Ezekiel
31 I oro mir apar acende, i dwi mir adege, i nindo ma kwong’a mi dwije, lembe pa Yehova ubino kendo i bang’a, uyero kumae: 2 “Wod dhanu, yer ni Farao m’ubimo mi Misiri man ni udul dhanu pare kumae:
‘Ng’a ma dwong’ calu ini?
3 Jaasiria moko bino nuti ma calu yend tido mi Lebanon;
Jange ma beco ubino calu vunga ma miyo tipo, man edongo lir lir;
Lwithe ubino i kind afuru.
4 Pii uketho efung’ini ma dit, pii ma thuc uketho edongo lir lir.
Kulo utieko kaka ma jupidhe i iye tingili;
Jang kulonegi ubed umiyo pii ni yen ceke mi lum.
5 Eno re m’uketho edongo ma bor nisagu yen mange ceke mi lum.
Jange ma dongo unyay, man nyithi jange uwobo ma boco boco
Nikum pii ma lee mi kulone.
6 Winyo ceke mi kor polo ubed ugiero odigi iwi jange ma dongo,
Yedi ceke mi lum ubed unyol i the nyithi jangene,
Man thek ceke ma wendgi lee gibed gibedo i the tipone.
7 Edoko dwong’ nikum leng’o man nikum jange ma boco boco,
Pilembe ulage nyang’ nitundo i pii ma lee.
8 Yend tido mange mbe mi podho pa Mungu ma jucopo poro kude.
Yend jenevriye moko mbe ma jange dongo dongo calu pare,
Man yend platan moko mbe ma jange rom ku pare.
Yen mange mbe m’i podho pa Mungu ma copo pimere ku leng’o pare.
9 Ayike edoko ma leng’, ma ithe uluk lee,
Man kumira unego yen mange ceke mir Eden ma podho pa Mungu mandha i kume.’
10 “Pieno Rwoth Ubimo ma Malu Ngbir Yehova uwacu kumae: ‘Calu edongo* ma bor man lwithe uwic nitundo i kind afuru man adundene uting’ere pi dongo pare, 11 abimiye i cing’ jabim mi thek ma jarukara. Ebitimo lembe andha i kume man abikwere pi racu pare. 12 Man juwirok ma gi thek ma cwinygi rac nisagu thek zoo bing’onde cen, man gibiweke iwi gudi. Ithe bioy i poga ceke man jange m’utur bivuto i kulo ceke mi ng’ombe. Dhanu ceke mi ng’om biai kud i the tipone man gibiweke. 13 Winyo ceke mi kor polo bikwo iwi tiende m’upodho, man yedi ceke mi lum bikwo iwi jange. 14 Eno tie kara yen moko ci ma n’i dhu pii kud udong ma bor lee kadi lwithe kud uwic nitundo i kind afuru, man kara yen m’umadhu pii ma ber kud udong lee calu gin. Kum gin ceke gibitho man gibiloro i ng’om ma piny karacelo ku wot dhanu m’ubeloro i vur.’*
15 “Rwoth Ubimo ma Malu Ngbir Yehova uwacu kumae: ‘Nindo m’ebiloro i Liel,* abinyayu lemcan. Pieno, abiumo wi pii ma thuc man abing’olo dhu kulo kara acer pii ma dit. Abiketho Lebanon bicido bii nikume man yen ceke mi lum bithwo. 16 Saa ma badwande m’epodho ko bewinjere, abiketho kum thek bimiel kinde m’abiketho ebiloro i Liel* karacelo ku dhanu ceke ma gibeloro i vur,* man yen ceke mir Eden, ma gitie yen m’ang’iya man ma beco nisagu mi Lebanon, yen ceke m’umadhu pii ma ber binwang’u jukocwiny i ng’om ma piny. 17 Gidaru loro karacelo kude i Liel,* i bang’ dhanu ma junego ku palamularu, karacelo ku ju m’ubed ukonye,* m’ubed ukwo i the tipone i kind thek.’
18 “‘Yen ma kani mir Eden m’ubino dwong’ man dit calu ini? Ento jubilori piny andha karacelo ku yen mir Eden i ng’om ma piny. Ibivuto piny i kind ju ma jutimo ngo yaa i kumgi, dhanu ma junego ku palamularu. Lembuno binwang’u Farao kud udul dhanu pare zoo,’ Rwoth Ubimo ma Malu Ngbir Yehova wacu.”