Julub ang’wen udoko judwar dhanu

Kinde ma dhanu mi Nazareti gimito gineg Yesu, eai ecidho i adhura mi Kapernaum, ceng’ini ku nam mi Galilaya ma julwong’o bende, “nam Genezareti.” (Luka 5:1) Eno upong’o lembila mi buku pa Isaya m’uwacu nia dhanu mi Galilaya ma gibekwo i dhu nam, gibineno der ma lee.​—Isaya 9:1, 2.

I Galilaya keni de, Yesu ubemedo asu nirweyo nia “Ker mi polo ni ceng’ni.” (Matayo 4:17) Yesu uwok unwang’u julubne ang’wen. Julub maeno gikegibino kude i wang’e de, re kinde ma giloko kud i Yahudi, julubne gidok kendo ikum dwaru nam. (Yohana 1:35-42) Kawoni dong’ ubekwayu gibed karacelo ku Yesu saa ceke, kara ginwang’ ponji ma bikonyogi nitimo tic saa ma Yesu bibedo mbe.

Kinde ma Yesu ubewotho i dhu wat egam eneno Simon Petro kud umin ma Andrea man juwagi mange, gibeyiko wang’ voi migi. Yesu ucidh uidho i yei pa Petro man ewacu ire nia ekecwal yeine nyanok i pii. Kinde ma jucwalu yei uweko dhu wat, Yesu ubedo i ie man ecaku niponjo udul dhanu m’ucokiri keca ku lemandha iwi Ker pa Mungu.

Ing’eye, Yesu uyero ni Petro kumae: “Cwal ka ma thuth, wulur voi i pi kara wutwom.” Petro udwoko kumae: “Japonji, wamula ku tic ku diewor soro, e wakwanyu gin moko ngo: ento kum lem peri abiluro voi.”​—Luka 5:4, 5.

Gilund gibolo voi man gimaku rec lee mandha ma dong’ voi ucaku yec ayeca! E nyapio pio, gilwong’o judwar m’ubino ceng’ini kugi kara ubin ukonygi. Gipong’o yei ario zoo ku rec, e yei udoko pek man ucaku mwony. Saa ma Petro uneno lembuno, egam epodho piny iwang’ Yesu man eyero ire kumae: “Koiweka, e Rwoth; kum an a jadubo.” Yesu udwoko ire kumae: “Lworo kud unegi; ugambre kawono ibitwomo dhanu.”​—Luka 5:8, 10.

Yesu uwacu ni Petro gikud Andrea kumae: “Wulub ng’eya, abidwokowu ni junam mi dhanu.” (Matayo 4:19) Elwong’o judwarnam mange ario: Yakobo giku Yohana ma gibino awiya pa Zebedayo. Ndhundhu nica, gin de giyio lwong’o pare. Ju ang’wen maeno giweko tic migi mi dwar man gicaku lubo tok Yesu saa ceke.