Nyo saa moko imito nisomo Biblia re parune udoguthum pi wagi thelembe moko m’urombo ku ma juweco pigi malu e? Ju dupa paru nia nisomo Biblia nyayu lworo i dhanu. Ento, icopo yero ang’o kan inwang’u nia Biblia copo konyi nibedo ku kwo mi mutoro man ma ber mandha? E ka dong’ tek inwang’u nia paru moko tie ma copo konyi niketho somne unyeng’i ke? Nyo icopo foyo nineno ndhu kadok nyanok ci bero ma Biblia copo miyo irii?

Kenen paru moko e mi dhanu moko m’unwang’u nia kinde ma gicaku nisomo Biblia ci ginwang’u bero dupa.

Ezekiel, ma oro pare 20 ku wiye ma nok, uyero kumae: “I wang’e, abedo calu ve ng’atu moko m’uberingo ku mutukari re m’ung’eyo ngo kaka m’ebecidho i iye. Ento, somo Biblia ukonya nibedo ku kwo ma tie ku thelembene. I Biblia anwang’u juk m’acopo tio ko kubang’ ceng’.

Frieda, ma tie bende ku oro 20 ku wiye ma nyanok, ukoro kumae: “Abedo ni ng’atu ma lembe ton i iye nya pang’ pang’. Ento nok nok ku somo Biblia, acaku nibimo wi kwinyo parane. Eno uketho adoko ni ng’atu ma kwo kude yot, man kawoni dong’ atie ku jurimo lee mandha.”

Dhaku moko ma oro pare tie 50 ku wiye kumeni ma nyinge Eunike uyero pi Biblia kumae: “Ebekonya nidoko ng’atu ma ber nisagu, man bende pi niweko kura para ma reco.”

Calu ma jurusom maeno man dhanu mange milioni dupa unwang’u, somo Biblia copo konyi nikwo kwo mir anyong’a ma lee. (Isaya 48:17, 18) Biblia copo konyi (1) nimaku yub ma cuu, (2) nitheyo mer ku jurimo m’atira, (3) ninyego ku olo, man (4) m’uloyo zoo, niponjo lemandha iwi Mungu. Juk mi Biblia uai i bang’ Mungu, eno uketho tek ilubogi ci ibiwondiri ngo nyanok de. Mungu copo miyo juk ma reco tak de ngo.

Lembe ma pire tek utie nicaku some. Paru ma kani ma bikonyi pi nicaku nisome yot yot man ma biketho somne unyeng’i?

Paru ma kani ma copo nikonyi pi ninwang’u anyong’a i som mi peri mi Biblia man pi ninwang’u bero lee i kum somne? Kenen paru ma e m’ukonyo dhanu dupa.

Nwang’ kaka ma ber. Say kaka ma ling’. Kab piny ceke ma copo langu wii kara iketh wii zoo i kum piny m’ibesomo. Lero ma cuu man yamu ma ng’ic de copo nikonyi pi ninwang’u bero lee i kum som peri.

Bed ku pidoic ma ber. Calu Biblia uai i bang’ Wegwa m’i polo, ibinwang’u bero lee i kume tek itie ku pidoic ma ve pa nyathin m’utie ayika niponjo lembe i bang’ won m’emaru. Tek itie ku paru moko ma reco m’ilar ibedo ko iwi Biblia, keii nikethogi cen kara Mungu copo niponji.​—Zaburi 25:4.

Rwo i wang’ nisomo. I Biblia junwang’u paru pa Mungu, eno uketho etie lembe mi zungo ngo nia watie ku yeny mi kony pare pi ninyang’ i iye. Mungu uciko nia ebimiyo ‘tipo ma leng’ ni dhanu m’ubekwaye.’ (Luka 11:13) Tipo ma leng’ copo nikonyi ninyang’ i paru pa Mungu. Nok nok, ebiyabu ng’eyong’ec peri pi ninyang’ “kadok i lembe ma thuc pa Mungu” de.​—1 Jukorintho 2:10.

Som pi ninyang’. Kud isom kende kende pi nikadhu iwi gin dupa. Par cuu mandha iwi lembe m’ibesomo. Penjiri ku penji ma calu ve: ‘Abeneno kite ma kani i bang’ ng’atu m’abesomo lembe i wiye e? Acopo nitiyo ku lembene i kwo para nenedi?

