Dhaku moko mir anyoli mi Juyahudi ubekoro gin m’ucwale niwilo yiyoyic pare

Kekor iwa pi kwo peri.

Junyola i oro 1979 i ng’om mir États-Unis. Kinde ma oro para udoko adek, gier mi junyodo para ulal. Mama tunga calku suru mi Juyahudi, man eketho asomo i yeshivas, ma tie écoles mi Juyahudi. Saa ma oro para udoko abiro, wadok i Israel; watimo oro acel kuca, man awok amondo i somo i école moko ma julwong’o kibuz. Etie kaka ma Juisrael gicokiri i iye pi nitimo tic mi podho. I ng’eye, wagam wadok i Mexico waku mama.

Kadok sinagog ubino mbe kuca de, re aweko ngo suru mi Juyahudi. Ka ceng’ Sabatu uromo, acwinyo kaduma, asomo Tora ma tie buku mwa, man arwo ma nwang’u atie ku buku ma julwong’o sidur, ma jukiewo rwo ma tung’ tung’ i iye. I kalasi, abed ayero ni juwada ma wasomo kugi nia dini mi Juyahudi re m’ular ubedo nuti ma kwong’a. Nwang’u fodi asomo ngo wang’ acel de gin ma julwong’o Lembariba ma nyen (Nouveau Testament), m’uweco akeca iwi tic man ponji pa Yesu Kristu. Mama de ugam ucima nia kud asome, maru ponji m’i iye binyotho yiyoyic para.

Pirang’o ing’iyo nia ikesom Lembariba ma nyen ke?

Saa m’abino ku oro 17, adok kendo i États-Unis pi nidaru kalasi. Kuca, anwang’u jalawobi moko ma wang’eyara kude, m’ubed uyero nia etie Jakristu; ewacu ira nia ka nwang’u Yesu mbe, nwang’u gin moko tiye m’urem i kwo para.

Adwoko ire nia, “dhanu ma giyiyo Yesu gitie dhanu m’urwinyo arwinya.”

Edok epenja kumae: “Nyo idaru somo Lembariba ma nyen de?”

Adwoko nia, “ungo.”

E ewacu ira nia, “Ineno ngo nia nwang’u ukwayu ikegwii supu kan ing’wen deki?”

Wec meno ukayu kuma mi tuko ngo, pilembe an abed anwang’u nia etie lembe mi ming’ ma lee dit nicwaku kunoke nikwero paru moko limalima kumeni. E agamu Biblia pare ma dong’ wiya ukwot, adok i pacu, man acaku somo Lembariba ma nyen.

Gin m’isomo ubedo kud adwogi ma kani i wii?

Ku lembe mi zungo, awok anwang’u nia karaman Juyahudi re ma gikiewo Lembariba ma nyen. Bende, i saa mi som para, acaku nwang’u nia Yesu tie Jayahudi m’ubino dhanu ma ber, ma jwigere, m’ubed umito nikonyo dhanu, ento niyakugi ayaka ngo. Acidho bende i kapang buku moko, man agamu buku dupa dupa m’uweco pi Yesu. Re i kind buku maeno, acel de mbe m’ukonya ninyang’ nia Yesu bino Masiya. Moko ulund uyero nia etie Mungu; anwang’u nia eno tie lembe ma timere ngo. Kan etie Mungu, dong’ ebed erwo i bang’ ng’a? Nyo i bang’e gire? Lembe mange tie nia Yesu utho. Biblia ke uyero pi Mungu kumae: “In itho ngo!”a

Idog inwang’u dwokowang’ penji maeno nenedi?

Ang’eyo nia lemandha lokere ngo, man abedo ku lembakeca mi nwang’e. Pieno arwo i bang’ Mungu ku cwinya ceke man ku piwang’a curcur; eno ubino wang’ ma kwong’a m’aberwo m’umbe buku para ma sidur. Kinde ma fodi aai adaru rwo nyapok e ci, awinjo judwong’o dhugola; jumamon moko ario ma Jumulembe pa Yehova re ma gitundo i bang’a. Gimiyo ira nyathibuku moko ma juponjo ko Biblia. Girasoma ma gimiyone man wec ma wadok waweco i ng’eye ku Jumulembe pa Yehova, uketho anwang’u nia andha yiyoyic migi ucungo iwi Biblia. Ku lapor, Jumulembe pa Yehova giyiyo Yesu, re giyiyo ngo nia etie theng Trinita, ento nia etie “Wod Mungu”b man “acaki mi giracwiya pa Mungu.”c

Nindo ma nok i ng’eye, adok kendo i Mexico, man awok amedara niponjo lembila m’uweco pi Masiya karacelo ku Jumulembe pa Yehova. Azungo rac dit! Karaman lembila m’uweco iwi Masiya tie pong’ udheru ku ma kore! Re fodi asu jiji moko ubino i iya. Abed apenjara kumae: ‘Nyo lembila m’uweco pi Masiya upong’o iwi Yesu kende?’ ‘Ka nyo ebino ng’atu moko m’ukethere gire nia etie Masiya ke?’

Dong’ ang’o m’uketho iyiyo nia andha Yesu re ma tie Masiya?

Jumulembe ginyutho ira lembila ma copo pong’o ngo acel de iwi ng’atu m’uragere araga nia etie Masiya. Ku lapor, oro ma kadhu 700 i wang’e, jabila Mika uewo nia Masiya binyolere i Bethlehem, ma nwang’ere i Yudea.d Ng’a ma copo ng’iyo en gire kaka m’ebinyolere i iye? Isaya ke ukiewo nia jubinego Masiya calu jatimrac, re jubikunye karacelo ku julonyo.e Lembila maeno zoo upong’o iwi Yesu.

Lembe ma tokcen utie thekwaru pa Yesu. Biblia ular uyero nia Masiya bibedo nyakwar ubimo Daudi.f Calu ma Juyahudi ma con gibed gigwoko buku mi thekwaru migi, ka nwang’u Yesu unyolere ngo i thekwaru pa Daudi, nwang’u judegine gicikogo lembene ku wi ot! Ento ecopere ngo igi, pilembe gineno kamaleng’ nia Yesu tie nyakwar Daudi. Kadok udul dhanu de ugam ulwong’e nia “Wod Daudi.”g

I oro 70 i ng’ei nyoliri pa Yesu, niwacu oro 37 i ng’ei tho pa Yesu, jurumwony mi Roma ginyotho Yeruzalem, e buku mi thekwaru ugam urwinyo, moko ke unyothere. Pieno, kara jung’ey thekwaru pa Masiya ma jukiewo akiewa, ugam ukwayu nia Masiyane ubin i wang’ oro 70 i ng’ei nyoliri pa Yesu.

Kite ma lembila maeno upong’o ko ukelo adwogi ma kani i wii?

I buku mi Poi mi Cik 18:18, 19, jular juyero nia Mungu biting’o jabila moko i Israel, ma calu Musa. Mungu wacu kumae: “Ng’atu ma tek biwinjo lembe para ngo m’ebiyero ku nyinga, [ebicungo i dhu lembene].” Aponjo Biblia i thucne adaru zoo, e ayiyo andhandha nia Yesu mi Nazarethi re m’ubino jabila maeno.