Ezekiel
32 Man i oro mir apar arionde, i dwi mir apar ario, i nindo ma kwong’a mi dwije, lembe pa Yehova ubino kendo i bang’a, uyero kumae: 2 “Wod dhanu, wer wer wak pi Farao m’ubimo mi Misiri man yer ire kumae:
‘Ibino calu nyathin umvor* ma tek mi thek,
Ento juketho iling’.
Ibino calu yedi ma dit mi nam, ibed idhuny i kulo peri,
Irubo wang’ pii ku tiendi man itugo wang’ kulo.’
3 Rwoth Ubimo ma Malu Ngbir Yehova uwacu kumae:
‘Abitiyo kud udul thek pi nibolo voi para i wii,
Man gibipeyi ku ndiya para.
4 Abiweki i ng’ombe;
Abiboli i die lum.
Abiketho winyo ceke mi kor polo bipiey i wii,
Man abiketho yedi mi lum mi ng’om ceke biyeng’ kudi.
5 Abibolo ringi iwi gudi
Man abipong’o poga ku dongi m’udong’.
6 Abitobo ng’om ku rimbi m’ukilere nitundo iwi gudi,
Man ebipong’o kulo.’*
7 ‘Saa m’ibitho abiumo polo man abiketho nyikaluku migi bicido bii.
Abiumo ceng’ kud afuru,
Man dwi birienyo ngo derne.
8 Abiketho piny ma rienyo der i kor polo bicido piri,
Man abiumo ng’om peri ku mudho,’ Rwoth Ubimo ma Malu Ngbir Yehova wacu.
9 ‘Abinyayu can i adunde dhanu dupa saa m’abitero ng’eca peri i bang’ thek mange,
I ng’om m’ing’eyo ngo.
10 Abiketho lworo bimaku dhanu dupa,
Man ndiri bimielo kum jubim migi piri saa m’abitworo palamularu para i wang’gi.
Kumgi bimiel asu asu, ma ng’atuman utie ku lworo pi kwo pare,
I nindo m’ibipodho i iye.’
11 Kum Rwoth Ubimo ma Malu Ngbir Yehova uwacu kumae:
‘Palamularu p’ubimo mi Babeli bibino i wii.
12 Abiketho udul dhanu peri bipodho i lak palamularu mi juaskari ma jurukara,
Niwacu thek ma gin ceke gi thek ma cwinygi rac nisagu thek zoo.
Gibiloro doro mi Misiri, e gibidaru udul dhanu peri pet.
13 Abinyotho udul lim pare ceke ma n’i ng’et kulo pare ma dongo,
Man tiend ng’atu moko mbe kadi ubong’ tiend udul lim moko mbe ma birubo wang’gi kendo.’
14 ‘I rundi maeca, abidwoko wang’ pii migi tetete,
Man abiketho kulo migi bimol calu mo,’ Rwoth Ubimo ma Malu Ngbir Yehova wacu.
15 ‘Saa m’abidwoko Misiri ni ng’om ngele m’udong’ kende, ng’om ma jukabu piny ceke ma nwang’u upong’e,
Saa m’abigoyo dhanu ceke ma bedo i iye,
Gibing’eyo nia an a Yehova.
16 Eni tie wer wak, man dhanu biwere andha;
Jumanyir mi thek biwere.
Gibiwere pi Misiri man pir udul dhanu pare ceke,’ Rwoth Ubimo ma Malu Ngbir Yehova wacu.”
17 I ng’eye, i oro mir apar arionde, i nindo apar abic mi dwije, lembe pa Yehova ubino i bang’a, uyero kumae: 18 “Wod dhanu, goy nduru pir udul dhanu mi Misiri man lore i ng’om ma piny, en ku jumanyir mi thek ma jurukara, karacelo ku dhanu m’ubeloro i vur.*
19 “‘I leng’ nikadhu ng’a? Lor piny man vut karacelo ku ju ma jutimo ngo yaa i kumgi!’
20 “‘Gibipodho i kind ju ma junego ku palamularu. Judaru thiere ni palamularu; waye cen karacelo kud udul dhanu pare ceke.
21 “‘Juaskari pare ma jurukara biweco i bang’e man i bang’ jukony pare niai kud i the Liel.* Gibiloro piny andha man gibivuto tap calu ju ma jutimo ngo yaa i kumgi, ma junego ku palamularu. 22 Asiria ni kuca kud udul pare zoo. Liel migi udhoke tingili, gin ceke gipodho i lak palamularu. 23 Liel pare n’i the vur ma thuc, man udul dhanu pare udhoko liel pare tingili, gin ceke gipodho i lak palamularu, pilembe ginyayu ndiri i ng’om mi ju ma kwo.
24 “‘Elam ni kuca karacelo kud udul dhanu pare ceke i ng’et liel pare tingili, gin ceke gipodho i lak palamularu. Giloro i ng’om ma piny ma jutimo ngo yaa i kumgi, gin ma ginyayu ndiri i ng’om mi ju ma kwo. Kawoni gibiyeyo lewic migi ku dhanu m’ubeloro i vur.* 25 Juyiko ire kavuto i kind ju ma junego man udul dhanu pare ceke n’i ng’et liel pare tingili. Gin ceke jutimo ngo yaa i kumgi, junegogi ku palamularu, pilembe ginyayu ndiri i ng’om mi ju ma kwo. Man gibiyeyo lewic migi ku dhanu m’ubeloro i vur.* Jukethe i kind ju ma junego.
26 “‘Mecek ku Thubal gini kuca karacelo kud udul dhanu migi* ceke. Liel migi n’i ng’ete tingili. Gin ceke jutimo ngo yaa i kumgi man jutuco igi plu ku palamularu, pilembe ginyayu ndiri i ng’om mi ju ma kwo. 27 Nyo gibivuto ngo karacelo ku juaskari ma jurukara ma jutimo ngo yaa i kumgi, m’upodho, m’uloro i Liel* ku jamlwiny migi? Gibiketho palamularu migi i the wigi* man dubo migi iwi cogogi, pilembe juaskari ma jurukara eno ginyayu ndiri i ng’om mi ju ma kwo. 28 In re jubirungo ii i kind ju ma jutimo ngo yaa i kumgi man ibivuto karacelo ku ju ma junego ku palamularu.
29 “‘Edom ni kuca, ku jubim pare man judongo ma wijo pare ceke ma jupielo i kind ju ma junego ku palamularu kadok nwang’u gibino tek; gin de gibivuto karacelo ku ju ma jutimo ngo yaa i kumgi man ku ju m’ubeloro i vur.*
30 “‘Judongo ma wijo ma yo malu zoo ni kuca karacelo ku Jusidon ceke m’uloro piny ku lewic karacelo ku ju ma junego, kadok nwang’u tego migi unyayu ndiri de. Gibivuto ma jutimo ngo yaa i kumgi karacelo ku ju ma junego ku palamularu man gibiyeyo lewic migi ku ju m’ubeloro i vur.
31 “‘Farao binenogi zoo man ebinwang’u jukocwiny pi lembe ceke m’unwang’u udul dhanu pare; jubinego Farao kud udul askari pare zoo ku palamularu,’ Rwoth Ubimo ma Malu Ngbir Yehova wacu.
32 “‘Calu ma Farao unyayu ndiri i ng’om mi ju ma kwo, jubipiele kud udul dhanu pare zoo kara giyom ku dhanu ma jutimo ngo yaa i kumgi, karacelo ku ju ma junego ku palamularu,’ Rwoth Ubimo ma Malu Ngbir Yehova wacu.”