Keth lembakeca ma tap. Pi ninwang’u kony i kum som peri mi Biblia, say niponjo lembe ma copo nikonyo kwo peri andhandha. Icopo ketho lembakeca ma calu ve ma e: ‘Abemito niponjo lembe lee iwi Mungu en gire.’ ‘Abemito nidoko ng’atu ma ber, nico ma ber kunoke dhaku ma ber.’ E isom tap theng Biblia ma copo nikonyi kara ituc i kum lembakeca maeno.a

Lembe abic maeno bikonyi pi nicaku som peri. Dong’ icopo dwoko som perine ber ni sagu nenedi? Ibinwang’u lembene moko i thiwiwec m’ulubo.

Nyo eolo wi jo? Kunoke nyo enyang’ujo? Som mi Biblia peri bibedo nenedi? Adwogi m’ibinwang’u bibedo nimakere ku kite m’ibesome ko. Wakenen lembe m’icopo nitimo pi nimedo ava man anyong’a peri.

Ng’ii lok ma jugeno man m’utiyo ku wec ma jutiyo ko tin. Tek ibesomo Biblia moko m’upong’ ku wec ma nyang’ i igi tek kunoke ma wec m’i iye kakagi ukadhu man m’ibenyang’ ungo i igi, some copo nyeng’i ngo nyanok de. Dong’ isay Biblia m’utiyo ku wec ma nyang’ i iye yot kara emul adundeni. Ubekwayere nia ebed bende Biblia ma juloko mii man tap tap.a

Tii ku jamtic mi teknoloji ma kawono. I nindo ma tin, Biblia nwang’ere iwi karathasi kud i jamtic mi teknoloji ma kawono de. Jucopo nisomo lok mi Bibliane moko kud iwi yamu kunoke jucopo nitoke i ordinater, i tablet kunoke i telefon. Bibliane moko ke utie bende ku jemni ma copo nikonyo pi nisayu verse mange m’uweco iwi lembe ma rom ma wabesomo kunoke pi nineno tung’ tung’ i kind lok ma tung’ tung’ mi Biblia. Tek ifoyo peri niwinjo awinja kakare ni somo asoma, jumaku lembe mi Biblia kadok i dwal de. Ju ma pol gimaru migi niwinjo kinde ma gibenwang’iri i transport, kinde ma gibelwoko bongu kunoke kinde ma gibetimo tic moko ma copo ngo nicerogi ku niwinjo. Ineno nenedi kan itiyo ku yore m’urombo ku lem peri?

Tii ku jamtic ma tung’ tung’ mi ponjo Biblia. Jamtic mi ponjo Biblia copo nikonyi pi ninwang’u bero lee i kum som peri. Junwang’u cal mi ng’om ma juweco pigi i Biblia, ma bikonyi nineno ng’om m’inwang’u jukiewo pire kinde m’ibesomo Biblia man ma biketho ibinyang’ cuu i lembe ma juweco pigi. Thiwiwec ma ve ma juweco pigi i gazeti maeni kunoke ma nwang’iri i thiwiwec “Lembe ma Biblia ubeponjo” ma tie thenge acel mi kusika mir Internet jw.org de copo nikonyi pi ninyang’ i ng’et Biblia ma tung’ tung’.

Lok ayi mi ponji. Tek nisomo Biblia niai i acaki nitundo i ajiki ubenyayu lworo i ii, icopo medo ava peri mi somo Biblia ku nicaku nisomo ng’ete m’utelo nen peri nisagu. Tek ibemaru ning’eyo lembe iwi dhanu ma pigi yik ma juweco pigi i Biblia, icopo nipimo nisomo lembe i wigi acel acel. Lapor mi yore mi somo Biblia i ayi maeno nwang’ere i sanduku ma thiwie tie, “Pi nigolo lembe mi Biblia, ponj ning’eyo dhanu m’eweco pigi.” Kunoke nyo ibemito nisomo Biblia nimakere ku thiwiwec m’i iye kunoke nyo nimakere ku saa ma lembe ma tung’ tung’ ma juweco pigi i Biblia ubed ukadhu i iye. Pirang’o ngo m’ipimo acel m’i kind yore ma juweco pigi malu e?

