PONJI MI 90
Yesu utho iwi got Golgotha
Judongo mi julam gitero Yesu i kal pa jabim. E Pilatho uwok upenjogi kumae: ‘Adote ma kani ma wukelo i kum ng’atuni?’ Gidwoko ire kumae: ‘Ebekethere nia en ubimo!’ Pilatho upenjo Yesu kumae: “In i Ubimo mi Juyahudi?” Yesu udwoko ire kumae: “Ker para tie ngo mi ng’om maeni.”
E Pilatho ugam uoro Yesu i bang’ Herode m’utie jabim mi Galilaya pi nineno ka nyo ecopo nwang’u kosa moko iwi Yesu. Herode unwang’u ngo lembe moko ma rac iwi Yesu man edwoke kendo i bang’ Pilatho. I ng’eye, Pilatho uyero ni dhanu kumae: ‘Nik’ebed Herode, kadok an de anwang’u ngo kosa moko iwi ng’atuni. Abigonye.’ Udul dhanu gikok kumae: ‘Nege anega!’ Juaskari gifodo Yesu ku del, ging’ulo lau i kume man gigoye. Bende, gidolo uthac mir ukudho man giroyo i wiye, e gicaku caye kumae: ‘Moth iri, Ubimo mi Juyahudi.’ Pilatho uwacu ni udul dhanu kendo kumae: ‘Anwang’u ngo lembe ma rac i ng’atuni.’ Ento gikok kumae: “Gure iwi yen!” Pieno, Pilatho ugam umiye i cing’gi kara ginege.
Gitero Yesu kaka ma julwong’o Golgotha. Giwok gigure iwi yen man giting’e malu. Yesu urwo kumae: ‘Vwa, wek igi, kum ging’eyo ngo lembe ma gibetimo.’ Dhanu gicayu Yesu kumae: ‘Bodhiri giri tek in i Wod Mungu, lor piny ku wi yen!’
Acel m’i kind jukwo ma juguro i ng’et Yesu uwacu ire kumae: “Poy pira kinde m’ibibino i Ker peri.” Yesu ung’olo ire kumae: “Wabibedo wakudi i Paradizo.” I saa mi reto, mudho ugam uumo ng’om bii pi saa adek. Jumoko m’i kind julub pa Yesu gicungo ceng’ini ku yen ma juguro Yesu i wiye, man Maria ma min de ubino keca. E Yesu uyero ni Yohana nia edok egwok Maria calu ve min ma buu.
Tokcenne, Yesu uyero kumae: “Edaru timere kakare!” E ekulo wiye man egamu ng’ete wang’ ma tokcen. I saa nica, digidi ma dit uyengo ng’om. I hekalu ke bongu ma nwang’ m’upoko kind Kamaleng’ ku Kamaleng’ m’usagu ukak dra niai i wiye nitundo i there. Jadit mi juaskari uyero kumae: “Andhandha ng’atu maeni ubino Wod Mungu.”
“Kadok nwang’u lembang’ola pa Mungu gi dupa rukani de, re gidoko “eyo” ni kume.”—2 Jukorintho 1:20