Yesu unyayu rec ario ku mukati abic ni dhanu dupa

Jukwenda 12 giai girweyo lembanyong’a i Galilaya ndri ndri, kawoni gibekoro ni Yesu “pi gin ceke ma gitimo, ku gin ceke ma giponjo.” Ma jiji mbe giol. Re asu dhanu dupa ubebino i bang’gi, jumoko ke ubecidho, uketho gimbe kadok ku saa mi camu cam. Yesu uyero igi kumae: “Wun giwu wubin cen ka ma ngele, wuyom tundu.”​—Marko 6:30, 31.

E julub gimaku yei, copere ceng’ini ku Kapernaum man gicidho kaka m’upondo yo nyangu mi kulo Yordani nikadhu Bethsaida. Dhanu mapol unenogi, jumange ke uwinjo awinja nia gicidho. E dhanune gicokiri giringo i tokgi ku dhu wat ku dhu wat nitundo kaka ma yei mi julub unyiko i ie.

Yesu uwok kud i yei man eneno udul dhanu, e kisa umake i kumgi kum gibedo ve rombe ma jakwac migi mbe. E ecaku “ponjogi ku gin dupa” iwi Ker pa Mungu. (Marko 6:34) Bende ekeyo kum “ju ma can keyo kum unegogi.” (Luka 9:11) Kinde ma saa ucaku nyang’ julubne giyero ire kumae: “Kakeni ng’om ngele, nindo de daru kadhu: dong’ ilal udul dhanu, kara gicidh i pacu, ging’ieu cam igi.”​—Matayo 14:15.

Yesu udwoko igi kumae: “Can cidho kamange negogi ngo; wumi igi cam.” (Matayo 14:16) Kadok Yesu ung’eyo lembe m’ebecitimo de, re emulo i Filipo ku penji mae: “Wabing’iewo kwen kani kara joni gicami?” Epenjo Filipo dre pilembe en re ma thugi ni ceng’ini ku Bethsaida. Kadok cam ma jubing’iewo de copo romo dhanu ngo, pilembe fodi jumaco kende ci copo bedo 5 000. Ka julund jukwanu mon kud awiya zoo ke, wend dhanu copo bedo rukeno wang’ ario! Filipo dwoko kumae: “Kwen mi denarii dak ario de ciromo kugi ngo, ma ka ku bang’gi nzu ging’wenyo nyanok nyanok [denarii acel utie cul mi tic ma jutimo bang’ acel].”​—Yohana 6:5-7.

Saa moko nyo pi ninyutho nia etie lembe ma copere ngo nimio cam ma copo romo dhanu maeno ceke, Andrea uyero kumae: “Nyathinyir (jalawobi ma nyanok) acel ni keni, ma lungu kwend nganu abic ni kude, ku rec ario: ento maeni ang’o i kind [udul] ma kumeni?”​—Yohana 6:9.

Eni utie dwi mir adek kunoke ang’wen, iwang’ Kadhukuwijo mi oro 32 R.M., man lum utie numu maber iwi got. Yesu ung’olo ni julub nia giyer dhanu upokiri i ungu mi pier abic abic ku dak acel acel. Ing’eye eting’o mukati abic ku rec ario man edwoko foyofoc ni Mungu. E eng’wenyo i mukati man epoko i rec. Yesu umio camne ibang’ julub kara gipoke ni dhanu. Lembe mi zungo utie nia dhanu ca ceke gicamu man giyeng’!

Yor ing’eye Yesu uyero ni julubne kumae: “Wucok kodine (donge) m’udong’, kara gin moko kud urwiny.” (Yohana 6:12) E gicoko dong’ cam m’udong’ upong’o katoko 12!