Biblia tie ngo buku ma ve buku mange. I iye junwang’u juk m’uai i bang’ Jacwic mwa. (2 Timoteo 3:16) Lembe ma nwang’ere i iye copo nibedo kud atelatela lee dit iwi kwo mwa. Bibliane en gire de eyero kumae: “Lembe pa Mungu e kwo man etie ku tego.” (Juebrania 4:12) Etie ku copo mi yiko kwo mwa i ayi ario ma pigi tek: emiyo iwa telowic iwi kwo mwa ma kubang’ ceng’ tin man ekonyowa pi nitundo ning’eyo Mungu man lembakeca pare.​—1 Timoteo 4:8; Yakobo 4:8.

Yik kwo peri niai kawoni. Biblia copo nikonyi i kum lembe mi kwo peri in giri. Emio juk ma konjojo iwi lembe ma e:

• Nikwo karacelo ku dhanu mange.​—Juefeso 4:31, 32; 5:22, 25, 28, 33.

• Bedo ku pidoic man yotkum ma ber.​—Zaburi 37:8; Lembrieko 17:22.

• Kurajo.​—1 Jukorintho 6:9, 10.

• Kwo ma ber ku sente.​—Lembrieko 10:4; 28:19; Juefeso 4:28.a

Jumoko m’ugamiri ma nyen i ng’om mir Azia gifoyo lee dit ku valer mi juk mi Biblia. Calu ju m’ugamiri ma nyen dupa, ginyego lee dit kara ng’atuman utuc ning’iyo ku kura pa wadi man kara gibed giwec thwolo thwolo i kindgi. E gicaku nitiyo ku lembe ma gibeponjo i Biblia. Ku matoke ma kani? Vicent, ma won ot, uyero kumae: “Lembe m’asomo i Biblia ukonya ninyego ku peko ma tung’ tung’ m’i gamiri mwa ku mer. Nikwo nimakere ku ponji mi Biblia umiyo iwa kwo mi mutoro wan ario zoo.” Minot pare ma nyinge Annalou, uyero kumae: “Nisomo lapor mi dhanu mi Biblia ukonyowa. Kawoni abewinjara ku mutoro man anyong’a nega i kum gamiri mwa man i kum lembakeca mi kwo mwa.”

Ponj ning’eyo Mungu. M’umedo lembe m’eyero iwi gamiri, Vicent uyero bende kumae: “Nisomo Biblia uketho kawono adoko ceng’ini magwei ku Yehova nikadhu m’i wang’e.” Lembe ma Vicent unyang’ i iye ujengere iwi lembe ma e ma pire tek: Biblia copo konyi nicoro ceng’ni ku Mungu. Tek itimo kumeno, ibinwang’u bero kende ngo, ento ibinyang’ bende nia icopo doko jarimbe. M’umedo maeno, ibinyang’ i anyim ma ber m’ubekuro dhanu, m’etie nindo ma jubikwo i iye “kwo mandha,” kwo ma rondo ku rondo. (1 Timoteo 6:19) Eno utie bero ma buku mange mbe acel de ma copo nimiyo.

Tek icaku nisomo Biblia man imediri ameda nisome, in de icopo ninwang’u bero maeno​—kwo peri biyikere tin man ibitundo ning’eyo Mungu. Re, kinde m’ibesomo Biblia, icopo nipenjiri bende ku penji dupa. Ka kumeno, poy pi lapor ma ber pa Jaethiopia moko ma jatic mi kal p’ubimo ma dhaku mir Ethiopia m’ukwo oro udaru kadhu 2 000. Epenjere ku penji dupa kinde m’ebesomo Biblia. Kinde ma jupenje ka nyo ebino ninyang’ de i gin m’ebedo nisomo, edwoko kumae: “Acopo nyang’ nenedi ma ng’atu moko mbe m’ubeyero ira?” Eyiyo ku cwinye zoo kony i bang’ ng’atu moko m’ubedo ni japonji mi Biblia m’uteng’ini, ma nyinge Filipo, acel m’i kind julub pa Yesu ma kwong’a. (Tic mi Jukwenda 8:30, 31, 34) Rom rom kumeno, tek ibemito ning’eyo lembe lee iwi Biblia, wakweyi ipong’ ka ma jukwayu iye ponji ma ku wi yamu iwi www.pr418.com kunoke ikiew i adres ma junyutho pigi i gazeti maeni. Icopo bende nisayu ka Jumulembe pa Yehova ma ceng’ni ku kaka mibekwo i iye kunoke icopo nicidho i Udi Ker migi ma ceng’ni kudi. Bende, iromo nwang’u Biblia moko tin man niweko etel wii pi ninwang’u kwo ma ber.