Yehova tie Mungu m’ukwayu ning’eyo kokoro

NYO cicopere nia lembe moko ma pire tek lee i kwo ubekosi? Kan ing’eyo lembe nyanok kende iwi Mungu, e nwang’u andha lembe moko ubekosi. Nenedi? Pilembe dhanu milioni dupa ginwang’u nia ning’eyo Mungu ma Biblia ukoro pire, miyo bero lee dit i kwo. Bero maeno caku tap i saa m’ikwong’o ng’eye man emedere pi rondo ku rondo.

Yehova Mungu m’uketho jukiewo Biblia ubemito wang’eye. Jagor Zaburi uyero kumae: “Kara ging’ei nia in i kendi, ma nyingi Yehova, ini Ng’atu ma malu Ngbir iwi ng’om ngung’.” Enyang’ nia ning’eyo Mungu utie pi bero mwa giwa. Biblia uyero kumae: “An a Yehova Mungu peri, m’aponji ni kuloka [peri].” Ning’eyo Yehova Mungu ma Malu Ngbir miyo iwa bero ma kani?​—Zaburi 83:18; Isaya 48:17.

Bero ma lee ma ng’eyong’ec maeno miyo iwa utie nia wanwang’u telowic pi ninyego ku lembe ma wakadhu i iye kubang’ ceng’, watie ku genogen ma nging’ nging’ pi nindo m’ubino, man watie ku kwiyocwiny mir adunde. M’usagu zoo, ning’eyo Yehova konyowa nibedo ku nen ma tung’ ku mi dhanu iwi penji ma pigi tek akeca ma dhanu ceke gibenwang’iri i wang’e tin eni. Gitie penji ma kani?

Thelembe mi kwo peri tie ang’o?

Kadok nwang’u tin dhanu timo mediri lee i lembe m’uneno teknoloji de, re asu gimediri nipenjiri ku penji ma pigi tek ma e: ‘Pirang’o an’iwi ng’omi? Abicidho kani? Nyo ndhu kwone de ceke eni?’ Ka ng’atini unwang’u ngo jibu ma tap mi penji maeno, enwang’u nia thelembe mi kwo pare umbe. Nyo dhanu ma pol ginwang’iri kumeno? I sayusac moko ma jutimo i Allemagne i thum mi oro 1990, nusu mi dhanu ma jupenjo, wang’ ma pol kunoke saa moko ginwang’u nia ve thelembe mi kwo umbe. Saa moko nyo lembe ma kumeno ubekadhu bende kaka m’ikwo i iye.

Ka ng’atu moko ubenwang’u nia thelembe mi kwo pare mbe, edoko ire lembe ma tek nibedo ku lembakeca i kwo pare. Jumoko ginwang’u nia timba dong’ gimiyiri i tic mi sende ma lee kunoke dong’ gicok lonyo re ma lee. Ento asu i ng’eye ginwang’u nia kwo migi tie vogolo. Nibedo m’umbe lembakeca i kwo timo jumoko rac magwei ma dong’ gimito ngo gimediri nikwo. Eno tie lembe ma nyaku moko ma leng’ mandha, ma nimakere ku buku moko (International Herald Tribune) udongo i “lonyo ma ndruk man gin moko ci m’eyenyo ubino nuti” unwang’ere ko. Kadok nwang’u ebino i lonyo ma kumeno de, ebino nwang’ere nia etie kende man nia thelembe mi kwo pare mbe. Enwang’u nia enegere cen, e nindo acel emwonyo yath ma nindo jo man junwang’u dong’ etho. Saa moko nyo ing’eyo dhanu moko ma gibino nwang’iri nia gitie kendgi e nyo gigam ginegiri cen.

