo mi Misiri, ew lembe i kume man i kum Misiri ceke. 3 Yer kumae: ‘Rwoth Ubimo ma Malu Ngbir Yehova uwacu kumae:
“Nen, an’i kumi, ini Farao m’ubimo mi Misiri,
In m’i yedi ma dit mi nam m’uvuto i jang Nil* pare,
In m’iwacu kumae: ‘Kulo Nil para utie para gira.
Ayike ira gira.’
4 Ento abitong’o gol i dingi man abiketho rec mi Nil peri bimoko i kum apokani.
Abiwodhi woko kud i Nil peri ku rec ceke mi Nil m’umoko i kum apokani.
5 Abiwenji i langa, in ku rec ceke mi Nil peri.
Ibipodho i die lum man jubiting’i ngo kadi acoka de jubicoko ngo dhogi.
Abimiyi ni cam ni yedi mi lum man ni winyo mi kor polo.
6 E dhanu ceke ma bedo i Misiri bing’eyo nia an a Yehova,
Pilembe gitielo ngo ot mir Israel, ento gibedo kende kende calu ng’ili lum.*
7 Saa ma gimaku cingi, ii ng’eny,
Man iketho giyeco gokgi.
Saa ma gijengiri i wii, itur,
Man iketho tiendgi* umiel krr.”
8 “‘Pieno Rwoth Ubimo ma Malu Ngbir Yehova uwacu kumae: “Nen, abekelo palamularu i wii, man abikabu dhanu ku yedi kud i ii. 9 Ng’om mi Misiri bidong’ ni uvuru ma jubedo ngo i iye; e gibing’eyo nia an a Yehova, pilembe iyero* kumae: ‘Kulo Nil utie para; an re m’ayike.’ 10 Pieno an’i kumi man i kum Nil peri, abidwoko ng’om mi Misiri bidoko ni uvuru m’uthwo kaw, man ni ng’om ngele m’udong’ kende, niai i Migdol nitundo i Siene, cil i kieu mir Ethiopia. 11 Dhanu kadi udul lim bikadhu ngo kud i iye, man jubibedo ngo i iye pi oro pier ang’wen. 12 Abiketho ng’om mi Misiri bidong’ kende nisagu ng’om ceke man adhurane de bidong’ ni adhura m’udong’ kende nisagu adhura ceke pi oro pier ang’wen; abilalu i Jumisiri i kind thek man abilalugi mba mba i ng’om ma tung’ tung’.”
13 “‘Kum Rwoth Ubimo ma Malu Ngbir Yehova uwacu kumae: “I ng’ey oro pier ang’wen, abicoko dhu Jumisiri kud i kind dhanu ma julalugi i kindgi man abidwogogi; 14 abiketho Jumisiri ma jutero i ng’eca bidwogo i ng’om mi Pathros, man kuca i ng’om thugi gibidoko ker ma kabang’e mbe. 15 Misiri bidoko ni ker ma tego pare mbe magwei man ebibimo ngo kendo wi thek mange; abiketho ebibedo nyanok mandha man ebibedo mbe ku copo mi diyo thek mange. 16 Ebibedo ngo kendo nyanok de gin ma ot mir Israel geno, ento ebibepoyo wigi kende kende pi kosa ma gitimo ma gilokiri ko i bang’ Jumisiri pi nisayu kony. E gibing’eyo nia an a Rwoth Ubimo ma Malu Ngbir Yehova.”’”
17 I oro mi pier ario wi abirone, i dwi ma kwong’a, i nindo ma kwong’a mi dwije, lembe pa Yehova ubino i bang’a, uyero kumae: 18 “Wod dhanu, Ubimo Nebukadnezar* mi Babeli uketho udul mony pare utimo tic ma tek mandha pi nikiedo i dhu Turo. Wi dhanu ceke uwang’ man gok ceke uluny. Ento en kud udul mony pare ginwang’u ngo cul pi tic ma tek ma gitimo i kum Turo.
19 “Pieno, Rwoth Ubimo ma Malu Ngbir Yehova uwacu kumae: ‘Nen, abemiyo ng’om mi Misiri ni Ubimo Nebukadnezar* mi Babeli man ebicoko lonyo m’i iye, ebiyaku man ebicoko piny lee kud i iye; eno bibedo cul mir udul mony pare.’
20 “‘Abimiyo ire ng’om mi Misiri kawang’ tic ma tek m’etimo i kume,* pilembe gitimo ira,’ Rwoth Ubimo ma Malu Ngbir Yehova wacu.
21 “I nindo maeca abiketho tung bitwii* ni ot mir Israel, man abimiyo iri kaka mi weco i kindgi; e gibing’eyo nia an a Yehova.”