KAPANG BUKU YAMU Watchtower
Watchtower
KAPANG BUKU I YAMU
Alur
  • BIBLIA
  • GIRASOMA
  • COKO
  • lfb wic 63 mba. 150-151
  • Wec ma jugoro i kor ot

Thenge maeni umbe ku video.

Tim kisa, kosa moko uwok rek.

  • Wec ma jugoro i kor ot
  • Nwang’ ponji niai kud i kpawa mi Biblia
Nwang’ ponji niai kud i kpawa mi Biblia
lfb wic 63 mba. 150-151
Cing’ ubegoro wec i kor ot

PONJI MI 63

Wec ma jugoro i kor ot

I ng’ey oro moko, Belcazar udoko ubimo mi Babeli. E i diewor acel, ubimo ugam ulwong’o dhanu elufu acel ma pigi tek mi ng’om pare i agba, niwacu i nambu. Eng’olo ni jutic pare nia gikel kikombe mi mola ma kwar ma Nebukadnezar ucoko kud i hekalu pa Yehova. E Belcazar karacelo ku ju m’elwong’o gimadhu pigulok kud i kikombene man gipaku mungu m’araga migi. Mbwang’ kumeni, cing’ dhanu uwok man ucaku goro wec moko mi zungo i kor ot ma gibecamu i iye.

Cwiny Belcazar ung’abere ma rac. E elwong’o jururieko pare ceke man eng’olo igi kumae: ‘Ng’atu ma tek bituco the wec maeni, abikethe ni ng’atu mir adek ma pire tek i ker mi Babeli.’ Gipimo kpe, ento ng’atu moko acel de mbe m’i kindgi ma romo tuco thelembene. I ng’eye, min ubimo ubino man ewacu ire kumae: ‘Ng’atu moko nuti ma nyinge Daniel m’ubed utuco thelembe ni Nebukadnezar. Ecopo koro thelembe mi wec maeni iri.’

Daniel ugam ubino i bang’ ubimo. Belcazar uwacu ire kumae: ‘Tekene isomo wec maeni man ikoro thelembene, abimiyo iri gwang’ mi mola ma kwar man abikethi ni ng’atu mir adege ma pire tek i ker mi Babeli.’ Daniel udwoko ire kumae: ‘Ambe ku yeny mi giramiya peri, ento abikoro iri thelembe mi wec maeni. Nebukadnezar ma wuru uting’ere, ento Yehova ujwige. Ing’eyo ma ber gin ceke m’ugam uwok i kume, ento in de ikwero niworo Yehova man imadhu pigulok kud i kikombe mi mola ma kwar mir hekalu pare, uketho Mungu ugoro wec ma e: Mene, Mene, Tekel man Parsin. Thelembene utie nia Jumedi ku Jupersi gibivoyo Babeli man ibibedo ubimo kendo ngo.’

Juaskari pa Kuro gibemwomo pii man gibeidho i dhugang’ mi Babeli

Ubed unen ve nia ng’atu moko mbe ma romo voyo Babeli i lwiny. Gang’kidi ma dhoge lee man pii ma thuc ugam utwodo adhurane tingili. Ento i diewor nica, Jumedi ku Jupersi gimaku adhurane. Kuro m’ubimo mi Persi uwiro wi pii kara juaskari pare gicopo idho nitundo i dhugola gang’ mir adhura. Kinde ma gitundo, ginwang’u dhugola gang’ ubedo ayaba! Juaskari gimaku adhurane, givoye ku lwiny man ginego ubimo. E Kuro ugam udoko ni jabim mi Babeli.

I kind oro acel, Kuro utwong’o kumae: ‘Yehova uwacu ira nia agom hekalu pare kendo i Yerusalem. Ng’atu moko ci m’i kind dhanu pare m’umaru nikonyo utie agonya nicidho.’ Pieno tap calu ma Yehova ular ung’olo, Juyahudi dupa gidok i Yeruzalem i ng’ey oro 70 niai ma jugam junyothe. Kuro uoro mola ma kwar ku kikombe mi mola ma tar man ajeni ma Nebukadnezar ugam ucoko kud i hekalu. Nyo ineno kite ma Yehova ugam utiyo ko ku Kuro pi nikonyo dhanu pare?

“Edaru podho! Babeli ma dit udaru podho, man edoko kabedo mi pajogi.”—Lembanyutha 18:2

Penji: Wec ma jugoro i kor ot thelembene utie ang’o? Yehova uyero ni Kuro nia etim ang’o?

Ezra 1:1-11; Daniel 5:1-30; Isaya 44:27–45:2; Yeremia 25:11, 12

    Girasoma mi dhu Alur (1993-2026)
    Woki
    Mondi
    • Alur
    • Ore ni ng'atini
    • Lembe m'imaru
    • Copyright © 2025 Watch Tower Bible and Tract Society of Pennsylvania
    • Cik mi tio kude
    • Cik mi Gwoko Lembamung'a
    • Paramètres de confidentialité
    • JW.ORG
    • Mondi
    Ore ni ng'atini