Enre nyo idaru winjo dhanu moko uwacu nia sians copo konyowa nidaru lembe ceke ma wanwang’ara ko i kwo? Jurnal moko (Die Woche) ma wok kubang’ yenga i Allemagne uyero kumae: “Kadok nwang’u sians bewacu lembe mandha de, ento i lembe pa Mungu, e ng’ic. Paru ma nia piny ulokere aloka de umbe ku kony, man kadok rieko moko ma malu ma jutiyo ko pi ning’eyo timo mi piny ma thindho (physique quantique) ku paru ceke m’i iye ma belokere aloka de miyo ngo kony moko nyanok de.” Andha lembe dupa ma jururieko ginwang’u ukonyo jo ning’eyo kit kwo ma tung’ tung’ man ning’eyo bende lembe moko ma gibed giwiliri awila kara kwo ubed nuti iwi ng’om. Ento sians copo konyowa ngo ning’eyo nia pirang’o watie iwi ng’om man i ng’eye wabicidho kani. Ka wajengara ndhu iwi sians kende, e wabinwang’u ngo wang’ penji ma wapenjara ko iwi thelembe mi kwo. Calu ma jurnal moko (Süddeutsche Zeitung) uyero, “dhanu tie ku yeny mi telowic lee.”

M’usagu Jacwic, ng’a mange m’utie ku copo mi miyo telowic maeno? Calu ma ku kwong’a en re m’eketho dhanu ubed iwi ng’om, eng’eyo cuu nia pirang’o gin’i wi ng’om. Biblia ukoro nia Yehova ucwiyo dhanu kara gipong’ ng’om man kara gigwoke. I lembe ceke ma dhanu ubetimo, nwang’u gibecinyutho kite ma tung’ tung’ pa Mungu: bedopwe, rieko man mer pare. Ka wanyang’ i thelembe m’uketho Yehova ucwiyowa, e wang’eyo nia pirang’o wan’i wi ng’om.​—Thangambere 1:26-28.

Dong’ icopo timo ang’o?

Icopo timo ang’o kan i wang’e igam inwang’u ngo jibu mandha i wang’ penji ma e: ‘Pirang’o an’i wi ng’omi? Abicidho kani? Nyo ndhu kwone de ceke eni?’ Biblia ubekweyi nia ikeing’ey Yehova cuu mandha. Ku lapor Yesu uyero kumae: “Maeni en e kwo ma rondo ku rondo, nia giponj ning’eyo in m’i Mungu mandha i kendi, ku ng’atu m’ioro ma Yesu Kristu.” Wakweyi bende nia iceg kite ma tung’ tung’ pa Mungu i kwo peri, m’usagu zoo mer. Bende keth iri lembakeca mi bedo i kind dhanu ma gibikwo i the Ker pa Masiya. Eno biketho ibinwang’u thelembe mi kwo peri man ibibedo ku genogen ma ber mandha pi nindo m’ubino. Copere nia ibinwang’u jibu mi penji ma pigi tek ma nwang’u i wang’e ubed usendo wii zoo.​—Yohana 17:3; Eklizia 12:13.

Eno bibedo ku matoke ma kani i wii? Jalwo moko ma nyinge Hans ucikere ning’eyo jibu maeno.a Oro moko i wang’e, Hans ugam uyiyo lembe swa iwi Mungu, ento yiyoyic pare ubino mbe kud atelatela iwi kwo pare. Hans eno ma saa ceke nwang’u ni wi moto ubed utiyo ku yath ma merojo, mon ma ndhumba ubed ukadhu ngo i wang’e man ebed etimo lembe m’uturo cik. Ento ekoro nia ebed enwang’u nia “kwo [pare] tie vogolo man gin m’ubino nyang’e i kwo umbe.” Kinde ma Hans utundo i kind oro 20, eng’iyo nikeng’eyo Mungu en gire; e ecaku ponjo Biblia kilili mandha. Kinde m’eng’eyo Yehova cuu man eng’eyo thelembe mi kwo, Hans ugam uloko kwo pare man elimo batizo, edoko acel m’i kind Jumulembe pa Yehova. I kind oro apar m’ukadhu, etimo tic mi saa ceke. Eyero kamaleng’ kumae: “Nitimo ni Yehova re m’utie ayi ma ber mandha mi kwo. Gin ma juromo pore ko acel de mbe. Ning’eyo Yehova uketho anwang’u thelembe mi kwo para.”

I andha, thelembe mi kwo utie ngo kende kende lembe moko ma dhanu ceke gibedieng’ i kume. Lembe m’ubemedere ninyothere i ng’om uketho penji moko mange ma pire tek re m’ubesendo wi dhanu ma dupa.

Pirang’o lembe maeni utimere?

