Yesu ung’iyo jukwenda apar ario

I ng’ey ma Yesu urweyo pi oro acel ku nusu, ugam ukwayu etim ng’iyong’ic moko ma pire tek. Ebing’iyo jukani pi nitimo tic karacelo kude? Jukani m’ebiponjo pi nitelo wi cokiri mi Jukristu? Pi nitimo ng’iyong’ic maeno, Yesu ubino ku yeny mi telowic pa Yehova. Pieno, eidho iwi got kaka m’ecopo bedo i iye kende, man erwo diewor traka. Kugweno, ecoko julub moko karacelo man eng’iyo jukwenda 12 kud i kindgi. Nyo ing’eyo nying’gi de? Nying’gi ubino Pethro, Andrea, Yakobo, Yohana, Filipo, Bartholomayo, Thoma, Matayo, Yakobo ma wod Alfayo, Thadayo, Simon, man Yuda Iskarioth.

Jukwenda apar ario maeno gibed giwotho karacelo ku Yesu. I ng’ey ma Yesu uponjogi, eorogi gicidh girwey kendgi. Yehova ugam umiyo igi copo mi wodho pajogi man mi keyo kum dhanu.

Yesu ulwong’o jukwenda apar ario maeno jurimbe man ebedo ku genogen i wigi. Jufarisayo gibed giparu nia jukwenda gibino dhanu m’usomo ngo man ma pigi de ung’eyere ngo. Ento Yesu uponjogi ku tic ma gibitimo. Gibibedo karacelo ku Yesu i saa ma pire tek mandha i kwo pare. Calu ve i wang’ tho man i ng’ey cer pare. Calu Yesu, jukwenda ma pol gibino dhanu mi Galilaya. Jumoko m’i kindgi gibino wegi mon.

Jukwenda gibino bende dhanu ma gitie ku dub’alaga man gibed gitimo kosa. Saa moko gibed giweco m’umbe niparu i lembe man gibed gitimo ng’iyong’ic ma cuu ngo. Bende, gibed giciro ngo lembe, gibed giteliri nia ng’a ma pire tek nisagu. Ento gibino dhanu ma beco m’umaru Yehova. I ng’ey ma Yesu bidok i polo, gibibedo ju ma kwong’a ma bitimo lembe ma pire tek i cokiri mi Jukristu.