PONJI MI 103
“Ker peri bin”
Yehova ung’olo kumae: ‘Wak, can, remokum man tho bibedo nuti kendo ngo. Abiweyo piwang’ pet kud i wang’gi. Wigi biwil i kum lembe ma reco ceke m’ubed utimere.’
Ku kwong’a Yehova uketho Adamu giku Eva i podho mir Eden kara gikwo ku kwiyocwiny man mutoro. Ugam ukwayu giwor Weggi m’i polo man ginyol gipong’ ng’om. Ento Adamu giku Eva gijai ni Yehava, re lembakeca pa Yehova ulokere ngo nyanok de. I buku maeni, waneno nia lembe ceke ma Mungu ung’olo pong’o kubang’e kubang’e. Tap calu m’eng’olo ni Abraham, Ker pare bikelo mugisa ma yawe mbe iwi ng’om.
Ceng’ini eni, Sitani, pajogi pare man dhanu ceke ma reco gibibedo mbe. Dhanu ceke ma kwo bitimo thier ni Yehova. Wabiremo ngo man wabitho de ngo. Ento kubang’ ceng’, wabibeai nwang’u watie ku tego lee man watie kud anyong’a pilembe wakwo. Ng’om bidoko ni paradizo. Ng’atuman bibedo ku cam ma beco man ebigiero udi ma beco. Kura mi dhanu bibedo ma ber, ento gibibedo ngo dhanu ma kwiny kadi weg rop. Lei m’i lum bilworowa ngo man wan de wabilworogi ngo.
Ebibedo anyong’a ma yawe mbe kinde ma Yehova bicaku cero ju m’utho. Wabijolo dhanu ma githo con calu ve Abel, Noa, Abraham, Sara, Musa, Rutha, Esther man Daudi. Wabitimo tic karacelo kugi pi nidwoko Ng’om zoo udok ni paradizo. Saa ceke wabikoso ngo tic ma beco ma wabitimo.
Yehova ubemito in de ibed keca. Ibituc ning’eyo Yehova i ayi ma nwang’u fodi iparu de ngo. Dong’ niai kawoni man pi rondo ku rondo, mediri nicoro ceng’ini i vut Yehova kubang’ ceng’!
“Eromo kudi, Yehova Mungu mwa, ya jumii iri dwong’, ku yung man tego; pilembe icwiyo piny ceke.”—Lembanyutha 4:11