Kinde ma lembe moko ma rac utimere, saa ceke dhanu ma giboth kud i lembene gibed gipenjiri nia pirang’o lembene utimere? Kara ng’atini ubed ku copo mi ciro peko mi lembe maeno ceke, ukwayu enwang’ jibu mandha i wang’ penji maeno. Kan ungo, emedere asu nisendere man saa moko ava lembe ceke gam ai i kume. Ku lapor, wakenen lembe ma dhaku moko ma nyinge Bruni ma kawoni utie i kind oro 40 nicidho 60 unwang’ere ko.

Bruni ukoro kumae: “Oro moko udaru kadhu kawoni, nyara ugam utho. Calu m’ayiyo Mungu, asayu jukocwiny i bang’ japadhri mi kaka m’abedo i iye. Ewacu ira nia Mungu ugamu Susanne i bang’e i polo, man nia kawoni dong’ edoko jamalaika. Tho pare uketho anwang’u nia lembe ceke unyothere i ng’eta man eketho adagu bende Mungu pilembe en re m’egame.” Litho man can ma Bruni ubino nwang’ere ko umedere pi oro ma dupa. Bruni ukoro kumae: “Jamulembe pa Yehova moko unyutho ira niai kud i Biblia nia adagu Mungu mananu. Yehova ugamu ngo Susanne i bang’e i polo, man edoko ngo ni jamalaika. Twoyo m’unege utie kende kende adwogi mi koso bedoleng’ ma dhanu ulagu. Susanne ubenindo aninda i liel, ebekuro saa ma Yehova bidocere i iye. Aponjo bende nia Yehova ucwiyo dhanu kara gikwo rondo ku rondo i paradiso iwi ng’om, man nia lembe maeno bipong’o kago eni. Kinde m’acaku nyang’ nia i andha Yehova tie kit dhanu ma nenedi, acoro ceng’ini i vute man litho para ucaku jwik.”​—Zaburi 37:29; Tic mi Jukwenda 24:15; Jurumi 5:12.

Tin dhanu milioni dupa ginwang’iri ku peko ma tung’ tung’: peko ma ng’atini nwang’ere ko en gire, lwiny, ndru, kunoke peko ma wok rek. Yamu ugam ukadhu i kor Bruni kinde m’enyang’ niai kud i Biblia nia tie ngo Yehova re m’ubenyayu peko ma wanwang’ara ko, nia elar epangu ngo nia dhanu nwang’iri ku peko man nia ceng’ini eni ebidaru pekone zoo. Lemandha utie nia lembe ma reco ma tin ubemedere, ubenyutho nia dong’ wabekwo “i kajik” mi ng’om maeni. Alokaloka ma wan ceke wabeyenyo nia utimere dong’ ni dhu kutheru.​—2 Timoteo 3:1-5; Matayo 24:7, 8.

Ning’eyo Mungu

Hans giku Bruni gigam ging’eyo ngo lembe ma tap iwi Mungu. Giyiye m’umbe ning’eyo lembe dupa i wiye. Kinde ma gigam giting’o saa mi ng’eyo lembe dupa i wiye, eno umiyo igi bero lee. Ginwang’u jibu ma tap mi penji ma pire tek nisagu i nindo mwa eni. Eno uketho ginwang’u kwiyocwiny mir adunde man genogen pi nindo m’ubino. Jumulembe pa Yehova milioni dupa de ginwang’iri ku lembe ma kumeno.

Ng’atini caku ng’eyo Yehova kan ebeng’iyo i Biblia cuu mandha; kum en eno re m’ekonyowa ning’eyo Yehova man ning’eyo gin m’ekwayu i bang’wa. Eno tie tap lembe ma jumoko mi rundi ma kwong’a gigam gitimo. Luka m’ubino jakor lembatada man munganga ukoro nia dhanu mi cokiri mi Juyahudi i Beroya, i ng’om mi Giriki, “gijolo lembe [ma Paulo giku Sila giyero] kud ava ma lee; gibed ging’iyo i Lembagora cuu kubang’ ceng’ pi nineno ka nyo gin maeno utie kumeno.”​—Tic mi Jukwenda 17:10, 11.

