PONJI MI 92
Yesu unyuthere ni judwarnam
Nindo moko i ng’ey ma Yesu unyuthere ni jukwenda, Pethro ung’iyo nia kwayu ecidh edwar rec i nam mi Galilaya. E Thoma, Yakobo, Yohana man julub mange de gicidho karacelo kude. Gidwaru rec traka, ento gimaku ngo kadok acel de.
Urwonde pir kugweno, gineno ng’atu moko ma co ucungo i dhu wat. Egam elwong’ogi kud i dhu wat man eyero igi kumae: ‘Wumaku rec moko de?’ Gidwoko ire nia ‘ungo!’ E ng’atune uyero igi kumae: ‘Wubol voi i ng’et yei ma yor acwic.’ Kinde ma gibolo voi, rec umoko bik i voine ma giromo tele ngo i yei. Yohana unyang’ ndhu nia ng’atu maeno utie Yesu man eyero kumae: “Eca tie Rwoth!” E wang’ acel, Pethro upiey i pii man ekwang’ nitundo i dhu wat. Julub mange gilubo toke ku yei.
Kinde ma ginyiko ku yei i dhu wat, gineno mukathi ku rec iwi mac. Yesu uwacu nia gimii kum rec migi moko gimedi i kum cam. I ng’eye, ewacu igi nia ‘gibin gicam.’
Kinde ma gidaru cam, Yesu upenjo Pethro kumae: ‘Nyo imara ma sagu dwaru rec?’ Pethro udwoko kumae: “Eyo, Rwoth; ing’eyo nia ameri.” Yesu uwacu ire kumae: ‘Dong’ mii cam ni nyithi rombe para.’ Yesu upenje kendo kumae: ‘Pethro, nyo imara?’ Pethro udwoko kumae: “Rwoth; ing’eyo nia ameri.” Yesu uyero ire kumae: “Kway rombe para ma thindho.” Yesu upenje wang’ mir adege. E can umondo i Pethro lee mandha. Egam edwoko ni Yesu kumae: “Rwoth, ing’eyo gin ceke; ing’eyo nia ameri.” Yesu uwacu ire kumae: “Mii cam ni rombe para ma thindho.” I ng’eye, eyero ni Pethro kumae: “Mediri nilubo toka.”
“[Yesu] wacu igi kumae: ‘Wulub toka man abidwokowu judwar dhanu.’ E ndhundhu nica giweko voi migi man gilubo toke.”—Matayo 4:19, 20