Ezekiel

43 I ng’eye etera i dhugang’ m’uloko yo nyangu. 2 Kuca awok aneno dwong’ pa Mungu mir Israel m’uai yo nyangu, man dwande ubino calu dwand pii m’ubecorere; man dwong’ pare ucaru ng’om. 3 Gin m’aneno ubino calu gin ma wok i wang’ m’agam aneno kinde m’abino* pi ninyotho adhura man ayi pare ubino calu gin m’aneno ceng’ini ku kulo Kebar; e apodho arieba wang’a i ng’om.

4 I ng’eye dwong’ pa Yehova umondo i hekalu* kud i dhugang’ m’uloko yo nyangu. 5 Tipo ugam uting’a man uroya i lela ma yor i iye, e aneno dwong’ pa Yehova uromo i hekalu bik. 6 I ng’eye awinjo ng’atu moko ubeweco i bang’a kud i hekalu man ng’atune ubin ucungo i ng’eta. 7 Eyero ira kumae:

“Wod dhanu, eni tie kaka komker para man kaka m’aketho i iye the tienda, kaka m’abibedo i iye i kind dhanu mir Israel rondo ku rondo. Ot mir Israel bicido ngo nyinga ma leng’ kendo, gin ku jubim migi, nikadhu kud i asara migi mi tipo man avuj jubim migi i saa mi tho migi. 8 Ku wang’ dhugola migi ma giketho i ng’et wang’ dhugola para man ng’et dhugola migi ma giketho i kum ng’et dhugola para, ma wang’ gang’ acel kende re m’upoko kindwa kugi, gicido nyinga ma leng’ ku gin ma judagu ma gitimo, uketho adarugi pet nikum ng’eicwiny para. 9 Dong’ giketh asara migi mi tipo kud avuj jubim migi bor kuda, e abibedo i kindgi rondo ku rondo.

10 “Ento in, wod dhanu, kor ni ot mir Israel ayi ma hekalu tie ko, kara lewic umakgi pi kier migi man giponj ayi ma jugiere ko.* 11 Tek lewic umakugi pi lembe ceke ma gitimo, icikiri ninyutho igi ayi ma jugomo ko hekalune, ayi m’epangere ko, kawokne man kamondone. Nyuth igi ayi ma jugome ko ceke man cikne de ceke, ayi ma jugome ko man cikne, kiewgi i wang’gi kara ginen ayi ma jugiere ko ceke man giwor cikne. 12 Eni tie cik mir hekalu. Kabedo m’udhoko wi gode ceke utie leng’. Nen! eni tie cik mir hekalu.

13 “Maeni tie ayi ma jupimo ko pemlam ku bot (jumedo wang’ cing’ acel i kum botman).* There ubino bot acel, man lac wang’e ubino bot acel. Jamruko ma lac wang’e rom ku lac cing’* acel utwodo dhoge tingili. Eno tie the pemlam. 14 Niai i there ma n’i ng’om nitundo i dhoge ma piny m’udhoke tingili, utie bot ario man lac wang’e utie bot acel. Niai i dhoge ma nok m’udhoke tingili nitundo i dhoge ma dit m’udhoke tingili, utie bot ang’wen man lac wang’e utie bot acel. 15 Kakudho mac mi pemlam uidho bot ang’wen man tunge ang’wen ubino nuti niai kud i kum kakudho macne. 16 Theng kakudho mac ang’wen mi pemblamne zoo ubino rom: bor pare bot apar ario man lac wang’e de bot apar ario. 17 Thenge ang’wen m’udhoko dhoge tingili bor migi utie bot apar ang’wen man lac wang’gi de bot apar ang’wen; dhoge m’udhoke tingili utie nusu pa bot man there utie bot acel i ng’ete ceke.

“Man mangasinegi uloko yo nyangu.”

18 I ng’eye eyero ira kumae: “Wod dhanu, Rwoth Ubimo ma Malu Ngbir Yehova uwacu kumae: ‘Eni tie telowic ma jubilubo kinde ma jubegiero pemlam, kara juthier lam m’awang’a ma boo man jukir rimo i wiye.’

19 “‘Ibimiyo nyathi thwon dhiang’ acel kud i kind dhieng’ ni lam mi dubo ni julam ma Julawi ma gi nyikway Zadok, ma gicoro i bang’a pi nitimo ira,’ Rwoth Ubimo ma Malu Ngbir Yehova wacu. 20 ‘Ibigamu kum rimbe moko man ibikethe i kum pemlam, i kum gunde ang’wen mi dhoge m’udhoke tingili man i dhoge tingili, kara udwoke leng’ ni dubo man utim adunya pire. 21 I ng’eye ting’ nyathi thwon dhiang’, ma tie lam mi dubo, pi niwang’e kaka m’ukethere mir hekalu, yo woko mi kamaleng’. 22 I nindo mir arionde, ibithiero nyog diel acel ma mulima mbe i kume ni lam mi dubo; man jubidwoko pemlam leng’ ni dubo, tap calu ma judwoke ko leng’ ni dubo ku nyathi thwon dhiang’.’

23 “‘Kinde m’idaru dwoke leng’ ni dubo, ibithiero nyathi thwon dhiang’ acel ma mulima mbe i kume kud i kind dhieng’ man nyog urombo acel ma mulima mbe i kume mi dwol. 24 Ibithierogi ni Yehova, man julam ucikiri nikonjo kadu i wigi man nithierogi ni lam m’awang’a ma boo ni Yehova. 25 Pi nindo abiro, ibithiero nyog diel acel kubang’ ceng’ ni lam mi dubo man bende nyathi thwon dhiang’ acel m’i kind dhieng’ man nyog urombo acel mi dwol; ibithiero leya ma mulima mbe i kumgi. 26 Pi nindo abiro, jubitimo adunya pi pemlam man jucikiri nidwoke leng’, e jubikethe i tic. 27 Kinde ma nindone bithum, niwacu i nindo mir abora man yor i ng’eye, julam bithiero lam mwu m’awang’a ma boo man lam mi kwiyocwiny iwi pemlam; e anyong’a binega i kumwu,’ Rwoth Ubimo ma Malu Ngbir Yehova wacu.”