Jukristu mi rundi ma kwong’a gibed gicokiri bende karacelo i cokiri ma tung’ tung’. (Tic mi Jukwenda 2:41, 42, 46; 1 Jukorintho 1:1, 2; Jugalatia 1:1, 2; 2 Juthesaloniki 1:1) Tin de etie kumeno. I cokiri ma tung’ tung’, Jumulembe pa Yehova gicokiri karacelo pi nitimo coko ma jupangu i ayi ma segi kara ukony dhanu gicor ceng’ini i vut Yehova man gitim ire kud anyong’a. Nicokiri karacelo ku Jumulembe mi cokiri moko utie ku kony lee. Calu ma dhanu gicaku lubo kite pa Mungu ma gibetimo ire thier, Jumulembe pa Yehova bende gicego kite ma Yehova en gire etie ko; kadok nwang’u gicege ngo ve en de. Pieno, nicokiri karacelo ku Jumulembe mange konyowa ning’eyo Yehova ma ber mandha.​—Juebrania 10:24, 25.

Nyo iparu nia nitimo kero maeno zoo pi ning’eyo Ng’atu acel kende ukadhu mukero? Andha ukwayu nitimo kero. Ento nyo eno tie ngo lembe m’ukwayere pi nitundo i lembakeca ma pol i kwo? Kepar pi kero ma ng’atu moko m’udikere i kwaya mi tuko mi nivo ma malu timo pi niyikere. Ku lapor, Jean-Claude Killy mi France ma tie jaratuko ma tek ma juringo ko iwi pey (skieur), m’ugam unwang’u médaille mi or i jeux olympiques, ukoro lembe m’ukwayu ng’atini utim kara eloy i kwaya mi tuko ma diko ng’om dupa. Eyero kumae: “Ukwayu icak yikiri oro 10 i wang’e man ilar ipang’ lembene oro dupa i wang’e, ibed ipar pire kubang’ ceng’ . . . Etie tic m’ukwayu iketh rieko peri man tego peri zoo i kume kubang’ nindo acel acel i kind oro.” Saa man tego maeno zoo pi kwaya moko ma saa mange kadhu dakika apar de ngo! Ento wabinwang’u bero ma lee man ma biriyo lee mandha ka watimo kero ning’eyo Yehova.

Nibedo ku winjiri ma ceng’ini nisagu

Ng’a dhe ma copo maru nia ekos gin moko ma pire tek mandha i kwo? Ng’atu moko mbe. Pieno, kan inwang’u nia kwo peri umbe ku lembakeca kunoke ibemito ing’ey nia pirang’o lembe ma reco ubetimere, dong’ miyiri ku tego peri ceke ning’eyo Yehova, Mungu m’umiyo iwa Biblia. Ning’eyo lembe i wiye copo loko kwo peri doko miero mandha, eno ke pi rondo ku rondo.

Pirang’o wabijigo ngo niponjo lembe iwi Yehova? Dhanu ma gicaku timo ire niai con de asu igi wang’ lii pi lembe ceke ma gidaru ponjo i wiye man pi lembe ma nyen ma gibemediri niponjo i wiye. Lembe maeno ma wabeponjo miyo iwa anyong’a man ketho wacoro ceng’ini i vute nisagu. Dong’ wek wan de wadik cing’wa ku jakwenda Paulo m’ukiewo kumae: “Ei! Berocwiny pa Mungu, rieko pare man ng’eyong’ec pare lee mire ma! Ninyang’ i pokolembe pare man i yo pare utie lembe ma tek mire ma! Kum ‘ng’a m’utuc ning’eyo paru pa Yehova, man ng’a m’udoko jamii juk pare?’”​—Jurumi 11:33, 34.

[Korolembe mi there]

[Paru ma nwang’ere]

Dhanu bemediri asu nipenjiri ku penji ma pigi tek ma e: ‘Pirang’o an’i wi ng’om? Abicidho kani? Nyo dhu kwone de ceke eni?’

[Paru ma nwang’ere]

“Kinde m’acaku nyang’ nia i andha Yehova tie kit dhanu ma nenedi, acoro ceng’ini i vute”

[Paru ma nwang’ere]

“Nitimo ni Yehova tie ayi ma ber mandha mi kwo. Gin ma juromo pore ko mbe. Ning’eyo Yehova uketho anwang’u thelembe mi kwo para.”