Gin m’uketho japadri moko uweko kanisa pare

Kewec iwa pi thino peri.

Junyola i Italie, i oro 1943. Adongo karacelo kud umego ku nyimego para i pacu moko ma nyanok, kaka ma baba bed utimo iye tic mi fur man mi yiko piny mi bau. Junyodo mwa gipidhowa ku paru ma nia wabin wabed Jukatholiki m’anzilo i kwo mwa.

Pirang’o igam imito ibed japadri?

Kinde ma fodi a nyanok, abed amaru niwinjo jupadri i misa. Dwandgi ubed unyang’a lee, man seremoni ma tung’ tung’ ma jubetimo de ubed utelo nen para magwei. Pieno, aketho wiya zoo i kum doko padri. Saa m’abino ku oro 13, mama dwoka i internat moko ma jubed jucoko dhu awiya ma co i iye, pi nitendogi kara gibed ayika pi somo ma malu ma judoko ko padri.

Nyo wubed wuponjo Biblia de saa ma jubeponjowu?

I andha, wabed waponjo ngo. Kinde m’adoko ku oro 15, japonjo mwa acel umiyo ira buku mir Injili, m’ukoro kpawa mi kwo pa Yesu ku tic pare, man asomo bukune wang’ dupa. Saa ma oro para doko 18, acidho i Roma, man awok asomo i iniversite adek ma papa re m’ubetelo wigi. Asomo dhu Latin, dhu Jugiriki, histoire, psychologie, filozofi, man theoloji. Wabed watero verse mi Biblia ku wiwa, man wabed wawinjo som mi Biblia nja i ponji mi ceng’ yenga; kadok kumeno de, re i andha wabed waponjo ngo Biblia.

Kinde m’idoko jatela, nyo ibed iponjo ponji de?

Tic para ubino asagane nineno wi lembe ma tung’ tung’. Ento saa moko abed amiyo ponji iwi cik mi guriri mi Vatican mir Ario.

Lembang’o m’uroyo jiji i ii iwi dini mi Katholiki?

Lembe moko adek ubed ucandu wiya. Mi kwong’o, dini ubino mondo i lembgamba. Mir ario, jupadri karacelo ku juyic gibetimo lembe ma reco, re jubewekogi. Mir adek, aneno nia ve ponji moko mi Katholiki utie tap ungo. Ku lapor, nenedi Mungu m’umaru dhanu copo miyo igi matira nja ku nja i ng’ei tho migi? Mange, nyo andha Mungu ubemito water sala ku wiwa wang’ udul ku sapulethi?a

Dong’ igam itimo ang’o?

Akwayu Mungu ku piwang’a curcur nia emii ira telowic. Ang’iewo bende Biblia mi Katholiki ma julwong’o Bible de Jérusalem, ma nwang’u fodi uai uwok awoka i dhu Italien, man acaku some. E ceng’ yenga moko kugweno, kinde m’aai i misa abeliero kanzu para, dhanu moko ario utundo i bang’wa i séminaire. Giwacu ira nia gitie Jumulembe pa Yehova. Waweco kugi pi saa acel ku piny iwi Biblia, man iwi lembe ma tung’ tung’ ma Bibliane unyutho, ma copo konyojo ning’iyo dini mandha.

Nen peri ubino ang’o iwi welo maeno?

Tegocwiny ma gibino ponjo ko, man ayi ma giwotho nwang’u ko verse yot yot i Biblia mi Katholiki unyang’a lee dit. I ng’eye, Jamulembe pa Yehova mange ma nyinge Mario ucaku liewa. Ebino ku cirocir man ebed eworo program mwa; nik’ebed ku koth kunoke ku ceng’, nja ceng’ yenga, saa adek mi kugweno nwang’u etundo.

Jupadri mange ke gibedo ku nen ma kani iwi bino p’umego maeno?

Abed alwong’ogi kara wawinj ponji karacelo kugi, re ng’atu acel de m’i kindgi m’uneno ponji mi Biblia ni gin ma pire tek. Ento an, ponjine ubed unyang’a dit. Abed aponjo lembe ma beco mandha, calu ve penji ma e m’asayu dwokowang’e pi oro ma dupa: Pirang’o Mungu uweko can ku lembe ma reco ubemedere?

Nyo judongo peri gimito giceri kara iwek niponjo Biblia?

I oro 1975, acidho i Roma wang’ dupa pi nikoro pi nen para. Judongo para gi ii niwilo paru para, re ng’atu acel de mbe i kindgi m’utiyo ku Biblia. Tokcen ne, i nindo 9, dwi mi 1, oro 1976, akiewo barua aoro i Roma; i baruane akoro nia dong’ atie ngo Katholiki. Nindo ario i ng’eye, aweko séminaire man amaku garimosi (train), acidho wang’ ma kwong’a i coko mi Jumulembe pa Yehova; ebino coko ma dit ma diko cokiri dupa. Lembe ceke ubino tung’ ku m’alar ang’iyo ko. Jumulembe ceke gibino ku Biblia migi, man ka jakorlembe ulwong’o verse moko, inwang’u ng’atuman ubelubo versene i Biblia pare.

Jupewu ke giparu ang’o iwi lembe maeno zoo?

Ju ma pol m’i kindgi gijai i dhoga ku rac. Ento awinjo nia umira moko ma bedo i adhura mi Lombardie, yo malu mir Italie ubeponjo Biblia ku Jumulembe pa Yehova. E acidho i bang’e, man Jumulembe pa Yehova ma kuca giwok gikonya ninwang’u tic man kaka moko m’acopo bedo i iye. I ng’eye, de i kind oro ma rom eca, alimo batizo man adoko Jamulembe pa Yehova.

Nyo ang’eyang’o umondo i ii pi yub maeno m’imaku?

Nyanok de ngo! Ento abewinjara nia kindwa ku Mungu utie ceng’ini mandha, pilembe ng’eyong’ec m’atie ko i wiye ujengere iwi Biblia, ento ungo iwi rieko mi dhanu kunoke iwi lembsuru mi dini. Bende, kawoni dong’ aromo ponjo jumange ku tegocwinya man ku lembe ma tap.