Yesu utimo udu ma dongo i Kapernaum

Yesu uai ulwong’o julub ang’wen gibed judwar dhanu; elwong’o Petro, Andrea, Yakobo man Yohana. Kawoni ceng’ Sabatu uromo man gin ceke gicidho i kacokiri moko ma nwang’ere i Kapernaum. Yesu ubeponjo i kacokirine man kite m’ebeponjo ko ubewang’u i dhanu lii. Ebeponjo ngo calu jugorcik ento ve ng’atu ma tie ku dito.

I ceng’ Sabatu maeno, ng’atu ma nico moko ma pajogi umondho i ie ubino nuti. E wang’ acel keca ng’atuno ugam ukok matek kumae: “Lembe mwa ang’o wakudu, in i Yesu ma Janazareti? ibino ninyothowa? ang’ei in i ng’adi, ma Ng’atu Maleng’ pa Mungu!” Yesu ujuko pajogi ma ni i ng’atuno man eyero kumae: “Bed ling’, ai woko kud i ie!”​—Marko 1:24, 25.

E ndhundhu nica, tipo m’ucido uredho ng’atune i ng’om man ekok ku dwande ma tek. E ewok kud i ie “ma k’etime rac ungo.” (Luka 4:35) Dhanu m’ubino i kacokiri igi wang’ lii man gipenjo kumae: “maeni ang’o? . . . ku ng’ol ejuko cil tipo m’ucido, e giwore.” (Marko 1:27) Rwong udu maeno ugam uyik i Galilaya ceke.

Yesu ku julubne giai kud i kacokiri man gicidho yo pa Simon Petro. Kuca ginwang’u malaria ma tek ubetimo dhamaru Petro. Julub gigam gikwayu Yesu ku kisa nia ekonye. E Yesu ucoro ibang’e, emaku cinge man eting’e malu. Wang’ acel kume ukei man ecaku timo ni Yesu ku julubne, copere ecaku tedo igi cam.

I saa mi mwony pa ceng’, dhanu uai kud i gund adhura ceke ukelo jurutwoyo migi i pacu pa Petro. E eni eni gipong’ i the ot pa Petro. Gibino timo ang’o? Giyenyo jukei kumgi. Pieno, ‘ju ceke m’ubino ku dhanu ma kumgi lith ku tho ma kwonde tung’ tung’ gikelogi i bang’e; man eketho cinge i kumgi kubang’gi nzu, ecangugi.’ (Luka 4:40) Andha, Yesu ukeyo kit twoyo moko ci ma jukelo ibang’e, calu ma jular juewo. (Isaya 53:4) Ewodho kadok pajogi kud i dhanu. Kinde ma pajogi ubewok, gikok nia, “In i Wod Mungu.” (Luka 4:41) Re Yesu ujukogi man emito ngo giweci kadok nyanok de. Ging’eyo nia Yesu tie Kristu man ebemito ngo giketh junen nia ve gibetimo ni Mungu mandha.