Jufarisayo gipenjo ng’atu moko pi wang’e m’ukei

Jufarisayo giyio ngo nia Yesu ukeyo wang’ ng’atu ma junyolo abinga, pieno gimito gikegiwec ku junyodo pare. Junyodo parene ging’eyo nia juromo niriemogi “woko kud i kacokiri.” (Yohana 9:22) Ng’atu ma ka Juyahudi giriemo kud i kindgi, winjiri bedo mbe ikind Juyahudi ku ng’atuca, man lembene kelo matoke marac ni juruot pare.

Jufarisayo gipenjo junyodo pare ku penji ario ma e: “Maeni wodwu, ma wuwacu nia junyole ma wang’e cori? E ka kawono ke eneno piny nenedi?” Junyodo gidwoko igi kumae: “Wang’eyo nia maeni en e wodwa, nia junyole de ma wang’e cor: ento maram eneno ko piny kawono, wang’eyo ngo.” Kadok nwang’u nyo nyathin migi ular ukoro igi lembe de, re gidwoko lembe ku rieko, giwacu kumae: “Wupenje; wang’e teng’ni ebiyero gire.”​—Yohana 9:19-21.

Pieno, Jufarisayo gimito ginyai lworo i jalawobine kara ginwang’ thelembe moko ikum Yesu. Gipenje kumae: “Mi yung ni Mungu: wang’eyo nia ng’atuni en e jadubo.” Ng’atu ma jukeyo wang’e udieng’ ungo ku lembe migi, eyero igi nia, “Kadok en e jadubo, ang’eyo ngo: ang’eyo gin acel, nia, naka wang’a cor, kawono re aneno piny.”​—Yohana 9:24, 25.

Calu ma fodi lembene unyang’u ngo wigi, gimediri nipenje nia, “Etimi nenedi? Eyabu weng’i nenedi?” E ng’atuno udwoko igi ku tegocwinye kumae: “Ayero iwu kawono, e wuwinjo ngo; wuyenyo wuwinj lembene kendo nedi? Wun bende wuyenyo wudok julubne?” Lembuno ukeyo i Jufarisayo, uketho giwacu ire ku kwinyo kumae: “In i jalubne; ento wan wa julub Musa. Wang’eyo nia yang’ Mungu weco ku Musa: ento pi ng’atuno, wang’eyo ngo ka m’eai i ie.”​—Yohana 9:26-29.

Lembene uzungo i ng’atuno, uketho eyero kumae: “Maeni en e gin ma wang’u i jo, nia wung’eyo ngo ka m’eai i ie, enke eyabu wang’a.” Emedere niyero lembe m’unyutho nia andha Yesu tie ng’atu ma Mungu winjo man m’ejolo. Ewacu kumae: “Wang’eyo nia Mungu winjo weg dubo ngo: ento tek ng’atu moko jarwo ni Mungu, etimo yeny ma ie yenyo de, e ewinje. Ugambre ma ng’om uthekre fodi juwinjo ngo nia ng’atu moko yabu wang’ ng’atu ma junyole ma wang’e cor.” Lembuno uketho edaru ku wec ma e: “Tek ng’atuno ai ba Mungu ngo, ecopo timo gin moko ngo.”​—Yohana 9:30-33.

Calu ma nikwero lembe ma ng’atuno ubeyero tie tek ni jufarisayo, giyero kumae: ‘Junyoli i dubo man iponjo wani? E girieme woko.’​—Yohana 9:34.

Kinde ma Yesu uwinjo lembe maeno, ecidh enwang’u ng’atuno man epenje kumae: “Iyio ni Wod Mungu?” Edwoko ire kumea: “En e ng’a, Rwoth, kara ayi ire?” Yesu uyero terere kumae: “Inene, man en e en ma wubeweco wukude nini.”​—Yohana 9:35-37.

Ng’atune udwoko ire kumae: “Rwoth, ayio.” Epodho piny i wang’ Yesu pi ninyutho nia etie ku yioyic man ku woro ire. Pieno Yesu uwacu ire kumae: “Kum lembapoka abino i ng’ombuni, kara ju ma neno piny ungo ginen; man kara ju ma neno piny ke gidok ni abinga.”​—Yohana 9:38, 39.

Jufarisayo ging’eyo nia gitie ngo abinga. Nyo gitie ngo abinga kadok bende i rwom migi ma gikethiri ko gigi nia gitie jutelwic mi tipo? Gicero bang’gi ku penji ma e: “Wan bende wan abinga?” Yesu ugamu dhoggi ewacu kumae: “Tek wun abinga, kuno di dubo mbe kudu: ento kawono wuwacu kumae, Waneno piny: kum kumeno dubo mu dong’.” (Yohana 9:40, 41) Ka nwang’u gitie ngo juponji mir Israel, nwang’u jucopo ninyang’ nia pirang’o gibekwero Masiya. Kwer ma gikwero ko Yesu utie igi ni dubo madit, pilembe ging’eyo Cik.