Jurwey lembanyong’a ubekoro
Enwang’u thelembe m’uketho wabekwo
YESU yero nia eng’eyo rombe pare. (Yohana 10:14) Tek ng’atu moko Tie kud adunde m’atira, emaru kwiyocwiny man lembe matira, e julub pa Yesu bitelo ng’atuno. Ng’atuno binwang’u thelembe i kwo pare, calu ma dhaku moko ma kwo i ng’om mi belgique utimo. Kpawa pare ni e:
“Kinde ma Jumulembe pa Yehova udwong’o dhugola para, unwang’u abedo m’umbe anyong’a man amito anegara cen. Amaru lembe ma giyero iwi kite ma peko mi ng’om maeni bithum ko, ento afoyo ngo ka nia Mungu bitimo lembene en. Nwang’u ajigo cidho i kanisa oro abora i wang’e, kum adagu umbili m’ubino i kanisa. Ento awinjo dwal mi lemandha i lembe ma Jumulembe pa Yehova giyero man agam anyang’ nia, etie lembe ma copere ngo nikwo m’umbe Mungu.
“Lembe ma rac, i ng’ey liew ma nok kende cii, kindwa ucot ku Jumulembe. Cwinya gam utur. Abed amadhu taba dhoge ario kubang’ ceng’ man acaku tiyo bende ku yath ma mero jo. I ng’eye, amito awec ku kwarumira m’utho, e acaku weco ku tipo m’ucido. Abed abedo ku lworo lee uthieno ka ani kenda kum pajogi ubed ubino nisenda. Gisenda pi dwi ma dupa. Nja uthieno abedo ku lworo kan atie kenda.
“I ng’eye, nindo moko abino cidho nirieyo tienda, awotho i gengi m’ukoc ku ma naka awotho i iye, e atundo i kum ot moko ma dit. Azungo kite ma dhanu pong’ ko keca. Kinde ma acoro ceng’ini, aneno nia Jumulembe pa Yehova re m’ubegyero Ot Ker migi. Agam apoy ndhu pi nindo ma Jumulembe gibed gibino ko i bang’a , man aparu kite ma nang’ ng’om cibedo leng’ ko ka nwang’u dhanu ceke kwo ve gin.
“Amito nia Jumulembe gidwogi kendo i bang’a, e aweco i bang’ dhanu moko I kind ju m’ubegiero Ot Ker. Arwo i bang’ Mungu, man ing’ey nindo apar jalwo ma arombo ko wang’ ma kwong’a utundo i dhugola para. Ekwayu nia wamed kude ponji mi Biblia, e ayiyo kud anyong’a. Ndhu ndhu nica elwong’a i coko ma tung’ tung’ ma bekadhu i Ot Ker, e ayiyo. Nang’ fodi aneno ngo kit lembe ma kumeca! Pi nindo ma dupa abino sayu dhanu ma gitie ku mer i kindgi man ma weg anyong’a. Karaman ginwang’iri tap kakeni!
“Ing’eye acaku cidho i coko ceke. ing’ey yenga ma romo adek, aweko kura ma rac mi madhu taba. Abayu buku m’uweco iwi kite ma waromo ng’eyo ko nindo m’ubino nikadhu kud i nyikaluku man wer mi pajogi, e acaku nwang’u nia tego ma pajogi ubino ko i wiya ubejwik. Aloko kit kwo para nimakere ku lembe ma Yehova ubekwayu ma nwang’ere i Biblia, man i ng’ey dwi adek acaku rweyo lembanyong’a. I ng’ey dwi abusiel mange, alimo batizo. Nindo ario i ng’ey batizo para, acaku tic pa jayab yo ma jakony.
“Afoyo Yehova pi lembe ceke ma beco ma etimo ira. Kawoni dong’ ang’eyo thelembe m’anzilo m’uketho wabekwo. Andha, nying’ Yehova en e ot ma wiw ma tek ma i ie wanwang’u gony ku gwok. (Lembrieko 18:10) Awinjara calu jagor Zaburi kinde m’egoro i Zaburi 84:10 kumae: ‘Ceng’ acel i lelagang’ peri e ber ma sagu ceng’ rubanga [kamange] Afoyo bedo i dhugula i ot pa Mungu para, sagu bedo I hema mi dubo.’”
Dhaku maeno ma cwinye mol unwang’u thelembe m’anzilo mi kwo. Ng’atu m’uyenyo Yehova ku cwinye ma cuu copo timo kumeno.