PONJI MI 84
Yesu uwotho iwi pii
Yesu ubed ukeyo kum dhanu man ebed ecero ju m’utho, bende ebino ku copo iwi yamu man iwi koth. I ng’ey ma Yesu ucidh urwo iwi got, eloko wang’e man eneno avuvu ubekoto iwi nam mi Galilaya. Jukwenda pare gibino i yei, man gibino ii ku goyo ngai kud i kind yamu ma tek. Yesu uloro piny man ecaku wotho iwi pii pi nibino i bang’ yei migi. Kinde ma jukwenda gineno ng’atu moko ubewotho iwi pii, lworo umakugi ma rac. Ento Yesu uwacu igi kumae: ‘Tie an. Lworo kud unegwu.’
Pethro uyero ire kumae: ‘Rwoth, tekene tie in andha, yer ira abin i beng’i.’ Yesu uwacu ire kumae: ‘Bin i bang’a.’ E Pethro ulor kud i yei man ewotho ku wi pii i kind avuvu pi nicidho i bang’ Yesu. Ento kinde ma Pethro uwok ceng’ini ku Yesu, eneno avuvu man lworo umake. E ecaku mwony. Pethro ukok kumae: ‘Rwoth, lara do!’ Yesu ugam umaku cinge man ewacu ire kumae: ‘Pirang’o iweko jiji umondo i ii? Yiyoyic peri ni kani?’
Yesu giku Pethro gigam giidho i yei, e avuvu ucungo wang’ acel. Iparu nia jukwenda giwinjiri nenedi? Giwacu kumae: “In i Wod Mungu andha.”
Tie ngo i saa maeno kende re ma Yesu unyutho nia etie ku copo iwi yamu. Nindo mange de kinde ma Yesu karacelo ku jukwenda pare gibekadhu nam, ecidh evuto i the yei. Kinde m’enindo, avuvu ma tek ugam utuk. Angongo pii ucorere i yei man pii ugam upong’o yei bik. Jukwenda gicewo Yesu ma gibekok kumae: ‘Japonji, wabecitho! Konywa do!’ E Yesu uai man eyero ni nam kumae: “Bed ling’!” E ndhu ndhu nica, yamu man nam ugam ucungo ting’. Yesu upenjo jukwenda kumae: ‘Yiyoyic mwu ni kani?’ E giweco i kindgi kumae: “Kadok yamu ku nam de gibewore.” E jukwenda ginyang’ nia ka giketho genogen migi ceke iwi Yesu, gimbe ku yeny mi lworo gin moko acel de.
“Ka nwang’u ayiyo ngo nia abineno bero pa Yehova i ng’om mi ju ma kwo, nwang’u eni ani kani.”—Zaburi 27:13